Read Jinghpaw Common Language Bible 2009 GALATI 5 Bible Online

GALATI 5 - Jinghpaw Common Language Bible 2009 bible

GALATI 5

¹Hkristu gaw anhte hpe mayam kaw nna shalawt dat mi ai rai nna, anhte mayam n rai saga ai. Dai re majaw shanglawt masha ni re ai hku nna tsap nga ga ai. Mayam a kandang npu e bai hkum ahkang nga masa.

²Madat mu! Nanhte matu gadoi hkam myit yang gaw, Hkristu gaw nanhte a matu hpa akyu n nga ai, ngu nna ngai Pawlu nan nanhte hpe tsun dan made ai.

³Dai hta n ga, matu gadoi hkam ai wa gaw jep ai Tara nlang hte hpe shatup shadik lu na ra ai ngu nna, matu gadoi hkam ai masha yawng hpe ngai kalang mi bai sadi jaw nngai.

⁴Jep ai Tara hpe shatup shadik ai hku nna Karai Kasang a man e ding hpring ai hpe lu la na shakut ai ni nanhte gaw Hkristu hte daw hka wa nna Karai Kasang a chyeju hta na hkrat mat wa manit dai.

⁵Anhte chyawm gaw, Karai Kasang a Wenyi a atsam hta kam hpa let kam sham ai a marang e Karai Kasang a man e ding hpring ai ngu nna sawn ya ai ahkaw ahkang hpe lu la na ga ai ngu nna myit mada ala nga ga ai.

⁶Kaning rai nme law, anhte gaw Hkristu Yesu hta e rai nga ga yang gaw, matu gadoi hkam ai n hkam ai ngu ai gaw hpa ahkyak n rai nga ai; ra ahkyak ai lam gaw tsaw ra myit dan dawng hkra amu galaw ai dai makam masham she rai nga ai.

⁷Shawng de nanhte grai ahkyak ai hku galaw sa wa nga manit dai; dai teng man ai lam hpe n madat n mara myit ga, nanhte hpe kadai hkum shadang myit ta? Dai wa gaw nanhte hpe gara hku lau la a ta?

⁸Dai shalen lau la ai lam gaw, nanhte hpe shaga la ai Karai Kasang e shabyin dat ai n rai.

⁹“Muk shadung tawng ting hpe shawawm dat shangun na matu matsi loi mi sha ra ai,” nga ai ga malai hpe myit dum nga mu.

¹⁰Rai ti mung, ngai gaw ya du hkra nanhte hpe myit kam ding yang naw rai nga nngai. Ngai hte nanhte gaw dai Madu hta langai sha rai nga ga ai majaw, nanhte gaw nhtan shai ai masa hpe n hkap la na myit dai ngu nna ngai myit kam nga nngai. Nanhte hpe myit ung ang hkra sharu shatsang ai kadai hpe rai ti mung, Karai Kasang e jeyang ari jaw na ra ai.

¹¹Rai ti mung hpu nau ni e, matu gadoi hkam ai lam ra ahkyak ai nga nna ngai naw matut hkaw nga ai teng yang gaw, hpa majaw zingri zingrat ai ngai naw hkrum nga nngai kun? Shing rai hkaw tsun ai ngu ai lama teng ai rai yang gaw, Hkristu hte seng ai mung sumtu hpe ngai hkaw tsun ai majaw ru yak kyin dut hkrum na nngai n rai.

¹²Nanhte hpe myit shalaw ung ang shangun ai masha ni gaw, matu gadoi hkam ai sha n ga tinang dai mawn la kau yang grau mai na tai nga ai!

¹³Nanhte chyawm gaw hpu nau ni e, shanglawt ahkang lu la myit ga, nanhte hpe shaga la ai hkrum manit dai, rai ti mung dai shanglawt ahkang hpe jahpai nna hkum shan a ra marit ai lam tam na matu ginshan hkum shatai mu; shing rai na malai, nanhte gaw tsaw ra myit hte shada da daw jau hkat nga mu.

¹⁴Hpa majaw nga yang, “Na a htingbu wa hpe na a hkum hte maren tsaw ra u,” nga ai hkang da ai ga langai mi hpe hkan shatup ai hte jep ai Tara ting hpe shadik lu ai lam tai sai.

¹⁵Rai ti mung zai ai dusat matse ni zawn nanhte shada da kawa sha hkat nga myit yang gaw, nanhte shada da shamyit kau hkat ai lam tai na re ai majaw, sadi nga mu.

¹⁶Da ndai ngai tsun nngai gaw, “Nanhte gaw Wenyi e matsun ai hte maren hkan sa galaw nga mu, hkum shan a marin marit ai hpe nanhte hkum shadik nga myit.

¹⁷Hpa majaw nga yang, hkum shan a marin ai lam gaw, Wenyi a ra ai lam hte nhtan shai nga ai, Wenyi a ra ai lam mung hkum shan a marin ai lam hte nhtan shai nga ai. Hkum shan a marin ai lam hte Wenyi a ra ai lam ndai yan lahkawng gaw hpyen rai nga ma ai. Dai rai nna nanhte gaw tinang galaw mayu ai hte maren n galaw lu myit dai.

¹⁸Dai Wenyi e nanhte hpe woi awn myit yang gaw, nanhte dai jep ai Tara a npu e rai nga myit dai n rai.

¹⁹Hkum shan a bungli gaw dan dan leng leng rai nga ai rai nna dai ni gaw, hpye ai amu, n san n seng ai amu, ngang kayut ai;

²⁰gawkngu sumla naw ai lam, mandan lakle amu, hpyi lamum hpaji, n dawng n yawt ai hte, ga li ga law ai, manawn masham ai, pawt sindawng ai, shai wa bra wa ai lam, daw hka wa ai lam, hpung garan wa ai lam,

²¹n su n nawn ai, chyaru nang ai lam, sawse lawklek ai hte dai hte bung ai lam ni rai nga ma ai; shing rai galaw ai ni gaw Karai Kasang a Mungdan a sali wunli hkam la na n rai, shawng e tsun dan sai hte maren, ya mung nanhte hpe tsun madun nga nngai.

²²Rai ti mung dai Wenyi a asi chyawm gaw, tsaw ra ai, kabu gara ai, ngwi pyaw ai, myit galu kaba ai, matsan dum ai, mai kaja ai,

²³shagrit shanem ai, hte tinang a myit hpe hkang lu ai lam ni rai nga ai. Dai lam hte hpe hkum lu na tara mi n nga ai.

²⁴Hkristu Yesu hte seng ai ni chyawm gaw tinang a hkum shan myit hpe mung, myit kayut ai hte marin marit ai hte nawng wudang hta jen sat kau manu ai.

²⁵Anhte Wenyi hta asak hkrung nga ga yang gaw, dai Wenyi e woi awn lam matsun madun ai hte maren hkawm sa nga ga.

²⁶Anhte gaw kaman lila grang gumrawng nna shada da jahte tam ai hte shada manawn masham hkum rai nga ga.