Read Jinghpaw Common Language Bible 2009 2 KORINHTU 5 Bible Online

2 KORINHTU 5 - Jinghpaw Common Language Bible 2009 bible

2 KORINHTU 5

¹Dinghta ga hta anhte nga nga ai sum nta ngu ai hkum hkrang gaw hten run mat wa ai shaloi, sumsing lamu e Karai Kasang anhte nga na matu shi nan galaw ya ai htani htana grin nga na ra ai nta anhte lu ga ai hpe anhte chye nga ga ai.

²Ya dai sum hta anhte rawng nga yang, sumsing lamu na nta hpe anhte dagraw la lu na nachying n dawt nga ga ai majaw, anhte madai let nga nga ga ai.

³Shing rai dagraw la ngut jang anhte gaw hkum hkrang n lu ai ni tai mat na n rai.

⁴Ndai dinghta sum hta naw nga ai shaloi gun hpai ai lit e dip gamyet ai hpe hkam sha ai myit hte madai nga ga ai. Shingrai madai ai lam gaw anhte a dinghta hkum hkrang hpe gun kabai kau mayu ga ai majaw n rai, si mat chye ai hpe htani htana asak hkrung ai de galai mat na matu sumsing lamu na hkum hkrang hpe anhte dagraw la mayu ai majaw rai nga ai.

⁵Dai galai mat na lam hpe anhte a matu lajang ai wa chyawm gaw Karai Kasang rai nga ai. Shi gaw anhte hkam la na rai nga ai chyeju nlang hte a matu hkam dahka galaw ya ai hku nna shi anhte hpe wenyi jaw mani ai.

⁶Dai re ai majaw anhte gaw galoi mung nden marai hte hpring nga ga ai. Ndai dinghta hkum hkrang nta hta sha naw anga nga dingsa gaw Karai Kasang a nta hte tsan gang nga ga ai.

⁷Hpa majaw nga yang, anhte a asak hkrung ai lam gaw myi hte mu lu ai hta n re ai sha makam masham hta she asak hkrung nga ga ai.

⁸Anhte gaw nden marai hte hpring nga ga ai rai nna, hkum hkrang nta hpe kau da nna dai Madu hte rau nga nga na hpe grau nna ra sharawng nga ga ai.

⁹Dai rai nna anhte gaw, nang e nga ai hkum hkrang nta hta shanu nga yang rai ti mung, htawra kaw shanu nga yang rai ti mung, shi hpe sharawng awng shangun na gaw kaga yawng mayawng hta grau ahkyak ai amu rai nga mali ai.

¹⁰Hpa majaw nga yang, anhte nlang hte gaw tara daw dan ai hkrum na matu Hkristu a tingnyang man de dawng pru na rai ga ai. Dai shaloi e anhte langai hte langai gaw, ndai hkum hkrang nta e naw nga nga yang galaw hkawm sa kau sai kaja ai amu, n kaja ai amu a matu ang ai hte maren hkam la shajang na ga ai.

¹¹Anhte gaw dai Madu hpe hkrit kang ai ngu ai hpa rai nga ai hpe chye ga ai majaw kaga masha ni hpe lau la lu na matu shakut shaja ga ai. Karai Kasang anhte a lam akri akrai chye nga ai, nanhte mung nanhte a myit masin ni hta nye a lam atsawm sha chye nga myit dai ngu nna ngai myit mada nga nngai.

¹²Ning ngu nna tsun ai hta anhte gaw tinang a kaja ai lam hpe nanhte a man e shagrau sha-a dan nga ga ai n rai; anhte a ntsa e nanhte kabu gumrawng shara lu la shangun na matu she rai nga ai. Shaloi she masha a arawn alai hpe n yu ai sha shinggan nsam hpe sha yu nna gumrawng chye ai ni hpe mahtai jaw lu na rai myit dai.

¹³Anhte kaja wa n gring mat saga ni? N gring nga ga yang gaw Karai Kasang a matu mara n gring nga ga ai. Shing n rai anhte gring nga ga ni? Gring nga ga yang gaw nanhte a matu gring nga ga ai.

¹⁴Anhte hpe Hkristu a tsaw ra ai myit e up hkang da mi ai. Hpa majaw nga yang, marai langai mi masha yawng mayawng a matu mara si hkam sai hpe anhte myit mu myit hkut saga ai. Dai rai nna dai gaw shi a si hkam ai hta yawng mayawng si hkam lawm sai ngu ai lachyum rai nga ai.

¹⁵Asak hkrung nga ai ni mung, shanhte a akyu a matu mara asak n hkrung ai sha, shanhte a matu mara si hkam nna bai hkrung rawt wa ai wa a matu chyu sha hkrung nga mu ga, yawng mayawng a matu mara shi si hkam sai.

¹⁶Dai re ai majaw, anhte gaw ya kaw nna kadai hpe mung masha a madang ni hpe hkan nna daw dan ai lam n galaw saga ai. Shawng daw de Hkristu hpe masha madang hku hkan nna sawn daw dan ai lam galaw lai wa saga ai, rai ti mung ya dai hku n galaw saga ai.

¹⁷Kadai rai ti mung Hkristu hte langai sha tai mat ai shaloi shi gaw masha ningnan tai wa sai, shawng na dingsa hte gaw lai mat wa sai, yu mu yawng mayawng ningnan tai wa sai.

¹⁸Dai lam yawng mayawng hpe chyawm gaw Karai Kasang e galaw nu ai, Karai Kasang gaw anhte hpe shi a hpyen ni tai nga ai kaw nna shi a jinghku ni tai wa na matu Hkristu Yesu a marang e galai shai mat shangun mi ai hte, kaga masha ni hpe mung shi a jinghku ni tai wa shangun na matu anhte hpe amu lit ap ya mani ai.

¹⁹Anhte hkaw tsun ai mungga gaw, Karai Kasang gaw Hkristu hta e masha yawng mayawng hpe shi a jinghku ni tai wa shangun ai lam hte seng ai mungga rai nga ai. Karai Kasang gaw masha a yubak mara ni hpe n matsing da ya ai hta n ga, shanhte hpe shi a jinghku ni tai wa hkra gara hku galaw sai lam tsun gawn dan ai mungga anhte hpe jaw da mani ai.

²⁰Dai rai nna anhte gaw Hkristu a lam htinglet ya ai kasa ni tai let, Karai Kasang shi nan anhte a n-gup aga hku nna nanhte hpe lajin nga ai. Nanhte gaw shi hpe hpyen ai ni tai nga ai kaw nna shi a jinghku ni tai wa mu ngu, Hkristu a malai anhte hpyi nem nga ga ai.

²¹Hkristu gaw yubak mara n kap ai wa rai nga ai, rai ti mung anhte gaw Hkristu hte langai sha tai wa nna Karai Kasang a ding hpring ai hpe hkam la na matu, Karai Kasang gaw Hkristu hpe anhte a matu mara anhte zawn yubak lu ai wa shatai wu ai.