Read Jinghpaw Common Language Bible 2009 EHPESU 4 Bible Online

EHPESU 4 - Jinghpaw Common Language Bible 2009 bible

EHPESU 4

¹Dai re ai majaw dai Madu hpe daw jau ai a majaw bawng dung ai wa ngai Pawlu gaw nanhte hpe shi shaga la ai kaw nna Karai Kasang e madat da ya sai sak hkrung lam madung hte maren, sak hkrung hkawm sa na matu ngai nanhte hpe shadut jahkat dat made ai.

²Tut nawng e shagrit shanem nna sumnung shingdi ai hte hkam sharang nga mu. Nanhte a tsaw ra myit hpe madun nna shada da hkam mana nga mu.

³Nanhte hpe shajup shangang da ai ngwi pyaw ai makyit sumri a marang e dai Wenyi e jaw ya ai myit hkrum kahkyin gumdin lam hpe atsam htum hkra kyem mazing da nga mu.

⁴Nanhte hpe Karai Kasang shaga la ai lam hta myit mada shara langai sha de, shaga la manit dai hte maren, hkum hkrang langai sha hte Wenyi langai sha rai nga ai.

⁵Madu langai sha, makam masham langai sha, hkalup lam langai sha, rai nga ai.

⁶Masha amyu yawng a Kawa ngu ai Karai Kasang mung langai sha rai nga ai, shi gaw yawng mayawng a Madu rai nna yawng mayawng a kata hta amu galaw nga ai.

⁷Anhte langai hte langai gaw Hkristu jaw ya ai laklai ai chyeju kumhpa hpe ren di nna hkam la ga ai.

⁸Chyum Laika hta tsun ai hte maren, “Shi gaw grai tsaw ai de lung wa yang shi hte rau bawng dung ni law law hpe shaga woi mat wa ai. Shi gaw masha amyu ni hpe kumhpa ni jaw mu ai nga ai.”

⁹Ya shi lung wa ai ngu ai gaw hpa hpe ngu ai rai ta? Madu gaw nem dik ai dinghta ga a lawu tsang de shawng yu hkrat wa sai ngu mayu ai rai nga ai.

¹⁰Shing rai yu hkrat wa ai wa gaw, sumsing lamu ni a ntsa hte shinggan jan shata shagan ting hta shi nga ai lam shingkang shingwang hte jahpring da na matu, bai lung wa ai wa nan rai nga ai.

¹¹Shinggyim masha ni hpe chyeju kumhpa ni hpe jaw ya ai Madu mung shi nan rai nga ai. Shi gaw nkau mi hpe kasa, nkau mi hpe myihtoi, nkau mi hpe Kabu Gara Shiga hkaw hkawm ai ni, nkau mi hpe hpung up ni hte sara ni di nna san da shajang mu ai.

¹²Shi shing rai galaw ai gaw Hkristu a hkum hkrang hpe gaw gap shagrin da u ga, Karai Kasang a masha ni yawng hte hpe Hkristan daw jau sasana bungli a matu mara hkum tsup hkra hkyen lajang shajin ya na matu rai nga ai.

¹³Dai rai nna anhte a makam masham a marang e mung dai Karai Kasang a Kasha hpe chye chyang ai a marang e mung, hpang jahtum e anhte nga manga hte gaw langai sha tai wa nna Hkristu a tsaw dik ai hkum tsup ai gawng shingyan a hpunda hte maren myit su kunghpan ai ni tai wa na raga ai.

¹⁴Dai shaloi anhte gaw masha hpe lam dam hkra masu hkalem chye ai masha ni hpaji daw sharin shaga ai nbung leng kata hta nbung lam galai mat shagu kadau kadap nhting nhtang rai poi lawm mat wa ai ma kaji ni zawn rai sana n rai.

¹⁵Shing rai na malai, tsaw ra ai myit hte teng man ai ga hpe tsun nga ga yang Hkristu ngu ai baw hte lam shagu hta kaba rawt wa na ga ai.

