Read Jinghpaw Common Language Bible 2009 EHPESU 6 Bible Online

EHPESU 6 - Jinghpaw Common Language Bible 2009 bible

EHPESU 6

¹Ma ni e nanhte a Kanu yan Kawa a ga hpe madat mara nga mu, shing rai galaw ai gaw Hkristan ni hku nna galaw na ang ai amu rai nga ai;

²Chyum Laika hta, “Na nnu yan nwa hpe hkungga lara di mu, shing rai yang nang ngamu ngamai ai hkrum nna ga ntsa e asak galu ai hte nga lu na ndai,” nga ai.

³Shing nga nna htet da ai ga gaw ga ndat lawm ai shawng ningnan na hkang da ai ga rai nga ai.

⁴Nanhte mung Nu wa ni e, nanhte a kasha ni hpe masin pawt na hku hkum galaw mu. Shing rai na malai shanhte hpe dai madu a daru sharin lam hte matsun madun ai hta bau maka nga mu.

⁵Mayam ni e, nanhte Hkristu hpe daw jau nga ai zawn, nanhte a shinggyim madu ni hpe madat mara let hkrit kamyin ai hte myit malang nna myit su ai hku galaw mu.

⁶Madu ni yu nga ai shaloi myi man pa mayu ai majaw sha hkum galaw myit; Hkristu a mayam ni zawn, Karai Kasang a myit ra ai hku hte maren, myit masin yawng hte galaw nga mu.

⁷Masha a matu daw jau ai zawn sha n rai, dai Madu a matu zawn sharawng awng ai myit hte nanhte a amu bungli hpe galaw nga mu.

⁸Mayam hpe rai ti mung, shanglawt hpe rai ti mung Karai Kasang gaw langai hte langai hpe shi galaw ai mai kaja ai amu a matu jaw htang na ra ai dum chye nga mu.

⁹Madu ni e, nanhte mung dai hte maren nanhte a mayam ni a ntsa e galaw hkan sa nga mu; shanhte hpe jahkrit ai lam ni jahkring kau mu. Nanhte hte nanhte a mayam ni gaw sumsing lamu hta e Madu langai sha hte seng ai ni rai nna dai Madu gaw langai hte langai hpe myi man n lata ai sha tara daw dan ai wa rai nga ai hpe myit dum nga mu.

¹⁰Hpang jahtum dai Madu hte langai sha tai ai hku nna mung, shi a hpung shingkang hte mung, nanhte a n-gun lapyin shagreng da nga mu.

¹¹Nat e maw ai hkalem hkalau ai lam ni yawng hte hpe nanhte hkap manga kau lu myit ga, Karai Kasang nanhte hpe jaw da ai hpyen hking nlang hpe bu hpun dagraw da nga mu.

¹²Hpa majaw nga yang, anhte shinggyim masha ni hte gasat hkat nga ai n rai; sumsing lamu lahta tang e nga ai n hkru n hkra ai nat luksuk ni hte mung, ndai sin mak ai mungkan hpe up hkang nga ai du ni, ahkang aya lu ai ni hte gasat gala hkat nga ga ai.

¹³Dai re ai majaw, Karai Kasang a hpyen hking nlang hte hpe ya jang bu hpun dagraw da nga mu. Shing rai jang she n hkru n hkra ai hte ruyak ai nhtoi du ai shaloi nanhte gaw hpyen wa a gasat gala ai lam ni hpe hkap manga kau lu na myit dai. Jahtum du hkra gasat shangut ai hpang e mung, nanhte ngang ngang kang kang lahpran tsap nga lu na marin dai.

¹⁴Dai rai nna nanhte a nshang hpe teng man ai hte shingkyit zawn kyit da nna, ding hpring ai hpe sinda magap zawn dagap nhtawm,

¹⁵Ngwi pyaw ai Kabu Gara Shiga hpe tsun shana na matu jin jin rai nga u ga, lagaw hta hkyepdin din let lahpran tsap nga mu.

¹⁶Dai hta n ga, makam masham ngu ai n- gang hpe tut nawng e lang da nga mu; hpa majaw nga yang nanhte gaw dai n gun hte N hkru N hkra ai Wa gap dat ai wan pala nlang hte hpe sat dang kau lu na myit dai.

¹⁷Bai hkye hkrang la ai lam hpe hpri gup chyawp zawn, hkap chyawp la nna, dai Wenyi e jaw ya ai Karai Kasang a mungga ngu ai nhtu hpe ahpye nga mu.

¹⁸Karai Kasang kaw na karum ai lam lu la u ga, hpyi nem let akyu hpyi ai hta ndai lam yawng hte hpe agalaw nga mu. Ndai lam a majaw amaja nga mu; galoi mung myit shayaw asum hkum jaw myit; Karai Kasang a masha ni a matu tut tut akyu hpyi nga mu.

¹⁹Ngai tsun na matu jin ai ten hta Karai Kasang ngai hpe mung sumtu jaw u ga, hte dai Kabu Gara Shiga a sung htum ai lachyum hpe n hkrit n kang nden marai hte tsun dan lu hkra nye a matu mung akyu hpyi nga mu.

²⁰Ya ngai bawng dung ai wa rai nga ti mung, dai Kabu Gara Shiga a jaw e kasa langai mi rai nga nngai; Dai Kabu Gara Shiga hpe hkaw tsun na ngai hta lit nga ai hte maren nden ja ai hte tsun shana lu u ga, akyu hpyi nga mu.

²¹Ngai kaning rai nga ai shiga azin ayang hpe nanhte chye lu hkra dai Madu a bungli hta kangka sadi dung ai shangun ma rai nga ai anhte a tsaw ra ai hpu nau wa Tuhkiku gaw nanhte hpe tsun dan na ra ai.

²²Dai re ai majaw, anhte yawng kaning rai nga ga ai lam shiga yawng nanhte hpe tsun dan u ga hte, nanhte hpe karum n-gun jaw ya na matu shi hpe nanhte hpang de shangun dat se ai.

²³Kawa Karai Kasang hte Madu Yesu Hkristu gaw Hkristan hpu nau ni yawng hpe ngwi pyaw ai, tsaw ra ai hte, makam masham jaw ya u ga law.

²⁴Galoi mung n hpoi n hten mat lu ai tsaw ra myit hte anhte a Madu Yesu hpe tsaw ra nga ai ni nlang hte hta Karai Kasang a chyeju gaw anga nga u ga law.