Read Jinghpaw Common Language Bible 2009 GALATI 3 Bible Online

GALATI 3 - Jinghpaw Common Language Bible 2009 bible

GALATI 3

¹Angawk angak re ai Galati masha ni e, wudang hta e Yesu Hkristu si hkam ai lam hpe nanhte a myiman e pra pra mu lu hkra, ngai tsun sanglang dan sai mi, nanhte hpe kade e hkalem la kau myit ta?

²Dai Wenyi hpe nanhte lu la ai gaw jep ai Tara hpe hkan sa shadik ai magam bungli a majaw rai kun? Dai lam langai sha nanhte a n-gup na ngai chye la mayu nngai.

³Nanhte kaning rai nna wa ndai hte wa angawk si bu nga myit ta? Nanhte gaw dai wenyi hta kam hpa nna npawt hpang wa nhtawm me, ya gaw nanhte a hkum shan n-gun atsam marai hta kam hpa nna shangut mayu nga myit ni?

⁴Nanhte nan mu hkrum hkam sha lai wa sai ning san ai nni nkri hpe nanhte kaman sha hkam kau manu ni? Kaja wa dai mahkrum madup gaw nanhte a matu kaman n mai rai mat nga ai.

⁵Karai Kasang gaw nanhte hpe dai wenyi nanhte a ntsa e shayu ya nna mauhpa lamik kumla ni hpe madun dan ai gaw dai jep ai Tara hpe hkan shadik ai majaw rai ni? Shing n rai, dai Kabu Gara Shiga hpe nanhte na la nna kam sham ai majaw shabyin ya ai rai ni?

⁶Abraham a mahkrum madup lam hpe myit yu ga, Chyum laika hta, “Abraham gaw Karai Kasang hpe kam sham wu ai rai nna, Karai Kasang gaw shi hpe ding hpring ai wa ngu nna hkap la wu ai,” nga nna tsun da ai.

⁷Dai re ai majaw Karai Kasang hpe kam sham ai ni gaw Karai Kasang a kashu kasha ni majing rai nga ma ai hpe nanhte chye nga mu.

⁸Dai Chyum laika mung, “Karai Kasang gaw makam masham hte sha maigan masha ni hpe ding hpring shangun na maru ai,” nga nna tau tsun da sai. Dai rai nna Chyum Laika gaw, “Amyu baw shagu gaw na gawp e gumring gumrat hkrum na mara ai,” nga nna Abraham hpe dai Kabu Gara Shiga shana ya mu ai.

⁹Dai rai nna Abraham gaw Karai Kasang hpe kam sham ai majaw shaman chyeju hkam la lu ai hte maren kam sham ai ni yawng mung gumring gumrat ai shaman chyeju hkam la lu ma ai.

¹⁰Dai jep ai tara hkan sa shadik ai lam hpe kam hpa nga ai ni kadai rai ti mung dagam dala a npu e rai nga ma ai. Hpa majaw nga yang, Chyum Laika gaw, “Dai tara hta ka da mada hte maren n hkan shatup nga ai wa kadai rai ti mung, dagam dala hkrum na mara ai,” nga nna ka da nga ai.

¹¹Chyum Laika hta, “Karai Kasang hpe kam sham ai hte ding hpring ai wa re ngu nna sawn ya hkrum ai wa gaw asak hkrung nga na ra ai,” nga nna ka da nga ai majaw, dai jep ai Tara hpe hkan sa shatup ai hte Karai Kasang a man e, kadai mung ding hpring lu na n re ai gaw, dan dan leng leng rai nga ai.

¹²Rai ti mung Chyum Laika hta, “Jep ai Tara hta tsun da mada hte hpe hkan shatup ai wa gaw asak hkrung nga lu na ra ai,” nga nna tsun ai majaw jep ai tara gaw makam masham hte hpa n seng nga ai.

¹³“Hpun hta e jen da hkrum ai wa kadai rai ti mung Karai Kasang a dagam dala hkrum ai wa rai nga ai,” nga nna Chyum laika hta tsun da nga ai hte maren, Hkristu gaw anhte a matu mara dagam dala hkrum ai wa tai wa ai a jaw e jep ai Tara a dagam dala hkrum ai kaw na anhte hpe hkrang shaw la mi ai.

¹⁴Ning rai Yesu galaw ai lam gaw Abraham Karai Kasang kaw na hkam la ai ga ndat hte seng ai gumring gumrat ai shaman chyeju hpe maigan masha ni mung Yesu Hkristu a marang e hkam la lu na hte anhte mung dai makam masham a marang e Karai Kasang ga ndat jaw da ai wenyi hkam la lu na rai nga ga ai.

