Read Jinghpaw Common Language Bible 2009 2 KORINHTU 2 Bible Online

2 KORINHTU 2 - Jinghpaw Common Language Bible 2009 bible

2 KORINHTU 2

¹Dai rai nna nanhte hpe myit yawn ai lam n byin shangun u ga, nanhte hpang de bai n sa sana ngu nna ngai myit daw dan se ai.

²Hpa majaw nga yang, ngai nanhte hpe shayawn kau made yang gaw ngai hpe kabu myit pyaw shangun na masha kadai sha nga sana rai ta? Ngai myit shayawn kau ai ni sha ngam nga sana rai nga ai.

³Ngai hpe kabu shangun na ni nan, ngai hpe myit n pyaw ai lam n shabyin u ga ngai nanhte hpang de n sa mayu mat nngai. Dai majaw ngai laika dat hpe ka dat ai re. Hpa majaw nga yang, ngai kabu gara yang nanhte nlang hte mung kabu gara shajang na hpe ngai myit kam nngai.

⁴Ngai gaw tsin-yam tsindam myit ru myit yak grai hkrum nna myi prwi law law pru let dai laika hpe ka dat se ai. Nye a yaw shada ai lam gaw nanhte hpe myit yawn shangun na matu n rai; Nanhte hpe ngai gade daram tsaw ra nga ai hpe chye shangun mayu ai majaw ka dat ai rai nga ai.

⁵Ya marai langai ngai gaw ngai hpe myit yawn shangun a yang gaw, ngai hpe n rai nanhte yawng hpe tsawm ra wa myit yawn shangun kau nga ai. (Dai wa a ntsa e mara kaba n shagun mayu ai majaw ngai ndai lam tsun nga nngai.)

⁶Nanhte malawng maga e mara shagun daru sharin hkrum ai lam gaw dai wa a matu ram ging ai ari rai salu ai.

⁷Dai wa gaw nachying n hkam sharang lu na daram re ai yawn hkyen ai hta n lup mat u ga, shi hpe mara dat ya nna shalan shabran ya mu.

⁸Dai rai nna nanhte gaw shi hpe kaja wa tsaw ra nga ai lam shi chye na hkra galaw na matu ngai nanhte hpe hpyi nem made ai.

⁹Shawng e ngai nanhte hpang de laika ka dat ai lam gaw, chyam dinglik ai lam hpe nanhte gade daram hkam jan lu myit dai hte, nye a sharin shaga matsun madun ai lam ni hpe madat mara hkan sa na matu galoi mung jin nga chyalu rai nga ai kun? ngu ai hpe chye na matu ka dat nngai.

¹⁰Nanhte gaw marai langai ngai hpe shi shut ai mara dat kau ya myit yang, ngai mung raw dat ya nngai. Hpa majaw nga yang, lama rai nna masha marai langai ngai hpe mara dat ya ra wa ai shaloi, ngai gaw nanhte a myi man hpe tau nna Hkristu a man e shi a mara hpe dat ya nngai.

¹¹Ngai ndai hku galaw ai gaw, Satan wa anhte hpe shawng n nyan sha kau u ga, galaw ai re. Hpa majaw nga yang Satan wa a hpaji daw ai lam hpe anhte n chye ga ai n rai.

¹²Hkristu a Kabu Gara Shiga hkaw tsun na matu Troa mare de ngai sa du ai shaloi, dai shara kaw magam gun lu n ga, nye a matu Madu chyinghka hpaw da ya nga ai.

¹³Rai ti mung anhte a hpu nau wa Titu hte ngai n hkrum lu ai majaw ngai nachying myit ru myit tsang rai nga nngai. Dai majaw dai kaw na masha ni hpe shakram kau da nna Makedoni mung de sa wa nngai.

¹⁴Rai ti mung Karai Kasang a chyeju grai kaba la nga ai; hpa majaw nga yang, shi gaw anhte hpe Hkristu hte langai sha shatai nna Hkristu a awng padang lu ai poi hta ninglaw yan hkawm ai bawng masha ni hpe zawn Karai Kasang gaw anhte hpe woi awn da mi ai. Hkristu hpe chye chyang ai machye machyang hpe manam pyaw ai bat zawn shara shagu hkan e shabra dat na matu Karai Kasang gaw anhte hpe jai lang nga mi ai.

¹⁵Hpa majaw nga yang, anhte gaw Karai Kasang kaw Hkristu nawng jau ai manam pyaw ai bat hte bung nga ga ai. Dai manam pyaw ai bat gaw hkye hkrang la hkrum ai ni hta mung, sum mat hkrum ai ni hta mung chyam bra mat wa sai.

¹⁶Dai bat gaw sum mat hkrum ai ni a matu si shangun ai si hkrung si htan bat tai nna, hkye hkrang la hkrum sai ni a matu gaw asak hkrung shangun ai manam pyaw ai bat rai nga ai. Dai rai nna dai zawn re ai amu hpe gun hpai na kadai wa ging dan nga a ta?

¹⁷Anhte gaw kaga masha law law ni zawn, Karai Kasang a mungga hpe manu hpa ai gun rai hpe zawn dut mari ai lam n galaw ga ai. Rai ti mung anhte gaw Karai Kasang e shangun dat ai ni rai nna, Hkristu a shangun ma ni hku nna Karai Kasang a man e dai mungga hpe teng man san seng ai myit hte hkaw tsun ga ai.