Read Jinghpaw Common Language Bible 2009 GALATI 6 Bible Online

GALATI 6 - Jinghpaw Common Language Bible 2009 bible

GALATI 6

¹Hpu nau ni e, masha langai ngai n dum shami e yubak galaw hkrup a yang gaw Wenyi e lam madun ai hku asak hkrung nga ai ni nanhte gaw, shing re ai wa hpe sumnung shingdi ai myit hte shading sharai ya na rai myit dai. Nanhte nan mung agung alau n hkrum u ga, tinang dai sadi nga mu.

²Nanhte shada da a lit ni hpe gun hpai shingtau ai hte Hkristu a tara hpe shatup nga mu.

³Masha langai ngai gaw ahkyak ai masha kaja garai n tai yang ahkyak ai masha rai ni ai nga nna tinang hkum hpe rai dum ai wa gaw, tinang a hkum hpe hkalem kau da wu ai.

⁴Masha langai hte langai gaw tinang a bungli hpe dinglik yu u ga, tinang a bungli kaja nga ai rai yang dai hpe kaga langai ngai a bungli hte shadawn yu shara n nga ai sha, shi galaw ai bungli hta myit dik gumrawng shara rai na ra ai.

⁵Hpa majaw nga yang, langai hte langai gaw tinang a lit gun hpai shajang na rai nga ai.

⁶Dai Hkristu a mungga hpe sharin achyin hkam la ai wa gaw, sharin achyin ya ai sara wa hpe tinang lu mai ai kaja ai ja gumhpraw arung arai yawng hte karum madi shadaw nga u ga.

⁷Nanhte gaw tinang hkum hpe hkalem nna lam hkum dam myit; Karai Kasang hpe kadai mung n sawn n sang di lu na n rai. Masha gaw tinang gat hkai ai hte maren dan la na ra ai.

⁸Masha a hkum shan ngu ai ga hta gat hkai ai wa gaw si ai ngu ai hten byak ai nsi naisi hpe dan la na ra ai; Wenyi ngu ai ga hta gat hkai ai wa gaw htani htana asak ngu ai nsi naisi dan la na ra ai.

⁹Dai rai nna kaja ai amu galaw na anhte n hki n sang nga ga; hpa majaw nga yang, anhte myit n yaw, myit n daw ga yang gaw, aten ladaw du jang anhte dan la na raga ai.

¹⁰Dai re ai majaw anhte gaw aten ladaw naw nga pra nna ahkaw ahkang lu shagu masha nlang hte a matu mai kaja ai amu galaw nga ga, rai ti mung makam masham a dinghku na ni hpe grau nna galaw nga ga.

¹¹Kade wa kaba ai laika hkum hte ngai nanhte hpang de nye a lata hte ka da nngai gaw yu yu mu.

¹²Matu gadoi hkam la na matu nanhte hpe adip arip di nna shangun ai masha ni gaw, shinggan masat maka kumla ni a matu arawng mala madun sha ai ni rai ma ai. Rai ti mung shanhte shing rai galaw ai lam gaw Hkristu a wudang a majaw zingri zingrat ai hkrum na hpe tsang ai majaw rai nga ai.

¹³Hpa majaw nga yang, matu gadoi hkam ai ni nan dai jep ai tara hpe shatup ma ai n rai, rai ti mung shanhte gaw, nanhte matu gadoi hkam la ma ai a jaw e, gumrawng gumtawng mayu ai majaw nanhte hpe matu gadoi hkam la shangun mayu ai lam rai nga ai.

¹⁴Ngai chyawm gaw, anhte a Madu Yesu Hkristu a wudang hta kaga hpa lam hta mung arawng mala gumrawng na nngai n rai, hpa majaw nga yang, shi wudang hta jen sat hkrum ai a majaw, mungkan ga gaw nye a matu jasi tai mat nna, ngai mung mungkan ga a matu jasi tai mat ni ai.

¹⁵Marai langai ngai gaw matu gadoi hkam ai lam rai ti mung, n hkam ai lam rai ti mung ahkyak madung n rai; ningnan hpan da hkrum ai wa tai na she ahkyak madung rai nga ai.

¹⁶Ndai arawn alai hkrang tara hpe tinang a asak hkrung lam hta hkan sa ai ni yawng a ntsa e mung, Karai Kasang a amyu masha ni a ntsa e mung, ngwi pyaw ai hte matsan dum ai gaw anga nga u ga law!

¹⁷Ya kaw nna kadai mung ngai hpe hkum sharu shatsang manu ga, hpa majaw nga yang nye a hkum hta kap ai nma hkang ni gaw ngai Hkristu a mayam re ai lam sakse hkam nga ma ai.

¹⁸Nye a hpu nau ni e, anhte a Madu Yesu Hkristu a chyeju gaw nanhte a Wenyi hte rau anga nga u ga law. Amen.