¹⁶Baw ngu ai Madu woi awn up hkang hpajang ai kata e hkum hkrang a daw shan ni nga manga hte gaw langai hte langai htuk shachyaw nga ma ai hte hkri hkraw lamyi shagu e matut shachyaw madi shadaw ya ai a marang e dai hkum hkrang ting hpe kahkyin gumdin jum da lu nga ai. Dai rai nna daw shan ni langai hte langai tinang hte seng ang ai lit hpe gun hpai ai shaloi hkum hkrang ting hpe tsaw ra ai hte gaw gap galu kaba wa shangun nga ai.

¹⁷Manu n rawng ai myit mang ai lam lu ai maigan masha ni zawn matut nna asak n hkrung na matu Madu a mying ningsang hte ngai nanhte hpe sadi jaw made ai.

¹⁸Shanhte a chye chyang ai nyan sin mak nga nna tsep kawp angawk angak re ai hte du ja nga ma ai majaw, Karai Kasang jaw ai asak kamhtaw hta n lawm mat ai ni rai nga ma ai.

¹⁹Shanhte hta hkrit kaya ngu ai myit yawng shamat kau sai majaw, shanhte gaw ngang kayut ai lam hkan let n san n seng n shawp n kap ai amu amyu myu hpe hkum da ai lam n nga hkra galaw na matu tinang a hkum hpe nawng bang kau ma ai.

²⁰Nanhte gaw Hkristu a lam hpe dai hku sharin la yu manit dai n rai.

²¹Shi a lam hpe nanhte kaja wa na yu manit dai hte Hkristu a hpang hkan nang ai ni rai nga myit dai rai nna Hkristu hta rawng ai dai teng man ai lam hpe nanhte sharin la manit dai.

²²Dai rai nna nanhte gaw shawng de nanhte hkan sa yu sai asak hkrung lam hta na gawng shingyan dingsa hpe mung, pyaw hpa lam hpe marin marit nna hkalem hkalau mayu ai myit a majaw, hten mat sai gawng shingyan dingsa hpe mung kabai kau mu.

²³Nanhte a kraw lawang myit masin ni hpe tsep kawp ningnan shabyin lu na rai myit dai.

²⁴Nanhte gaw Karai Kasang a hkrang sumla hte hpan da ai gawng shingyan ningnan hpe bu hpun dagraw nna dai hta nan teng man ai hte seng ai ding hpring chyoi pra ai sak hkrung lam hpe shadan dan lu na rai myit dai.

²⁵Dai majaw masu ai ga hkum tsun mu; langai hte langai gaw tinang a kam sham ai hpu nau wa hpe teng man ai ga sha tsun u ga, hpa majaw nga yang, anhte yawng gaw Hkristu ngu ai hkum hkrang a daw chyen ni rai nga ga ai.

²⁶Nanhte masin pawt yang dai pawt ai myit hpe yubak hkum galaw shangun myit; jan du hkra mung hkum pawt nga myit.

²⁷Nat hpe mung, ahkaw ahkang hkum jaw myit.

²⁸Lagu ga ai wa gaw, lagu lagut amu tawn kau nna bai hkum lagu u ga, ra kadawn nga ai ni hpe karum la lu hkra tinang a matu teng man ai kan bau ai asak hkrung lam lu la hkra amu galaw hpang u ga.

²⁹Nse ai ga hkaw mi mung nanhte a n- gup na n pru u ga, madat mara nga ai ni a matu akyu byin hkra ra nga ai hte maren shadaw shalan na matu mai kaja ai ga sha atsun nga mu.

³⁰Dai hta n ga Chyoi Pra ai Wenyi hpe hkum shayawn kau nga myit; hpa majaw nga yang dai Chyoi Pra ai Wenyi gaw nanhte hpe Karai Kasang madu nga ai lam sakse masat dazik rai nna hpang jahtum nhtoi e nanhte hpe Karai Kasang shalawt dat hkrum na ra ai hpe pahkam hkam ya ai lam langai mi mung rai nga ai.

³¹Dai majaw myit machyi ai, sindawng kahtet ai, masin pawt ai, marawn ahkre ai, n kaw n law di ai, n ju n dawng ai myit amyu myu hte kaga dai hte bung ai lam ni yawng mayawng hpe yeng seng kau mu.

³²Nanhte shada da matsan dum ai, mai kaja ai myit madun hkat nna Karai Kasang gaw Hkristu hta e nanhte a mara raw ya manit dai hte maren nanhte mung shada da mara raw dat hkat nga mu.