Read Jinghpaw Common Language Bible 2009 HPILIPI 2 Bible Online

HPILIPI 2 - Jinghpaw Common Language Bible 2009 bible

HPILIPI 2

¹Nanhte gaw Hkristu hte rau asak hkrung ai a marang e n-gun lagaw hpring wa myit dai hte shi a tsaw ra myit gaw nanhte hpe shalan shabran ai lam jaw myit dai. Dai hta n-ga Wenyi a kanawn mazum lu ai lam hte shada da n-gaw nwai matsan dum ai lam hkam la nga myit dai.

²Dai rai nna nanhte gaw myit hkrum ai lam langai sha, myit masin langai sha, myit mang langai sha rai nga ai hku nna, nye a kabu gara myit hpe jahpring shatsup ya na matu, ngai nanhte hpe shadut jahkat dat made ai.

³Gumrawng gumtawng mayu ai myit, tinang akyu tam mayu ai myit, hte hpa mung hkum galaw mu; masha kaga wa gaw tinang hta grau kaja nga ai ngu nna tut nawng myit la let shada da shagrit shanem ai myit hte kanawn mazum nga mu.

⁴Langai hte langai tinang hte seng ai lam hpe sha n rai, masha gale hte seng ai lam hpe mung myit yu nga mu ga.

⁵Hkristu Yesu hta rawng ai myit nan, nanhte hta mung rawng nga myit ga.

⁶Shi gaw galoi mung Karai gawng shingyan hte, nga pra nga timung, Karai Kasang hte maren rai taw nga na, ma ja e magra noi nga na n myit wu ai.

⁷De a malai, apyaw alaw sha hte, shi lu malu hpe shagawm kau nna, mayam a gawng shingyan hpe dagraw la let, shinggyim masha zawn shangai wa nna, masha a hpraw nsam hte dan pru wa sai.

⁸Shi a myit hpe shagrit shanem kau nna, si ai du hkra madat mara nu ai. Kaja wa wudang hta si ai du hkra madat mara nga ai.

⁹Dai rai nna, Karai Kasang gaw shi hpe, tsaw htum ai sumsing lamu du hkra shagrau nna, amying shingteng yawng hta grau kaba ai mying ningsang hpe jaw da wu ai.

¹⁰Dai majaw sumsing lamu lahta tang na, dinghta tsang na hte lawu tsang na, hkrung mahkrung yawng hte gaw, Yesu a mying ningsang hpe, shagrau sha-a hkungga jaw let, hput di dingnyawm nna,

¹¹Kawa Karai Kasang a hpung shingkang a matu mara, Yesu Hkristu gaw Madu rai nga ai nga, shinglet yawng mayawng e yin la hkam la na mara ai.

¹²Dai re ai majaw ngai tsaw ra nga ai ni e nanhte hte ngai rau nga ai aten hta nanhte galoi mung nye a ga hpe madat mara myit dai zawn ya mung nanhte hte tsan gang nga ai ten hta nye a ga madat mara na gaw grau nna pyi ra ahkyak nga ai. Dai rai nna nanhte gaw hkye hkrang la ai lam hpe hpring tsup hkra lu la mu ga hkrit gari ai hte shachyen shatsup nga mu.

¹³Hpa majaw nga yang Karai Kasang gaw shi a myit ra yaw shada ai lam hta madat mara hkan sa mayu ai myit hte hkan sa shangun lu ai atsam nanhte lu la mu ga Karai Kasang gaw nanhte hta e shachyen shaja nga ai.

¹⁴Nanhte galaw ra ai hpa lam hpe mung aput angun ndang kalang n rai ai sha galaw nga mu.

¹⁵Shing rai yang she nanhte gaw arawn alai hten run nna yubak lu ai ni nga ai ndai mungkan hta mara n kap nna myit masin san seng ai Karai Kasang a kashu kasha majing ni zawn tai wa na myit dai. Shing rai nanhte gaw asak jahkrung ya ai mungga hpe hkaw tsun nga let lamu ting hpe jahtoi ya ai ahtoi hkum ni zawn shanhte a ka-ang e htoi tu nga lu na rai myit dai.

