Read Jinghpaw Common Language Bible 2009 2 KORINHTU 9 Bible Online

2 KORINHTU 9 - Jinghpaw Common Language Bible 2009 bible

2 KORINHTU 9

¹Yuda mung na Karai Kasang a masha ni hpang de shagun dat ai karum madi shadaw ai lam hte seng nna, nanhte hpang de ngai ka dat shara n nga ai.

²Nanhte karum madi shadaw mayu ai shawang myit rawng nga myit dai hpe ngai chye nngai. Dai rai nna nanhte a lam Makedoni mung masha ni hpe gumrawng dan dat ni ai. “Ahkaia mung na hpu nau ni gaw maning kaw nna pyi karum na matu lajang shajin da nga masai,” ngu nna Makedoni ni hpe ngai tsun mase ai. Nanhte a myit sharawng awng ai a majaw shanhte malawng maga a myit hpe jasu sharawt ya nga ai.

³Ndai lam hte seng nna nanhte hta anhte a gumrawng ai lam gaw, ga kaman n tai mat u ga, ndai hpu nau ni hpe nanhte hpang de shangun dat nngai. Dai re ai majaw ngai tsun sai hte maren, nanhte a shawang alu hpe jin jin lajang da na rai myit dai.

⁴Dai n rai yang, Makedoni masha nkau mi ngai hte rau hkan nang sa nna nanhte n jin nga mala ai hpe mu hkrup ma yang, nanhte chyu sha kaya hkrum na n rai, anhte mung nanhte hpe grai myit kam tawn da sai hte maren, gade sha kaya hkrum na rai nga a hka!

⁵Dai re ai majaw, nanhte shawang kumhpa ga sadi jaw da sai hte maren, dai hpe hkyen lajang shajin da na matu ndai hpu nau ni hpe nanhte hpang de nye a shawng e tau hkrau shangun dat ra nga ai ngu nna ngai myit nngai. Ngai du sa ai shaloi alu shajin shangut da chyalu rai nna nanhte a jaw ya ai gaw jaw ra ai lit shaprai ai hku n re ai sha jaw mayu ai shawang myit hte jaw ya ai re ai lam madun dan lu na rai nga ai.

⁶Nli loi sha mi gat ai wa gaw nsi naisi loi sha mi dan la lu na ra ai, nli law law gat ai wa gaw law law shu la lu na ra ai hpe nanhte myit dum sadi nga mu.

⁷Lahpawt ai myit hte mung n rai, jaw ra ai lit a majaw sha mung n re ai sha, langai hte langai gaw tinang a kraw lawang e myit da ai hte maren jaw u ga; hpa majaw nga yang, Karai Kasang gaw kabu gara ai myit hte jaw ya ai wa hpe tsaw ra nga ai.

⁸Karai Kasang gaw nanhte a ra kadawn ai hta jan hkra jaw lu nga ai. Shing rai nanhte tinang a matu ra ai lam magup lu la na rai nga ai hta kaga mai kaja ai magam bungli shagu a matu ra ai hta jan hkra lu la na rai myit dai.

⁹Chyum laika hta mung, “Shi gaw ra kadawn nga ai matsan mayan ni hpe n daw n hta gam jaw ya ai rai nna, shi a matsan dum lama ai myit gaw htani htana agrin nga ai,” nga nna tsun nga ai.

¹⁰Nli gat ai wa hpe nli jaw nna malu masha shabyin ya nga ai Karai Kasang gaw nanhte hta ra ai nli law hkra hpe mung, jaw ya ai hta n ga, dai nli hpe kaba wa shangun nna nsi naisi law law si wa shangun nga ai. Dai gaw nanhte a ndaw nhta jaw ya ai shawang myit hta na nsi naisi hpe ngu ai rai nga ai.

¹¹Nanhte a lata hku nna shanhte hkap la lu ai nanhte jaw ya ai alu kumhpa ni a majaw masha law law wa Karai Kasang a chyeju hpe shakawn na mara ai. Nanhte aten shagu shawang kumhpa ndaw nhta jaw ya lu hkra Madu gaw nanhte hpe galoi mung sut su shangun na ra ai.

¹²Hpa majaw nga yang ndai nanhte galaw ai daw jau ai amu gaw, Karai Kasang a masha ni a ra kadawn nga ai hpe shatup ya lu ai hta n ga, Karai Kasang a chyeju dum shakawn ai nsen hpring kabrat wa nga ai.

¹³Ndai nanhte a galaw daw ai amu a awng dang ai kasi kaja a majaw, masha law law gaw, nanhte Hkristu a kabu gara shiga hpe kangka sadi dung ai hku hkap la kam sham myit dai majaw mung, nanhte a shawang myit hte shanhte hte kaga masha ni hpe ndaw nhta alu jaw ya myit dai majaw mung, Karai Kasang a hpung shingkang hpe shagrau sha-a na mara ai.

¹⁴Nanhte gaw nachying laklai ai Karai Kasang a chyeju hpe hkam sha lu manit dai majaw, shanhte gaw nanhte hpe grai tsaw ra ai myit hte nanhte a matu akyu hpyi ya na mara ra ai.

¹⁵Manu sawn n dang lu ai Karai Kasang a chyeju kumhpaw kumhpa a majaw shi hpe chyeju shakawn nga ga law!