Read Jinghpaw Common Language Bible 2009 EHPESU 1 Bible Online

EHPESU 1 - Jinghpaw Common Language Bible 2009 bible

EHPESU 1

¹Karai Kasang a myit ra ai hku hte maren, Hkristu Yesu a kasa aya hta san da hkrum ai ngai Pawlu kaw nna Ehpesu mare hta e nga ai Hkristu hte langai sha rai nga ai asak hkrung lam hta kangka sadi dung ai Karai Kasang a masha ni hpang de ga shana dat nngai.

²Anhte a Wa Karai Kasang hte Madu Yesu Hkristu gaw nanhte hpe chyeju hte ngwi pyaw ai lam jaw ya myit ga law.

³Anhte a Madu Yesu a Kawa rai nga ai Karai Kasang hpe chyeju dum shakawn ga law! Hpa majaw nga yang anhte Hkristu hte langai sha tai lu ai a marang e shi gaw sumsing lamu lahta tang hta e wenyi hte seng ai shaman chyeju lam shagu hpe jaw ya nga mani ai.

⁴Anhte gaw tsaw ra ai myit hte shi a man e chyoi pra nna mara n rawng ai ni tai wa u ga, anhte Hkristu hte langai sha tai ai a marang e mungkan ga garai n lat kaw nna pyi Karai Kasang gaw anhte hpe lata la mani ai.

⁵Shi gaw shi a tsaw ra myit a majaw Hkristu a marang e anhte hpe shi a kasha ni ngu nna yin la na matu myit daw dan da nu ai. Dai gaw shi a ra sharawng ai hte shatawng shada ai lam rai nga lu ai.

⁶Shi a tsaw ra ai kasha a marang e manu jahpu n hpyi ai sha anhte hpe jaw ai hpung shingkang rawng ai shi a chyeju a majaw Karai Kasang hpe shakawn kungdawn ga law!

⁷Hpa majaw nga yang, Hkristu a si hkam ai lam a majaw, anhte shalawt dat ai hkrum ga ai; dai gaw nanhte a yubak mara ni hpe raw dat kau ya ai lam rai nga ai.

⁸Anhte hpe nde wa n daw n hta jaw ya ai Karai Kasang a chyeju gaw kade wa kaba la nga a hka!

⁹Shi a hpaji byeng-ya hte mung, tau chye lu ai myit yawng hte mung, Karai Kasang gaw shi a shatawng da ai lam hpe galaw nu ai rai nna Hkristu a marang e shadik shatup na matu daw dan da sai, yaw shada da sai shi a makoi magap da ai galaw hkyen ai lam hpe shadan dan mani ai.

¹⁰Aten ladaw gu jang Karai Kasang e jahkum shatsup na ra ai dai yaw lajang da ai lam gaw, sumsing lamu lahta tang hte ginding aga ntsa na hpan da ai arai yawng mayawng hte hpe Hkristu hpe baw shatai nna shabawn gumhpawn da na lam rai nga ai.

¹¹Yawng mayawng hte chyawm gaw, Karai Kasang a yaw shada da ai lam hte myit daw dan da sai hku hte maren byin wa sai; bai nna shi a shawng npawt kaw nna daw dan sai lam hta npawt shatai nhtawm Hkristu hta langai sha rai nga ga ai a marang e shi a shatawng shada ai hku nna anhte hpe shi a amyu masha ni tai na matu lata san da mani ai.

¹²Dai rai yang gaw nanhte Hkristu hta shawng nnan myit mada ai lam lu la sai ni gaw Karai Kasang a hpung shingkang hpe shakawn kungdawn nga ga law.

¹³Nanhte hpe hkye hkrang la ai lam jaw ya ai dai teng man ai mungga ngu ai Kabu Gara Shiga hpe nanhte maigan masha ni na la lu ai shaloi e, nanhte mung Karai Kasang a amyu masha ni tai wa manit dai. Hkristu hpe nanhte kam sham myit dai rai nna shi ndat da ai Chyoi Pra ai Wenyi hpe jaw ya ai a marang e shi gaw nanhte a Madu rai nga ai lam dazik dawk da nu ai.

¹⁴Dai Wenyi jaw ya ai lam gaw, Karai Kasang shi a amyu masha ni hpe hkam la shangun na ga ndat tawn da sai sali wunli anhte hkam la lu na ra ai hpe pahkam hkam ya ai lam rai nga ai. Dai gaw Karai Kasang shi a amyu masha ni hpe yubak mara kaw nna tsep kawp shalawt dat na ra ai lam anhte hpe myit mu myit hkut shangun nga ai. Anhte gaw shi a hpung shingkang hpe shakawn kungdawn nga ga law.

¹⁵Dai re ai majaw nanhte gaw Madu Yesu hpe kam sham nga myit dai hpe mung, Karai Kasang a masha ni hpe tsaw ra nga myit dai hpe mung ngai na lu ai shaloi kaw nna,

¹⁶ngai gaw nanhte a matu mara Karai Kasang hpe n sim n sa chyeju dum shakawn let nye a akyu hpyi ai hta nanhte hpe adum nga nngai.

¹⁷Nanhte Karai Kasang hpe grau nna chye chyap wa myit ga, anhte a Madu Yesu Hkristu a Karai Kasang ngu ai hpung shingkang rawng ai Karai Kasang gaw hpaji byeng-ya hte tau hkrau mu chye lu ai shingran atsam jaw lu ai Wenyi nanhte hpe jaw ya myit ga, Wa Karai Kasang kaw ngai ahpyi nga nngai.

¹⁸Madu gaw nanhte hpe hpa baw myit mada ai lam hta shaga la sai hpe mung Madu a amyu masha ni hpe ndat da ai mauhpa chyeju sali wunli ni gaw, kade wa n taw n tsang rai nga ai hpe mung,

¹⁹Madu hpe kam sham ai ni hta amu galaw nga ai shi a atsam gaw kade wa galu kaba nga ai hpe mung, nanhte mu chye lu na matu, nanhte a kraw lawang nyan hpaji myit hpaw wa malit ga, ngai hpyi nngai.

²⁰Anhte hta amu galaw nga ai dai n-gun atsam chyawm gaw Hkristu hpe si mat ai kaw na sharawt la nna sumsing lamu e Karai Kasang a hkra maga hta dung nga shangun ai shaloi jai lang ai n- gun chyalai rawng ai atsam nan rai nga ai.

²¹Dai shara e Hkristu gaw, sumsing mungkan hpe up ai ni, ahkang aya lu ai ni, hpung dagu atsam rawng ai ni, Madu ni yawng a ntsa e chyawm tari tai nna up hkang nga ai. Shi a mying ningsang gaw ndai prat a mungkan hte htawm hpang prat a mungkan hta ga shaga ai ahkaw ahkang lu ai mying shingteng mying ni yawng hta grau kaba nga ai.

²²Karai Kasang gaw arai baw sumhpa hpe shi a lagaw npu e tawn da nu ai rai nna dai hpung a matu yawng mayawng a ntsa e baw tai u ga, shi hpe san da nu ai.

²³Dai hpung gaw yawng mayawng hpe jahpring shatsup ya ai wa a hkum tsup ngu ai Hkristu a hkum hkrang rai nga ai.