Read Jinghpaw Common Language Bible 2009 2 KORINHTU 3 Bible Online

2 KORINHTU 3 - Jinghpaw Common Language Bible 2009 bible

2 KORINHTU 3

¹Ning nga nna tsun ai gaw anhte a lam anhte gumrawng tsun ai zawn nga nga a ni? Masha nkau mi zawn anhte a lam madi shadaw ai laika ni nanhte hpe jaw na ra a ni? Shing n rai, nanhte kaw na madi shadaw laika hpyi gun na ra a ni?

²Nanhte hkum nan masha shagu e hti nna chye lu ai anhte a myit masin hta ka tawn da ai laika hkum nan rai nga myit dai.

³Dai laika hpe Hkristu shi nan ka nhtawm, anhte hte shagun dat ai gaw dan leng nga ai. Dai laika hpe tsi hte n ka ai sha hkrung nga ai Karai Kasang a wenyi hte, bai lungpa ni hta n re ai sha shinggyim masha ni a kraw lawang ni hta ka da nga ai.

⁴Anhte ning ngu tsun lu ai gaw, anhte gaw Hkristu a marang e Karai Kasang hta myit mu myit hkut ai lam lu la ga ai majaw rai nga ai.

⁵Anhte gaw ndai amu hpe galaw lu ga ai ngu nna tsun lu na anhte hta hpa atsam marai mung n rawng ga ai. Anhte lu ai atsam mahtang gaw Karai Kasang kaw na rai nga ai.

⁶Anhte gaw ga shaka ningnan a matu amu gun hpai lu u ga, anhte hpe atsam marai jaw ai gaw Karai Kasang shi nan rai nga ai. Dai ga shaka ningnan gaw ka da ai tara hta rawng ai n re ai sha, Wenyi kaw na rai nga ai. Hpa majaw nga yang laika hkum hte ka da ai tara gaw asak hpe si shangun nga ai; dai Wenyi chyawm gaw asak jahkrung ya nga ai.

⁷Lungpa hta ka da ai jep ai tara hpe jaw ai shaloi, Karai Kasang a hpung shingkang htoi kabrim dan pru nga ai. Dai hpung shingkang a htoi ahkung ai gaw Mawshe a myi man kaw na yat yat hkoi mat wa magang nga ai. Rai ti mung nachying wa naw htoi kabrim nga ai majaw Israela amyu masha ni shi a myi man hpe n azi yu lu ma ai. Si hkrung si htan hpe byin shangun ai jep ai tara hpe dai zawn re ai hpung shingkang hte jaw ya ai rai yang gaw,

⁸dai wenyi a bungli galaw shamu shamawt ai hte seng ai hpung shingkang gaw grau nna dan hkung na n rai ni?

⁹Yubak mara a ari jaw na matu daw dan ya ai lam hte seng ai magam amu gaw hpung shingkang hte hpring tsup nga ai rai yang gaw, hkye hkrang la ai lam jaw ya ai hte seng ai magam amu gaw gade wa grau nna hpung shingkang dan hkung na rai hka!

¹⁰Ya grau nna dan hkung ai hpung shingkang a majaw, shawng de kalang mi grai dan hkung lai wa sai hpung shingkang gaw hkoi mat wa sai ngu nna anhte tsun lu ga ai.

¹¹Jahkring mi sha grin nga chye ai magam amu pyi hpung shingkang rawng nga ai rai yang gaw agrin nga ai magam amu hta e gade wa grau nna hpung shingkang rawng nga na n rai hka!

¹²Anhte gaw ning re ai myit mada ai lam lu ga ai majaw, anhte nden ja ga ai.

¹³Anhte gaw Mawshe zawn n rai ga ai. Shi gaw shi a myi man kaw na htoi kabrim ai hpung shingkang hkoi mat wa sai hpe Israela masha ni n mu lu mu ga, shi a myi man hpe man magap hte magap htinggrum da wu ai.

¹⁴Israela amyu masha ni a myit masin ni gaw kaja wa pat shinggang da nga malu ai. Dai ni du hkra pyi gaw ga shaka dingsa laika ni hpe hti ai ten shagu shanhte a myit masin ni hpe man magap dai hte naw magap htinggrum nga malu ai. Masha langai mi gaw Hkristu hta asak hkrung ai shaloi she dai man magap hpe gun kau lu nga ai.

¹⁵Dai ni du hkra pyi shanhte gaw Mawshe a tara hpe hti ai ten shagu hta dai man magap gaw shanhte a myit mang ai lam ni hpe naw magap htinggrum nga malu ai.

¹⁶Rai ti mung dai magap hpe gun kau lu ai. Chyum Laika hta Mawshe a lam tsun da ai hte maren, shi gaw Madu hpang de kayin ai shaloi shi a man magap hpe gun kau ya hkrum nga ai.

¹⁷Ya “Madu” ngu ai gaw dai Wenyi hpe ngu ai rai nga ai. Madu a Wenyi shanu ai shara hta shanglawt ahkang mung nga nga ai.

¹⁸Dai rai nna anhte yawng gaw man magap hpaw kau sai myi man ni hte dai Madu a hpung shingkang a shingna hpe bai nhtang htawng madun nga ga ai. Dai hpung shingkang nan wenyi ngu ai Madu kaw na du sa nna Madu hte grau grau bung jat wa ai hpung shingkang maga de anhte hpe galai shai wa shangun mi ai.