Read Jinghpaw Common Language Bible 2009 2 KORINHTU 4 Bible Online

2 KORINHTU 4 - Jinghpaw Common Language Bible 2009 bible

2 KORINHTU 4

¹Karai Kasang gaw shi a matsan dum ai myit a jaw e, anhte hpe ndai magam gun hpai na amu ap ya mani ai rai nna, anhte hta myit daw n-gun yawm ai lam n nga ai.

²Anhte gaw makoi magap ip da ai kaya kahpa amu nlang hte hpe rap di kau sagaw ai; anhte gaw hkalem hkalau ai hku n galaw ga ai, Karai Kasang a mungga hpe mung masu magaw gale galau n tsun ga ai. Anhte gaw Karai Kasang a man e dai teng man ai lam a nhtoi hta asak hkrung shamu shamawt nna masha hkum shagu a htauli htaula myit hte htap htuk ai hku nga ga ai.

³Lama wa anhte hkaw tsun dan ai Kabu Gara Shi ga hpe masha ni n chye na ai rai yang dai wenyi hta sum hkrum ai masha ni sha n chye na ma ai.

⁴Ndai mungkan ga a n hkru n kaja ai karai wa ngu ai Nat Satan wa gaw shanhte a myit ni hpe ningsin hte ka-up shamak tawn kau ya manu ai majaw, shanhte n kam n sham ma ai. Shi gaw dai Karai Kasang a hkrang bung sumla nan rai nga ai. Hkristu a hpung shingkang a lam dai Kabu Gara Shiga kaw na pru ai nhtoi hpe n mu lu shangun mu ai.

⁵Hpa majaw nga yang, anhte gaw, anhte a lam hkaw dan ga ai n rai, Yesu Hkristu gaw Madu rai nga ai lam, anhte gaw Yesu a marang e nanhte a shangun ma ni rai nga ga ai lam hkaw dan ga ai.

⁶Yesu Hkristu a myi man hta htoi tu ai hpung shingkang a lam nanhte chye chyang u ga, anhte a myit masin hta nhtoi jahtoi ya ai Karai Kasang gaw, “Nsin hta na nhtoi htoi na ra ai,” nga nna tsun ai Karai Kasang shi nan rai nga ai.

⁷Rai ti mung dai chyahtum chyalai re ai n-gun atsam chyawm gaw anhte kaw na n rai, Karai Kasang kaw na rai nga ai lam madun dan lu u ga, ndai wenyi sutgan lu tawn ai anhte gaw, yu maya ga di bu ni hte sha bung ga ai.

⁸Anhte gaw ya sha ya sha ru yak jam jau hkrum ga ai. rai ti mung agrawp kau hkrum ga ai n rai; kalang lang ung ang mat ga ai, rai ti mung myit htum mat ga ai n rai;

⁹Anhte hpe hpyen ai ni law law nga ma ai. Rai ti mung jinghku langai mi pyi n lu mat ai sha galoi n nga yu ga ai; kalang lang grai machyi hkrum ga ai, rai ti mung jahten shaza kau hkrum ga ai n rai.

¹⁰Madu Yesu gaw anhte a hkum hkrang hta asak hkrung shamu shamawt nga ai lam dan dawng na matu anhte a si chye ai hkum hkrang ni hta Yesu hkam sha lai wa sai si hkrung si htan nni nkri hpe tut nawng e hkam mana sha nga ga ai.

¹¹Yesu a sak hkrung ai lam gaw anhte a si chye ai hkum hkrang hta dan dawng mu lu u ga, anhte gaw anhte a sak hkrung lam ting hte hta, aten shagu Yesu a matu si hkam na lam hta hkawm sa nga ga ai.

¹²Ndai gaw anhte hta e si hkrung si htan tara gaw amu galaw nga ai. Rai ti mung nanhte hta chyawm gaw asak hkrung ai tara mahtang amu galaw nga ai.

¹³Chyum Laika hta, “Ngai kam sham nngai majaw ngai hkaw tsun nngai,” nga nna tsun da nga ai hte maren, anhte mung kam sham ai majaw hkaw tsun ga ai.

¹⁴Madu Yesu hpe si ai kaw na hkrung sharawt la ai Karai Kasang gaw anhte hpe mung Madu Yesu hte rau hkrung sharawt la na mi ai rai nna, nanhte hte rau shi a man de woi la na mi ai hpe anhte chye nga ga ai.

¹⁵Ndai lam ni yawng hte gaw nanhte hta akyu ara byin tai wa na matu rai nga ai; Karai Kasang a chyeju hpe hkam la ai masha ni mung grau grau law wa ai hte maren, Madu a hpung shingkang hpe chyeju dum shakawn shagrau akyu hpyi ai lam ni mung grau nna law htam wa na ra ai.

¹⁶Ndai lam ni a majaw anhte gaw galoi mung myit n hten, n-gun n yawm ga ai. Anhte a shinggan lam hku myi hte mu lu nga ai shinggyim hkrang gaw yat yat sha hten run mat wa nga ai, rai ti mung kata na wenyi hkrang gaw lani hte lani ningnan bai galai lajang ai hpe hkam la nga ga ai.

¹⁷Bai anhte jahkring jahkra hkrum hkra nga ai tsin-yam tsindam kaji kajaw mahtang gaw anhte hpe ruyak jam jau hta grau kaba ai hte htani htana re hpung shingkang hpe hkam la shangun na ra ai.

¹⁸Anhte gaw myi hte mu lu ai arai ni hpe yu azi majen nga ga ai n re ai sha, myi hte n mu lu ai arai ni hpe she yu azi majen nga ga ai. Hpa majaw nga yang, myi hte mu lu ai arai gaw jahkring jahkra sha nga nna, myit hte n mu lu ai arai mahtang gaw htani htana agrin nga ai.