Read Jinghpaw Common Language Bible 2009 2 KORINHTU 7 Bible Online

2 KORINHTU 7 - Jinghpaw Common Language Bible 2009 bible

2 KORINHTU 7

¹Tsaw ra ai jinghku ni e, ndai ga sadi ni yawng gaw anhte hpe jaw da ai rai nga ai. Dai re ai majaw anhte gaw hkum hkrang hte wenyi hpe awu asin di kau ai matsat shabat nga manga hta na tinang hkum hpe jasan jaseng kau nhtawm Karai Kasang hpe hkrit hkungga let chyoi pra htum ai hku asak hkrung nga ga.

²Nanhte a myit masin hta anhte a matu shara jaw nna hkap hkalum la mi. Anhte kadai hpe mung n shut n hpyit ga ai; kadai hpe mung n sharun jahten ga ai; kade a ntsa e mung ahkaw ahkang n la ga ai.

³Ngai ning nga tsun ai gaw, ngai nanhte hpe mara shagun jeyang mayu ai majaw n rai; hpa majaw nga yang, shawng de ngai tsun sai hte maren, nanhte hpe anhte grai tsaw ra ai majaw, si ti mung, prawn ti mung, nanhte hte rau galoi mung anga nga ga ai.

⁴Ngai gaw nanhte hpe nachying kam kaba nga nngai; nanhte a matu mara ngai grai gumrawng nga nngai! Yak hkak tsin-yam tsindam amyu myu hkrum hkra rai ti mung, ngai hta nden marai hpring tsup nga ai hta n-ga, ngai hta kabu gara ai lam mung hpring kabrat nga li ai.

⁵Makedoni mung de anhte du sa ai shaloi pyi gaw anhte hta sim sa ai lam n lu la ga ai. Shara shagu hta ru yak tsin-yam tsindam ni, kaga masha ni hte ga li ga law ai lam ni nga nga ai. Anhte a myit kata hta mung hkrit tsang ai lam ni amyu myu hkrum ga ai.

⁶Rai ti mung myit kaji garen nga ai ni hpe karum n-gun jaw ai Karai Kasang gaw, anhte hpang de du sa wa ai Titu hku nna anhte hpe myit n-gun lu la shangun mi ai.

⁷Titu du sa ai majaw sha n rai, shi hpe nanhte gara hku hkap n-gun jaw la ai lam shana dan mi ai majaw mung, anhte myit pyaw ai lam hkam la lu ga ai. Dai hta n ga, nanhte gaw ngai hte mu hkrum na matu gade marit nga ai lam, nanhte gade yawn madai nga ai lam, ngai hpe makawp maga la na matu gade shajin da sai lam anhte hpe tsun dan mi ai majaw mung, ngai ya grau na pyi kabu gara myit pyaw nga nngai.

⁸Lama rai nna nye a shagun dat ai laika hte nanhte hpe myit yawn shangun yang pyi gaw dai laika ka hkrup ai hpe ngai n shut dum nngai. Rai ti mung dai laika gaw tawng marang mi nanhte hpe shayawn nga ai lam hpe ngai dum nna yawn ai lam gaw nga lai wa sai.

⁹Rai ti mung ya chyawm gaw ngai kabu nga nngai-dai gaw ngai nanhte hpe yawn shangun ai majaw n rai, nanhte a myit yawn ai lam gaw, nanhte hpe shawng de na asak hkrung ai lam ni kaw na myit malai lu galai shai shangun sai majaw, rai nga ai. Karai Kasang gaw dai myit yawn ai lam hpe jai lang nga ai rai nna, anhte gaw nanhte hpe machyi hkrum shangun ai lam hpa mung n shabyin saga ai.

¹⁰Hpa majaw nga yang, Karai Kasang jai lang ai yawn hkyen ai lam gaw hkye hkrang la hkrum shangun nga ai. De a majaw myit n pyaw shara n nga ai! Rai ti mung myit malai n lu ai sha shinggyim lai hku yawn hkyen ai lam gaw si hkrung si htan lam hpe shabyin nga ai.

¹¹Nanhte a myit yawn hkyen ai hpe Karai Kasang gara hku jai lang ai lam hpe yu yu mu: dai gaw nanhte hpe gade myit rawt sharawng awng shangun ai, nanhte hta mara n kap ai lam madun dan na myit gade katu shangun ai, kaja ai lam shabyin mayu ai majaw grai myit rawt nna masin pawt ai hte myit kajawng kahpra mat ai, myit hta hkam sha nga ai lam ni, nanhte a kam sham maju jung ai lam, mara lu ai wa hpe ari jaw na matu jin jin rai nga ai lam ni gaw lam shagu hta nanhte mara n lu ai, ngu ai hpe madun dan nga manit dai.

¹²Dai rai nna, ngai dai laika hpe ka dat hkra rai ti mung, shut hpyit ai wa a majaw mung n rai, shut hpyit hkam ai wa a majaw mung n rai, Karai Kasang a man e nanhte anhte hpe kaja wa gade daram tsaw ra myit dum marit nga myit dai hpe shadan shaleng chye shangun mayu ai majaw ka dat ai rai nga ai.

¹³Shing rai dan leng wa sai majaw, anhte grai myit n-gun lu la ga ai. Anhte gaw myit n-gun lu la ga ai hta n ga, grai kabu gara ga ai. Hpa majaw nga yang, nanhte yawng gaw Titu hpe kabu shangun myit dai rai nna, shi a kabu gara ai hpe anhte mu lu ai majaw rai nga ai.

¹⁴Ngai gaw Titu hpe nanhte a lam gumrawng dan ni ai. Shing rai gumrawng dan ai hte maren teng man nga ai lam nanhte madun dan manit dai majaw ngai hpe myit daw shangun myit dai n rai. Anhte gaw nanhte hpe galoi mung teng man ai lam hpe sha tsun ga ai hte maren, Titu hpe nanhte a lam gumrawng dan ai lam mung teng nga ai hpe chye lu sai.

¹⁵Shi a sharin shaga ai lam ni hpe nanhte madat mara na matu jin nga myit dai hpe mung, hkrit gari ai hte shi hpe nanhte hkap tau hkalum la myit dai hpe mung, shi myit dum nga ma ai majaw, nanhte hpe tsaw ra ai shi a shawang myit gaw grau nna galu kaba n-gun ja wa nga lu ai.

¹⁶Ngai gaw nanhte a ntsa e lam shagu hta tsep kawp kam da lu sai majaw, ngai grai kabu gara nga ni ai.