Read Jinghpaw Common Language Bible 2009 HPILIPI 4 Bible Online

HPILIPI 4 - Jinghpaw Common Language Bible 2009 bible

HPILIPI 4

¹Dai rai nna hpu nau ni e, nanhte hpe ngai grai tsaw ra nga made ai hte grai myit dum marit nga nngai. Nanhte gaw nye a kabu gumrawng shara rai myit dai. Tsaw ra ai ni e, dai Madu hte langai sha tai nna asak hkrung ai lam hta ngang ngang lahpran tsap nga mu.

²Eodia hte Suntuki yan e, dai Madu hta kanau kana rai nga myit dai hte maren myit hkrum myit ra na matu chyeju hte ngai nan hpe hpyi nem dat nngai.

³Nye a nrum ntau share manang hku nna mung dai num yan hpe karum la na hpe ngai ra sharawng nga nngai; hpa majaw nga yang dai Kabu Gara Shiga hkaw tsun ai lam hta ngai hte rau nhki nsang amu galaw shakut shaja lawm ma ai. Shing rai galaw lai wa ai ni hta Klemen hte Karai Kasang a asak jahpan laika hta tinang a mying lawm ai nye a shingdep shingtau kaga ni mung lawm ma ai.

⁴Dai Madu hta nanhte tut nawng e kabu gara nga myit ga, bai ngai tsun nngai, kabu gara nga mu.

⁵Nanhte a sumnung shingdi ai myit hpe masha yawng a man e madun dan mu. Dai Madu du sa na ten ni magang ra ai.

⁶Hpa lam hta mung myit hkum ru hkum tsang nga myit; lam shagu hta akyu hpyi nna tawng ban ai hte chyeju dum ai myit masin hte shakawn kungdawn let nanhte a ra mara hpe Karai Kasang kaw shana ya mu.

⁷Shaloi masha a chye chyang ai nyan hta grau lai ai Karai Kasang a ngwi pyaw ai gaw nanhte a kraw lawang ni hte myit masin ni hpe Hkristu Yesu hta e bau sin na ra ai.

⁸Hpu nau ni e, hpungdim hku nna tsun ga nga yang, nanhte gaw hpa teng man ai lam rai ti mung, hpa ding hpring ai lam rai ti mung, hpa san seng ai lam rai ti mung, hpa sharawng awng hpa lam rai ti mung, hpa sha-a ram ai lam rai ti mung, a rawng re ai lam lama ma, shakawn kungdawn re ai lam lama ma rai nga yang gaw dai lam hte hpe myit sumru yu nga mu.

⁹Nye a ga ni hte galaw shamu shamawt ai lam ni hpe mu yu, na yu nna sharin la ai hte hkap la hkan galaw nga mu; shaloi ngwi pyaw ai a npawt Karai Kasang gaw nanhte hte rau anga nga na ra ai.

¹⁰Ndai daram wa aten na mat wa ai hpang nanhte a tsaw ra myit ngai hpe kalang bai madun myit dai majaw ngai dai Madu hta nachying kabu nga nngai; shing nga yang, nanhte ngai hpe yu gawn lajang ai lam jahkring kau myit dai n ngu mayu nngai. Dai tsaw ra myit hpe madun dan na ahkaw ahkang ginwan n lu myit dai ngu mayu ai sha re.

¹¹Shing nga nna ngai tsun nngai gaw nanhte ngai hpe ra kadawn mat hkra n yu, n gawn mat manit dai ngu nna myit hta hkam sha ai majaw tsun nga nngai n rai. Hpa majaw nga yang ngai gaw tinang hta lu ai mi hte myit dik let nga chye na lam hpe sharin la tawn ni ai.

¹²Ra kadawn ai ten hpe gara hku hkap hkrum manga kau na hpe ngai chye nngai; ra ai hta jan nna n taw n tsang lu ai ten hta gara hku nga na hpe mung ngai chye nngai. Lam shagu hte shara shagu hta, hpring tsup hkru kat na hte kawsi hpang gara hkrum na ten ni hta mung, n taw n tsang lu ai ten hte kadawn kata hkrum ai ten hta mung, myit pyaw myit dik let nga lu shangun ai makoi magap da ai hpaji hpe ngai sharin la lu se ai.

¹³Ngai hpe n-gun shaja ya ai Hkristu a majaw yawng mayawng hpe ngai galaw lu nngai.

¹⁴Rai ti mung ngai nni nkri hkrum ai ten hta ngai hpe karum madi shadaw ai hku nna nanhte grai mai kaja ai bungli galaw manit dai rai nga ai.

¹⁵Hpilipi hpung masha ni e, Makedoni mung na ngai pru wa nna Kabu Gara Shiga hkaw tsun hpang ai nhtoi ni a shawng daw hta nanhte Hpilipi hpung langai mi chyu sha ngai hpe karum dat manit dai lam hpe mung, magam gun ai lam hta nanhte chyu sha ngai hte kanawn mazum let sum hkrum ai lam ni hte awng dang ai akyu ni hpe rau rum hkam la manit dai lam hpe mung, nanhte nan atsawm sha chye nga myit dai.

¹⁶Htesaloni mare e ngai naw nga nga yang pyi nanhte gaw ngai hta ra kadawn wa ai shaloi dai ra ai lam hta jai lang na matu kalang sha n-ga shagun jaw manit dai.

¹⁷Ning ngu nna ngai tsun nngai gaw, kumhpaw kumhpa ni hpe ngai ra marin nna n rai; nanhte galaw daw ai magam bungli a asi, amyat jahpan hta jat galu kaba wa na hpe sha ngai ra sharawng nngai.

¹⁸Nanhte shagun jaw dat ai arung arai alu yawng lu la sai lam hte jahpan ya nang e madun dan nngai. Dai gaw ra ai hta pyi jan hkra rai sai. Dai alu arung arai ni hpe Epahprodi la sa ya ai majaw ngai ra ai hta pyi jan hkra lu ni ai. Dai arai ni gaw Karai Kasang kaw nawng ya ai manam pyaw ai bat zawn mung, Karai Kasang ra sharawng ai hte hkap la ging ai shagu hkungga zawn mung rai nga ai.

¹⁹Dai rai nna nye a Karai Kasang chyawm gaw, hpung shingkang hte sut gan n taw n tsang lu su nga ai hte maren nanhte hpe Hkristu Yesu a marang e nanhte a ra mara hte hpe jahkum shatsup jaw ya na marin dai.

²⁰Ya, anhte a Wa ngu ai Karai Kasang kaw htani htana prat dingsa e hpung shingkang anga nga u ga law! Amen.

²¹Karai Kasang a masha ni rai nga ai Hkristu Yesu a hpang hkan nang ai ni yawng hte hpe shakram dat ga ai. Nang e ngai hte rau rai nga ai kahpu kanau ni gaw nanhte hpe shakram dat ma ai.

²²Nang e nga nga ai Karai Kasang a masha ni nlang hte gaw, nanhte hpe shakram dat ma ai; Kehta Hkawhkam a htingnu na ni gaw grau nna alak mi shakram dat ma ai.

²³Madu Yesu Hkristu a chyeju gaw, nanhte hte rau anga nga u ga law.