Read Jinghpaw Common Language Bible 2009 EHPESU 5 Bible Online

EHPESU 5 - Jinghpaw Common Language Bible 2009 bible

EHPESU 5

¹Nanhte gaw Karai Kasang a tsaw ra ai kasha ni rai nga manit dai majaw, shi hte bung pre wa hkra shakut shaja lu na rai myit dai.

²Hkristu gaw anhte hpe tsaw ra ai hte anhte a matu shi a hkum hpe Karai Kasang sharawng awng ai manam pyaw ai shagu hkungga shatai nna nawng kau nu ai zawn, nanhte mung tsaw ra myit e hkang ai kata hta ahkawm nga mu.

³Nanhte gaw Karai Kasang a amyu masha ni rai nga myit dai majaw, hpye ai amu, n san n seng ai yawng hte hte nammak lawhpa ai hte seng ai lam ni nanhte hta e ga hte pyi n tsun myit ga,

⁴n san n seng ai ga kinsha, awu asin yuk jahtuk nga ai ga, zai ai ga re ai ni hpe n tsun ai sha, Karai Kasang hpe chyeju shakawn ai ga sha tsun nga mu ga.

⁵Hpye ai wa, kaya n chye sari n rawng ai wa, nammak lawhpa ai wa, kadai rai ti mung, Hkristu hte Karai Kasang yan a mungdan hta sali kamhtaw galoi mung hkam la lu na n re ai hpe nanhte hkrak chye nga myit dai. (Hpa majaw nga yang nammak lawhpa ai lam gaw, sumla nawku ai lam amyu mi rai nga ai)

⁶Kadai mung kaman lila ga ni hte nanhte hpe hkum hkalem hkalau shangun nga myit; hpa majaw nga yang dai lam ni nan a majaw Karai Kasang a pawt sindawng ai gaw n madat n mara ai ni a ntsa e du na ra ai.

⁷Dai re ai majaw, dai zawn re ai masha ni hte kachyi mi pyi hkum hkan sharau nang nga myit.

⁸Moi shawng de nanhte mung ningsin hta nga lai wa yu manit dai; rai ti mung ya e Madu a masha ni tai wa manit dai rai nna nhtoi de du shang manit dai. Dai re ai majaw, nanhte gaw nhtoi a kashu kasha ni zawn hkan galaw nga mu.

⁹Hpa majaw nga yang dai nhtoi gaw mai kaja ai lam amyu myu, ding hpring ai hte teng man ai lam ni hpe shabyin ya nga ai.

¹⁰Madu sharawng awng ai hpa rai nga ai hpe shakut sharang let sharin la mu.

¹¹Nsin hta hkawm sa nga ai masha ni galaw ai akyu n rawng ai nsin hte seng ai bungli ni hpa mung n hkan galaw ai sha, dai amu ni hpe nhtoi de shadan dan nga mu.

¹²(Hpa majaw nga yang, shanhte mayun mayoi e galaw ai amu ni gaw kaja wa tsun na pyi gaw nachying kaya kahpa rai nga ai.)

¹³Dai lam ni nga manga hte hpe nhtoi de shapraw shadan dat ai shaloi, shanhte a lai kyang madung majing gaw dan dawng wa ai.

¹⁴Hpa majaw nga yang, asan sha shadan shadawng da ai arai ni gaw nhtoi tai nga ai. Dai majaw, “Yup pyaw ai wa e rawt u, si ai kaw na bai rawt wa nu; Hkristu gaw nang hpe jahtoi jaw na ra ai,” nga nna tsun ai.

¹⁵Dai re majaw nanhte gara hku sak hkrung hkawm sa nga myit dai gaw atsawm sha yu nga mu. Hpaji n rawng ai angawk angak masha ni zawn n re ai sha, hpaji rawng ai masha ni zawn hkawm nga mu.