¹⁵Nye a hpu nau ni e, nanhte shani shagu hkrum kadup nga ai lam ni hta ga shadawn langai mi hpe la nna ngai tsun na; masha lahkawng gaw lam lama mi hta myit hkrum nna ga sadi masat laika ka da ngut ai shaloi, dai hpe kadai mung tawt lai lu ai n rai, shing n rai jat bang lu ai n rai.

¹⁶Ya Karai Kasang gaw shi a ga ndat ni hpe Abraham hte shi a aru arat hpe jaw da mu ai. Chyum laika gaw, “Aru arat law law,” shing n rai masha law law, ngu ai ga hpe n lang ai. “Na a aru arat” ngu ai langai wa hpe sha tsun nga ai rai nna dai gaw Hkristu hpe ngu ai rai nga ai.

¹⁷Dai rai nna, ngai tsun mayu ai gaw ndai hku rai nga ai. Karai Kasang gaw Abraham hte ga ndat tawn da ngut ai hpang dai ga ndat hpe yu lanu lahku na ga sadi tawn da nu ai. Shaning mali tsa e sum shi ning na ai hpang she byin pru wa ai jep ai Tara gaw dai ga shaka hpe n jahten n shaprai kau lu ai hte dai ga ndat hpe mung n dawm kau lu ai.

¹⁸Hpa majaw nga yang, Karai Kasang a chyeju sali wunli gaw dai jep ai Tara hta madung tai nga ai rai yang gaw, dai chyeju sali wunli gaw shi a ga ndat hte hpa n seng mat sai. Rai ti mung Karai Kasang gaw ga ndat a majaw Abraham hpe dai chyeju sali wunli jaw da nu ai.

¹⁹Dai rai yang gaw, jep ai Tara a yaw shada ai lam gaw hpa rai ta? jep ai Tara hpe Karai Kasang jat bang tawn da ya ai lam gaw shut hpyit yubak mara ni a masa lam hpe shapraw dan na matu rai nna dai gaw, ga ndat da ai Abraham a aru arat wa garai n du ai aten laman du hkra sha grin nga na matu rai nga ai. Karai Kasang gaw dai jep ai Tara hpe lamu kasa ni hku nna lapran e htinglet ya ai wa langai mi a lata hte jaw ya sai.

²⁰Rai ti mung Karai Kasang gaw ga ndat jaw ai shaloi, lapran e htinglet ya na masha n lawm ra ai, shi nan ading tawk galaw nu ai; Karai Kasang gaw langai sha rai nga ai.

²¹Dai rai nna jep ai Tara gaw Karai Kasang a ga ndat ni hte nhtan shai nga ai ngu mayu ai rai ni? Gara hku nna mung n rai law! Hpa majaw nga yang kaja wa shinggyim masha ni gaw asak jahkrung ya lu ai jep ai Tara hpe lu la masai rai yang gaw, masha hkum shagu dai tara hpe hkan shatup nna Karai Kasang a man e ding hpring wa lu na sha rai nga ai.

²²Rai ti mung mungkan ga ting gaw dai yubak mara a n-gun atsam e ka-up kau ai hkrum nu ai, nga nna Chyum Laika hta tsun nga ai. Dai rai nna Yesu Hkristu hpe kam sham ai hta npawt nhpang de da ai ga ndat hte seng ai chyeju sali wunli gaw kam sham ai ni hkam la manu ai.

²³Rai ti mung dai makam masham a matu aten garai n du yang makam masham dan dawng wa ai ten du hkra jep ai Tara gaw anhte yawng hpe bawng ni hpe zawn sharen da mi ai.

²⁴Dai rai nna anhte gaw makam masham a marang e ding hpring wa u ga, jep ai tara gaw sharin ai wa hku nna Hkristu du sa ai aten du hkra anhte hpe sharin sara tai ya mani ai.

²⁵Rai ti mung, dai makam masham ya du sai majaw sharin sara a npu e anhte naw rai nga ga ai n rai.

²⁶Hpa majaw nga yang, Hkristu Yesu hta e kam sham nga myit dai majaw, nanhte nlang hte gaw, Karai Kasang a kashu kasha ni rai nga myit dai.

²⁷Nanhte gaw Hkristu hte langai sha tai na matu hkalup hkam la manit dai rai nna Hkristu hpe bu hpun sumraw nga myit dai.

²⁸Dai rai nna nanhte hta shada da ginhka ginrang na lam n nga sa; Yuda amyu masha ni hte Grik masha ngu na mi n nga, mayam hte shanglawt ngu na mi n nga, lasha hte numsha ngu na mi n nga, nanhte yawng mayawng hte gaw Hkristu hta e langai sha rai nga myit dai.

²⁹Ya nanhte gaw Hkristu hte seng ai ni rai nga myit yang gaw, nanhte Abraham a aru arat ni rai nga myit dai hte, dai ga ndat nga ai hte maren Karai Kasang kaw na sali wunli hkam la lu na ni rai myit dai.