Read Jinghpaw Common Language Bible 2009 EHPESU 3 Bible Online

EHPESU 3 - Jinghpaw Common Language Bible 2009 bible

EHPESU 3

¹Ndai lam a majaw, Hkristu a bawng dung ai wa ngai Pawlu gaw, nanhte maigan masha ni a matu Karai Kasang kaw akyu hpyi ya nngai.

²Karai Kasang gaw shi a chyeju hte nanhte a mai kaja lam a matu mara ndai amu galaw na ngai hpe ap ya sai lam kaja wa nanhte na yu manit dai rai nga ai.

³Karai Kasang gaw shi a sung htum ai yaw shada ai lam ngai hpe shadan dan ai. (Ndai lam hte seng nna kadun ai hku ka dat yu ni ai.)

⁴Nanhte gaw dai ngai ka dat ai hpe hti yu ai rai yang Hkristu hte seng nna ngai chye na ai sung htum ai lam hpe nanhte sharin la lu na rai myit dai.

⁵Lai wa sai ten hta ndai sung htum ai lam shinggyim masha ni hpe n tsun dan yu ai, rai ti mung Karai Kasang gaw ya e shi a chyoi pra ai kasa ni hte myihtoi ni hpe dai Wenyi hku nna shadan dan mu ai.

⁶Dai sung htum ai lam gaw, Kabu Gara Shiga a marang e maigan masha ni gaw Yuda masha ni hte rau Karai Kasang a shaman chyeju ni hpe hkam la lu ai ahkang lu la lu ai lam rai nga ai. Shanhte hte Yuda masha ni gaw hkum hkrang langai sha hta na daw shan ni rai nna Hkristu Yesu a marang e Karai Kasang jaw ai ga ndat a sali wunli kamhtaw hkam la na ahkang lu la ma ai.

⁷Karai Kasang a atsam amu galaw nga ai hte maren, ngai hpe Karai Kasang jaw ya ai laksan chyeju kumhpa a marang e dai Kabu Gara Shiga a shangun ma ngai hpe shatai ni ai.

⁸Ngai gaw Karai Kasang a masha ni hta kaji dik ai wa hta pyi grit nem ai wa rai nga nngai; rai ti mung, Karai Kasang gaw Hkristu a chyahtum chyalai re ai ngamu ngamai lam hte seng ai dai Kabu Gara Shiga hpe maigan masha ni hpang de la sa na matu mung,

⁹Karai Kasang a makoi magap da ai yaw shada ai lam gara hku byin tai wa na ra ai lam masha yawng hpe mu chye shangun na matu mung Karai Kasang gaw dai ahkaw ahkang ngai hpe jaw ni ai, nga yawng nga pra hpe hpan da ai Karai Kasang gaw shi a sung htum ai lam hpe prat mi hte prat mi kaw nna makoi magap da wu ai.

¹⁰Shing rai galaw ai lam gaw lamu kasa hte seng ai up hkang ai ni hte sumsing mungdan kata na n- gun atsam ni gaw Madu a hpaji byeng-ya amyu myu hpe ya aten hta nawku hpung marang e sharin chye la shangun na matu rai nga ai.

¹¹Karai Kasang gaw shi a htani htana shatawng shada ai lam nga ai hte maren anhte a Madu Yesu a marang e ndai lam hpe shi shabyin nu ai.

¹²Hkristu hte langai sha tai lu ai a marang e mung, shi hta kam sham ai a marang e mung, Karai Kasang a man de sit shang na nden ja ai myit lu la ga ai.

¹³Dai rai nna nanhte a matu mara ngai hkam ai tsin-yam tsindam a majaw nanhte myit n daw n hten myit ga, ngai hpyi nem nga nngai. Dai gaw nanhte a akyu a matu ngai hkam ai rai nga ai.

¹⁴Ndai lam a majaw sumsing lamu hte ginding aga ntsa e nga ai nta dinghku shagu a teng man ai npawt daju rai nga ai

¹⁵Kawa Karai Kasang a man e ngai lahput hput di nna akyu hpyi nngai.

¹⁶Nanhte a kata na hkum ngu ai myit masin n- gun lapyin ja wa u ga, Karai Kasang gaw shi a hpung shingkang hte n taw n tsang re ai sut gan kaw na Wenyi a marang e nanhte hpe n- gun atsam jaw ya u ga, ngu nna mung,

¹⁷makam masham a marang e Hkristu gaw nanhte a myit masin ni hta shi a shanu shara shatai u ga, hte tsaw ra myit hta ru jung npawt gaw da let,

¹⁸Nanhte gaw Hkristu a tsaw ra myit kade dam nna galu ai, kade tsaw nna sung nga ai hpe Karai Kasang a amyu masha ni rau chye na lu na matu, ngai akyu hpyi ya nngai.

¹⁹Rai sa shi a tsaw ra myit hpe gaw, galoi mung tsep kawp chye lu na n rai, rai ti mung, nanhte gaw shi a tsaw ra myit hpe chye chyang wa nna Karai Kasang nan hkum dingnum nanhte hta e shanu nga u ga, ngu nna akyu hpyi nngai.

²⁰Anhte a myit masin hta shi a n- gun atsam hte amu galaw nga ai, anhte hpyi chye ai shing n rai myit yaw shada ai hta pyi grau lai hkra galaw shabyin jaw ya lu ai. Karai Kasang gaw dai hpung a marang e mung,

²¹Hkristu a marang e mung, htani htana hpung shingkang dan hkung nga u ga law. Amen.