¹⁶Nanhte shing rai galaw myit dai rai yang gaw ngai n-gun dat gun hpai shakut ai lam shagu gaw kaman lila n rai nga ai majaw Madu Yesu du sa ai Nhtoi hta ngai hta kabu gumrawng shara tai na ra ai.

¹⁷Lama rai nna, ngai sat kau hkrum wa ai rai yang, dai gaw nanhte Karai Kasang kaw nawng ya ai nanhte a makam masham a hkungga hte daw jau ai hkungri a ntsa e nye a asak hpe dumhpung hkungga zawn ru jaw nawng jau kau timung, ngai kabu nga nna nanhte hte rau kabu ninglaw nga nngai.

¹⁸Dai hte maren nanhte mung kabu nga mu; ngai hpe mung nanhte hte rau kabu shangun mi.

¹⁹Ngai gaw nanhte kaw na shiga na lu nna n-gun lu u ga, Madu a myit ra ai lam rai yang gaw Timohti hpe nanhte hpang de kade nna yang shangun dat lu na ring ngai ngu nna ngai myit mada nga nngai.

²⁰Timohti shi langai mi sha ngai hte myit bung nna shi zawn nanhte a lam hpe htep lahti myit tsang ai masha kaga langai mi mung n nga sai.

²¹Masha kaga ni yawng hte gaw tinang a lam hpe sha tsang ma ai; Hkristu Yesu hte seng ai lam hta myit n lawm ma ai.

²²Shi gaw kasha gaw kawa hpe shadaw ai zawn, dai kabu gara shiga shachyam shabra ai lam hta ngai hte rau magam gun shakut sharang nga ai majaw, shi gade daram manu dan ai wa re ai hpe nanhte nan chye nga myit dai.

²³Dai rai nna nye a lam kaning rai na re ai hpe ngai chye ai shaloi jang dai wa hpe nanhte hpang de shangun dat na ngai myit mada nga nngai.

²⁴Dai hta n-ga, gade wa n na yang ngai hkum nan nanhte hpang de sa du na ngu nna dai Madu hta myit kam nga nngai.

²⁵Bai nanhte a hpu nau wa, shingdep shingtau wa hte rau sha gasat gala ai hpyen ma manang wa, ngai hpe karum na matu nanhte shangun dat nna gawn lajang ai wa Epahprodi hpe nanhte hpang de bai shangun dat na re ai ngu nna ngai nawn nngai.

²⁶Shi gaw nanhte nlang hte hpe sa hkrum lu na, shi nachying myit ndawt nga ai. Hpa majaw nga yang shi machyi ai hpe nanhte na yu manit dai rai nna shi grai wa myit ru myit yak nga ai.

²⁷Kaja wa shi gaw ganoi si hkra machyi kau nu ai. Rai ti mung Karai Kasang gaw shi hpe matsan dum nga ai. Shi hpe sha n rai, ngai gaw yawn hkyen kaba htap mi hte htap mi n hkrum u ga, ngai hpe mung matsan dum nga ai.

²⁸Dai re ai majaw, nanhte shi hpe bai mu hkrum lu nna kabu lu myit ga hte nye a yawn hkyen ai mung mat mat wa u ga, shi hpe nanhte hpang de dat dat na ngai grau nna myit katu bu nga nngai.

²⁹Dai rai nna nanhte shi hpe Madu hta hpu nau langai mi hku nna hkap tau hkalum la mu. Shing re ai ni hpe hkungga lara di mu.

³⁰Hpa majaw nga yang shi gaw nanhte hkum nan n jaw lu ai karum ai lam ngai hpe jaw lu na matu sak dan nna Hkristu a magam bungli hpe ganoi noi si hkra gun hpai shakut lai wa nu ai.