Read Jinghpaw Common Language Bible 2009 GALATI 4 Bible Online

GALATI 4 - Jinghpaw Common Language Bible 2009 bible

GALATI 4

¹Ya matut nna naw tsun na lam nga ai. Kasha wa gaw kawa kaw na sutgan sali wunli nga manga hpe hkam la na wa rai nna, kaja wa hkam la na teng nga ai rai ti mung, shi ma naw rai nga ai ten laman hte hta mayam langai mi zawn di nna tawn da ai hkrum wu ai.

²Kawa e madat da ai ten du hkra shi naw kaji nga ai laman shi hpe bau sin sharin ya ai ni hte shi a ra mara lam ni hpe yu lajang ya ai nta up ai masha ni a npu e shi naw rawng nga ai.

³Dai hte maren anhte mung Wenyi lam hta myit su kung hpan ai masha ni garai n tai ai laman e, mungkan danghta hpe up nga ai Nat minla ni a mayam tai nga ga ai.

⁴Rai ti mung aten ladaw gu jang Karai Kasang gaw shi a kasha hpe shangun dat wu ai; anhte gaw Karai Kasang e kasha yin la ai chyeju hkam la lu u ga,

⁵dai kasha wa gaw jep ai Tara a npu e rai nga ai masha ni hpe hkrang shaw la na matu shinggyim kanu hta shangai wa nna Yuda ni a jep ai Tara npu e prat pra wa sai.

⁶Ya nanhte gaw Karai Kasang a kasha ni rai nga ai hpe sakse madun na matu “Wa e, nye Wa e,” nga nna shaga chye ai shi a kasha a Wenyi hpe anhte a kraw lawang kata de shangun dat nu ai.

⁷Dai rai nna nang gaw mayam n rai; kasha langai mi nan rai nga nit dai. Shi a kasha nan rai nga nit yang gaw, Karai Kasang kaw na shi a kasha ni a matu lajang da ai sali wunli yawng mayawng mung nang hpe jaw na rin dai.

⁸Lai mat wa sai ten hta nanhte gaw Karai Kasang hpe n chye nga myit dai majaw n teng n man ai hpara ni a mayam tai nga myit dai.

⁹Ya chyawm gaw nanhte Karai Kasang hpe chye wa manit dai hta n-ga, Karai Kasang mung nanhte hpe chye nga sayang me, n-gun kya ai hte matsan mayan re ai nat minla ni a hpang de nanhte hpa rai nhtang mat wa mayu myit ta?

¹⁰Nanhte gaw nhtoi, shata, aten ladaw hte shaning nkau mi hpe grai ahkyak shatai nga myit dai.

¹¹Ngai gaw nanhte kaw kaman lila sha shakut kau nga ai nhten? ngu nna nanhte a lam ngai myit tsang nga nngai.

¹²Hpu nau ni e nanhte zawn ngai rai nga nngai majaw, nanhte mung ngai zawn rai nga mu; ngu nna ngai nanhte hpe hpyi nem made ai.

¹³Shawng na lang ngai nanhte hpe dai Kabu Gara Shiga hkaw dan lu ai lam gaw, hkum hkrang machyi hkrum nna hkring nga ai majaw lu hkaw dan ai re ai hpe nanhte dum chye nga myit dai.

¹⁴Nye hkum hkam kaja lam a majaw nanhte a matu dingbai dingna sharu shatsang ai lam byin shangun sai rai ti mung, nanhte ngai hpe n kaw n law n di ai n matsat kau mi ai hta n ga, sumsing lamu de na lamu kasa langai mi hpe zawn, kaja wa Hkristu hpe zawn ngai hpe hkap hkalum la mi ai.

¹⁵Dai aten hta nanhte grai kabu pyaw lu manit dai! Ya hpa byin manit ta? Dai aten hta nanhte gaw byin mai yang tinang a myi hpe pyi malawk la nna ngai hpe jaw na pyi gwi myit dai hpe ngai sakse hkam nngai.

¹⁶Ya chyawm gaw nanhte hpe dai teng man ai lam tsun dan made ai majaw ngai nanhte a hpyen wa tai wa ni ai kun?

