Read Jinghpaw Common Language Bible 2009 GALATI 1 Bible Online

GALATI 1 - Jinghpaw Common Language Bible 2009 bible

GALATI 1

¹Masha a ahkang hte kasa aya hta dang da hkrum ai wa mung n rai; masha e san da ai kasa mung n rai, Yesu Hkristu hte si mat ai ni kaw nna shi hpe hkrung sharawt la ai Kawa Karai Kasang a ahkaw ahkang hte kasa rai nga ai ngai Pawlu gaw,

²nang e ngai hte rau rai nga ai hpu nau ni yawng hte Galati mung na hpung ni hpang de laika ka nna shakram dat ga ai.

³Anhte a Wa Karai Kasang hte Madu Yesu Hkristu kaw na chyeju hte ngwi pyaw ai gaw, nanhte hte anga nga malit ga law.

⁴Ndai ya na n hkru n kaja ai prat kaw na mawai la u ga, anhte a Kawa Karai Kasang myit ra ai hte maren madat mara let anhte a yubak mara a matu mara Hkristu gaw shi hkum hpe nan ap ya kau nu ai.

⁵Dai Kawa Karai Kasang kaw htani htana prat dingsa e hpung shingkang anga nga u ga law, Amen.

⁶Hkristu a chyeju hta nanhte hpe shaga la ai wa kaw na nde wa lawan ai hku hka wa nna, Kabu Gara Shiga kaga amyu ni hkap la nga myit dai majaw nanhte hpe mau nga nngai.

⁷Kaja wa nga yang Kabu Gara Shiga kaga mi n nga sai; rai ti mung ndai ya ngai tsun nga ai gaw, Hkristu a Kabu Gara Shiga hpe galai jashai shabyak kau na matu shakut nga ai masha nkau mi nanhte hpe myit ung ang mat hkra sharu shatsang nga ma`ai majaw tsun ai re.

⁸Rai ti mung, nanhte hpe anhte hkaw tsun dan sai Kabu Gara Shiga hte shai ai kaga Kabu Gara Shiga hpe anhte shing n rai, Sumsing lamu na lamu kasa langai mi nanhte hpe hkaw tsun dan a yang gaw, shi gaw ngarai hte ging dan ai dagam dala hkrum u ga.

⁹Nanhte hkap la da sai dai Kabu Gara Shiga hte shai ai kaga Kabu Gara Shiga langai mi hpe masha langai ngai nanhte hpe hkaw tsun dan a yang gaw shi dagam dala hkrum u ga, ngu nna shawng e anhte tsun yu saga ai hte maren, ya e ngai bai naw tsun nga nngai.

¹⁰Hpa majaw nga yang, ngai ning nga tsun ai gaw, masha a tau madi shadaw ai hpe lu la na matu shakut nga nngai kun? Dai hku n rai law! Ngai ra sharawng ai lam gaw Karai Kasang a myit hkrum ra sharawng ai lam sha rai nga ai. Ngai gaw masha a man e kajai gumhkawng hkra shakut nga a ni? ngai gaw masha a ra ai lam naw tam shakut nga a yang gaw, Hkristu a ali ama ngai rai na nngai n rai.

¹¹Hpu nau ni e, nanhte hpe ngai hkaw tsun dan yu ai Kabu Gara Shiga gaw, masha e gyin shalat ai lam n rai nga ai lam, nanhte hpe ngai shadum shahprang made ai.

¹²Hpa majaw nga yang, masha kadai kaw na mung ngai dai Kabu Gara Shiga hpe hkam la nngai n rai; Yesu Hkristu shi nan shingran ga hku nna ngai hpe shadan dan ni ai.

¹³Ngai gaw Yuda nawku htung hta naw nga ai shaloi e, ngai kaning rai hkan sa galaw lai wa sai lam nanhte na yu manit dai. Ngai gaw Karai Kasang a hpung hpe matsan dum ai myit n rawng ai sha nachying ladu lai hkra zingri zingrat ai hte jahten shamyit kau na atsam htum hkra shakut lai wa ni ai.

¹⁴Yuda nawku htung hpe ta tut hkan sa ai lam hta ngai gaw nye a amyu na rau ram manang ni law law hta jan nna myit lawm ai hte ji wa ni a matsun maroi ni hpe hkan sa shadik lai wa ni ai.

¹⁵Rai ti mung nye nu a hkritung nna ngai garai n shangai yang Karai Kasang gaw shi a chyeju hte ngai hpe lata la nna shi hpe daw jau na matu shaga la ni ai.

¹⁶Dai hpang maigan masha ni hpe shi a kasha a lam Kabu Gara Shiga hkaw tsun dan lu u ga matu shi a kasha hpe ngai e shadan dan ni ai. Dai shaloi e ngai gaw kade a hpaji jaw ai lam hpe mung n hpyi n hkam la nngai.

¹⁷Dai hta kaga nye a shawng e kasa tai nga ai ni hte sa hkrum na ngai Yerusalem de n lung wa ai sha Arabia mung de kalang ta sa mat wa nhtawm Damasku mare de bai wa nngai.

¹⁸Dai hpang masum ning lai yang she, Kehpa ngu ai Petru hte hkrum nna shi kaw na shiga lu la na matu Yerusalem mare de lung wa nna shi hte shi manga ya tup rau nga kau da nngai.

¹⁹Dai Madu a kanau Yaku hta kaga kasa gale kadai hpe mung ngai n mu nngai.

²⁰Ya ngai ka dat ai lam gaw teng ai lam rai nga ai; ngai masu magaw ga n tsun nga ai hpe Karai Kasang chye nga ai!

²¹Dai hpang e Suri mung hte Kiliki ginwang hkan e ngai sa du nngai.

²²Dai aten hta Yuda mung na Hkristan hpung ni hta na hpung masha ni gaw ngai hte myi man chyaw n chye n chyap shi ma ai.

²³Rai ti mung shanhte gaw, “Shawng e anhte hpe zingri zingrat yu ai masha wa gaw shawng e tinang nan akrin atsai di shamyit jahten kau na matu shakut lai wa sai makam masham a lam hpe ya e hkaw tsun nga ai da!,” nga nna masha kaga ni tsun kajai ai hpe sha na ga ma ai.

²⁴Dai majaw shanhte gaw nye a lam ninghkan e Karai Kasang a hpung shingkang hpe shakawn kungdawn nga ma ai.