Read Jinghpaw Common Language Bible 2009 2 KORINHTU 6 Bible Online

2 KORINHTU 6 - Jinghpaw Common Language Bible 2009 bible

2 KORINHTU 6

¹Nanhte gaw Karai Kasang a chyeju hkam la ai ni rai nga myit dai hte maren dai chyeju hpe lahpawt lama n di kau myit ga, anhte Karai Kasang a shingdep shingtau ni hku nna nanhte hpe hpyi lajin dat ga ai.

²Madat mu, Karai Kasang gaw, “Ngai nanhte hpe chyeju jaw na aten du ai shaloi, nanhte a hpyi nem ai ga hpe ngai madat ya made ai; ngai nanhte hpe hkye hkrang la na ninghtoi du ai shaloi, nanhte hpe ngai karum made ai,” nga nna shi tsun nga ai. Karai Kasang a chyeju hkam la na ya e pyi mai ang ai aten rai nga ai; yu mu, ya e pyi hkye hkrang la ai nhtoi rai nga ai.

³Anhte galaw ai amu hte seng nna kadai wa mung shatan nhkan hte mara tam ai lam n byin shangun mayu ga ai majaw, anhte gaw kade a lam mung ahtu kataw shara hpa n byin hkra shakut ga ai.

⁴Ru yak jam jau lam ni, tsin-yam tsindam ni, yak hkak lam ni hpe myit galu kaba hte hkam sharang nna anhte galaw ai lam shagu hta anhte gaw Karai Kasang a nchyang mayam ni rai nga ga ai lam she madun dan ga ai.

⁵Anhte gaw anu kayat ai, htawng bang ai, shawa masha ni kabring kabrawng re ai hkrum ai, bungli galaw ai hta hkring sa ten n lu nna yup n lu sha ai, lusha n lu sha ai lam ni hkrum ga ai.

⁶Myit masin san seng ai lam, chye chyang ai lam, hkam sharang ai lam, matsan dum lama ai lam hku nna mung, chyoi pra ai wenyi a chyeju lam hte n sawt ai tsaw ra myit hku nna mung,

⁷anhte hkaw tsun ai teng man ai mungga hte Karai Kasang a n-gun atsam hku nna mung, anhte gaw Karai Kasang a shangun nchyang ni rai nga ga ai lam shadan dan saga ai. Anhte gaw wenyi lam hte seng ai majan htim gasat na hte anhte a hkum hpe hkap makawp maga na matu dai teng man ai lam hpe anhte a laknak shatai nna lang ga ai.

⁸Anhte gaw shagrau sha-a ai mung, jahpoi asawng ai mung, shakawn kungdawn ai mung hkrum ga ai. Anhte hpe masu hkalem sha ai masha ni rai ma ai ngu nna shadu ma ai, rai ti mung, anhte gaw teng man ai ga tsun ga ai.

⁹Anhte gaw gade e me n dum n chye ai ni zawn rai ga ti mung kajai gumhkawng ai ni, masha jasi ni zawn rai ga ti mung ya nanhte mu lu ai hte maren, anhte ahkrung nga ga ai. Ari hkrum ga ai rai ti mung, anhte sat kau ai n hkrum ga ai.

¹⁰Yawn hkyen hkrum ga ai rai ti mung, anhte tut nawng e akabu nga ga ai, matsan mayan re ai ni zawn rai ga ti mung, masha law law hpe shalu jasu saga ai. Hpa n lu ai ni zawn rai ga ti mung, anhte kaja wa yawng mayawng hpe madu ai ni rai nga ga ai.

¹¹Korinhtu mare na tsaw ra ai jinghku ni e, anhte gaw nanhte hpe hkrang hkrang sha tsun saga ai; anhte gaw anhte a myit masin chyinghka ni hpe dam lada ai hku nanhte a matu hpaw da saga ai.

¹²Nanhte mahtang she anhte a tsaw ra myit hpe nanhte kaw n du hkra pat da myit dai.

¹³Nanhte a myit masin chyinghka ni hpe hpaw malang da nga mu! Ya ngai nanhte hpe nye a kasha ni hpe zawn tsun shaga nga nngai. Nanhte mung anhte hpe dai hte bung ai hku myit ai lam ni madun htang marit.

¹⁴N kam n sham ai ni hte rau ginrun nna amu bungli hkum jawm gun hpai nga mu, hpa majaw nga yang, rau ginrun nna gun hpai na n mai byin ai. Jaw ai hte shut ai gaw kaning rai nna rau ginrun nga lu na rai ta? Nhtoi hte nsin gaw kaning rai nna rau nga lu a ta?

¹⁵Hkristu hte Satan kaning rai myit mang hkrum lu ma ta? Kam sham ai wa langai mi gaw n kam n sham ai wa langai mi hte kaning rai shabung nna nga lu na rai ta?

¹⁶Karai Kasang a nawku htingnu gaw gawng-ngu sumla ni hte kaning di nna myit hkrum lu na rai ta? Hpa majaw nga yang, anhte gaw ahkrung nga ai Karai Kasang a nawku htingnu ni rai nga ga ai! Karai Kasang shi nan, “Ngai gaw nye a amyu masha ni hta nye a nta shatai nna, shanhte hta shanu nga na nngai; Ngai shanhte a Karai Kasang tai nga na nngai rai nna, shanhte gaw nye a amyu masha ni tai na mara ai,” nga nna tsun ai.

¹⁷Dai rai nna Madu gaw, “Nanhte gaw shanhte hpe tawn kau da lu na hte shanhte kaw na kaga lak nanhte a hkum ni hpe garan jahka kau mu. Awu asin re ai hpe hpa hkum hkra mu, shaloi ngai nanhte hpe hkap la na made ai.

¹⁸Nanhte a Kawa ngai tai na nngai, rai nna nanhte gaw nye a shadang sha ni hte shayi sha ni tai na marin dai, nga nna chyahtum chyalai n-gun atsam rawng ai Madu gaw atsun nga ai.”