¹⁷Ngai hpe ninghkap ai ni gaw nanhte a ntsa e grai wa myit lawm bu nga ma ai; rai ti mung, teng man mai kaja ai hku yaw shada ai n rai. Shanhte a ra ai lam gaw shanhte a ntsa e nanhte a myit lawm ai lam hkam la lu hkra, nanhte hpe ngai hte jahka kau shangun mayu ai majaw rai nga ai.

¹⁸Teng man ai yaw shada ai hte myit lawm myit tsang ai lam rai yang gaw kaja nga ai. Ngai nanhte hte nga nga yang sha kaja ai lam hpe myit tsang mai na n rai; galoi rai ti mung kaja ai lam hpe myit tsang nga na mai kaja nga ai.

¹⁹Tsaw ra ai kashu kasha ni e, Hkristu a gawng shingyan nanhte hta hkum tsup wa ai aten du hkra, ngai gaw ma shangai ai kanu zawn shinggyim machyi ai hpe nanhte a matu kalang mi bai hkam nga nngai.

²⁰Ya jang nanhte hte rau nga nna, nanhte hpe ga ngwi ga pyaw hte tsun shaga lu na gade myit ndawt nga nngai hka! Ngai nanhte a matu grai myit tsang bu nga nngai.

²¹Jep ai Tara a npu e nga mayu ai ni hpe ngai san yu made ga; nanhte gaw dai jep ai Tara a hkang da ai lam hpe n na yu myit ni?

²²Hpa majaw nga yang, dai Chyum Laika hta ka da nga ai hte maren, Abraham gaw shadang sha lahkawng lu nga ai; langai mi gaw mayam num a kasha rai nna, langai mi gaw numdung num a kasha rai nga ai.

²³Mayam num hte lu ai kasha gaw shawoi na shingra masa hku nna shangai wa ai kasha rai nga ai. Rai ti mung mayam num n re ai jan hte lu ai shi a kasha gaw Karai Kasang a ga ndat hte maren shangai wa sai.

²⁴Ndai lam ni hpe ga shadawn langai mi hku nna chye na mai nga ai. Num lahkawng gaw dai ga shaka lahkawng hte bung nga ai; num langai mi gaw Hagara rai nna shi shangai dat ai kashu kasha ni gaw mayam tai ma ai. Hagara gaw Sina bum kaw jaw ai ga shaka a malai kumla rai nga ai.

²⁵Hagara gaw Arabi mung e nga ai Sina bum a malai tai nga ai. Shi gaw ya mayam tai nga ai Yerusalem mare hte mare masha ni a matu kumla tai ya nga ai.

²⁶Rai ti mung, kaga num wa gaw sumsing lamu na Yerusalem a shadawn sumla rai nga ai. Shi chyawm gaw shanglawt lu ai jan rai nna anhte a kanu mung rai nga mali ai.

²⁷Hpa majaw nga yang, Chyum Laika hta, “Kasha n shangai ai maudung num ni e, kabu gara nga mu! Shinggyim machyi galoi mung n hkrum ga ai num ni e, marawn nna kabu jahtau mu! Hpa majaw nga yang, shagram kau hkrum ai num gaw la lu ai num hta kashu kasha grau nna lu na ra ai.” nga nna ka da nga ai.

²⁸Ya chyawm gaw hpu nau ni e, nanhte gaw Isak zawn shi a ga ndat hte maren lu wa ai Karai Kasang a kashu kasha ni rai nga myit dai.

²⁹Dai aten hta shawoi na shingra masa hku nna shangai wa ai kasha wa gaw Karai Kasang a Wenyi a majaw shangai wa ai kasha hpe zingri zingrat wu ai; ya ten hta mung dai hte maren byin nga ai.

³⁰Rai ti mung Chyum Laika gaw kaning nga tsun a ta? “Ndai mayam num hte shi a kasha hpe gawt shapraw kau u, hpa majaw nga yang, mayam num a kasha gaw mayam num n re ai jan a kasha hte rau kawa a sali kamhtaw hpe madu la lu na n rai,” nga nna tsun nga ai.

³¹Dai rai nna hpu nau ni e, anhte gaw mayam num a kasha ni n rai; mayam num n re ai jan a kashu kasha ni rai nga ga ai.