¹⁶Ya na nhtoi ladaw ni gaw n shawp nga ai majaw, nanhte lu ai ahkaw ahkang shagu hpe atsawm sha akyu rawng hkra jai lang mu.

¹⁷Dai rai nna angawk angak re ai ni hkum tai myit; dai Madu a myit ra ai lam hpa rai nga ai gaw tam shakut nga mu.

¹⁸Chyaru hkum nang mu; dai gaw nang hpe jahten shabya kau na ra ai. Wenyi hte hpring tsup nga mu.

¹⁹Nanhte shada da shakawn kungdawn mahkawn mangoi ga, Wenyi makam masham hte seng ai laka ga hte tsun shaga hkat nga let, nanhte a kraw lawang kata hta Madu hpe mahkawn mangoi nna shakawn kungdawn nga mu.

²⁰Anhte a Madu Yesu Hkristu a mying ningsang gang nna lam shagu a matu Kawa Karai Kasang a chyeju hpe tut nawng e shakawn kungdawn nga mu.

²¹Nanhte a Hkristu hpe hkrit kamyin ai myit a majaw shada da a npu e ataw nga mu.

²²Madu jan ni e, nanhte gaw Madu a up hkang ai hpe hkam la nga myit dai hte maren, madu wa a up hkang ai hpe hkam la mu.

²³Hkristu gaw dai hpung a ntsa e ahkang aya lu nga ai zawn dai madu wa mung madu jan a ntsa e ahkang aya lu nga ai. Hkristu shi nan shi a hkum hkrang rai nga ai dai hpung a Hkye Hkrang la ai Madu mung rai nga ai.

²⁴Dai hpung gaw Hkristu a up hkang ai hpe hkam la ai zawn, madu jan ni mung lam shagu hta madu wa ni a up hkang ai hpe tsep kawp hkam la na rai myit dai.

²⁵Madu wa ni e, Hkristu gaw dai hpung hpe tsaw ra nna de a matu asak nawng ya kau wu ai zawn, nanhte a madu jan ni hpe tsaw ra nga mu.

²⁶Madu shi a asak hpe nawng kau ai lam gaw, dai hpung hpe hka hte jasan jaseng kashin kau nhtawm, shi a mungga hte Karai Kasang kaw nawng jau ai hte

²⁷dai hpung gaw shi hkum nan a matu ap nawng kau ai shaloi e shi a nga manga hta agang chyalang hte kapum kapam re ai hpa mung n lawm ai sha, chyoi pra ai mara n rawng nna hpung shingkang rawng ai hte tsawm htap na matu rai nga ai.

²⁸Dai rai nna madu wa ni gaw, tinang a hkum hpe tsaw ra nga ai zawn tinang a madu jan ni hpe tsaw ra nga na mai nga ai. Tinang a madu jan hpe tsaw ra ai wa gaw, tinang a hkum hpe mung tsaw ra nga ai.

²⁹(Hpa majaw nga yang, kadai mung tinang hkum hpe n dawng n yawt ai gaw n nga ga ai, shing rai na malai, Hkristu gaw dai hpung hpe bau maka wu ai.

³⁰Hpa majaw nga yang, shi a hkum hkrang a daw shan ni rai nga ga ai.)

³¹Dai Chyum laika hta tsun ai hte maren, “Ndai lam a majaw lasha gaw shi a kanu kawa hpe kau da nhtawm shi a madu jan hte kanawn manoi nga na rai nna shan lahkawng gaw hkum shan langai sha tai lu na mara ai.”

³²Ndai lam gaw Chyum Laika hta shadan dan ai sung htum ai teng man lam langai mi rai nna Hkristu hte hpung hpe lakap nna tsun ai ga re ngu nna ngai chye na we ai.

³³Rai ti mung dai gaw nanhte hte mung seng nga ai. Madu wa shagu gaw shi a madu jan hpe tsaw ra lu na rai nna Madu jan shagu mung tinang madu wa hpe tsaw ra lu na rai nga ai.