Read Jinghpaw Common Language Bible 2009 KOLOSE 1 Bible Online

KOLOSE 1 - Jinghpaw Common Language Bible 2009 bible

KOLOSE 1

¹Karai Kasang a myit ra ai majaw Hkristu Yesu a kasa rai nga ai ngai Pawlu hte hpu nau Timohti gaw,

²Kolose mare na Karai Kasang a masha ni hte Hkristu hta kangka rai nga ai hpu nau ni hpang de ga shana dat ga ai. Anhte a Wa Karai Kasang kaw na chyeju hte ngwi pyaw ai gaw nanhte hta e anga nga malit ga law.

³Anhte gaw nanhte a matu akyu hpyi ai ten shagu hta anhte a Madu Yesu Hkristu a Kawa Karai Kasang hpe chyeju dum shakawn kungdawn ga ai.

⁴Hpa majaw nga yang, nanhte gaw Hkristu Yesu hpe gade daram kam sham nga ai lam, Karai Kasang a masha nlang hte hpe gade daram tsaw ra nga myit dai lam, anhte na lu saga ai.

⁵Dai teng man ai mungga ngu ai Kabu Gara Shiga nanhte kaw shawng du dep sa wa ai shaloi, nanhte gaw dai Kabu Gara Shiga e jaw ya ai myit mada ai lam hpe na yu manit dai. (Dai rai nna nanhte a makam masham hte tsaw ra ai lam gaw sumsing lamu e nanhte a matu kyem da ya ai myit mada ai lam hta npawt jung nga ai.)

⁶Nanhte gaw Karai Kasang a chyeju lam hpe shawng nnan chye lu ai nhtoi kaw nna, dai chyeju hpe teng teng chye na hkam sha lu ai hte maren, dai Kabu Gara Shiga gaw nanhte kaw du dep sa wa ai. Dai hte maren, dai Kabu Gara Shiga gaw mungkan ting chyam bra wa nna asi law law si wa nga ai.

⁷Nanhte gaw Karai Kasang a chyeju lam hpe anhte a tsaw ra ai shingdep shingtau wa Epahpra kaw nna sharin la manit dai; shi gaw anhte a malai Hkristu a kangka re ai magam gun hpai ai wa rai nga ai.

⁸Wenyi e nanhte hpe jaw ya sai nanhte a tsaw ra myit a lam shi anhte hpe tsun dan mani ai.

⁹Dai re ai majaw, nanhte a lam na yu ai shani kaw nna, anhte gaw nanhte a matu mara n sim n sa akyu hpyi nga ga ai. Nanhte gaw Karai Kasang a myit ra ai lam hpe chye lu ai nyan hpaji, dai Wenyi e jaw ya ai hpaji byeng-ya yawng mayawng hte machye machyang ni, hte jahpring ya ai hkrum myit ga Karai Kasang kaw anhte akyu hpyi ya nga ga ai.

¹⁰Shing rai yang nanhte gaw, Karai Kasang a myit ra ai hku asak hkrung lu nna shi a sharawng awng ai lam hpe tut nawng e nanhte hkan sa galaw lu na marin dai. Dai shaloi nanhte a asak hkrung lam gaw mai kaja ai magam bungli shagu hta asi si wa nna, Karai Kasang hpe chye chyang ai lam hta jat galu kaba wa na marin dai.

¹¹Dai rai nna nanhte hkrum hkra wa ai lam shagu hpe myit galu kaba ai hte hkam sharang lu na matu, shi a hpung shingkang rawng ai n-gun atsam a marang e nanhte hpe n-gun lagaw shaja myit ga.

¹²Dai hta kaga, nhtoi a mungdan hta rawng nga ai shi a chyoi pra ai ni a matu mara Karai Kasang san tawn da ai sali wunli ni hpe nanhte hkan dagraw la ging ai ni tai wa shangun ai Karai Kasang a chyeju hpe kabu gara shakawn kungdawn nga mu ga law.

¹³Shi gaw anhte hpe n hkru n kaja ai nsin a n-gun atsam kata kaw na hkye mawai la nna shi a tsaw ra ai Kasha a mungdan hta shashawn mi ai.

¹⁴Dai Kasha a asai hte htingrai htingrat ya ai a marang e anhte hpe shalawt dat mi ai; dai gaw anhte a yubak mara ni hpe raw dat ya ai lam nan rai nga ai.

¹⁵Hkristu gaw myi hte n mu lu ai Karai Kasang hpe madun ai myi hte mu lu ai hkrang bung sumla rai nga ai. Shi gaw Kasha alat rai nna hpan da ai arai yawng mayawng hta ningtawn ai wa rai nga ai.

¹⁶Hpa majaw nga yang, sumsing lamu hte ginding aga hta n-gun atsam rawng ai Wenyi minla ni, madu ni up hkang ai ni, ahkang aya lu ai hte hpawn myi hte mu lu ai, n mu lu ai hte hpe rai ti mung, dai Kasha wa a marang e hpan tawn da nu ai. Karai Kasang gaw arai yawng mayawng hpe shi a jaw e mung, shi a matu mara a matu mung hpan tawn da nu ai.

¹⁷Shi gaw yawng mayawng a shawng e nga nga nna, nga manga hte gaw shi a jaw e shi a shara hte shara grin nga lu ma ai.

¹⁸Shi gaw shi a hkum hkrang ngu ai Hpung a baw rai nga ai. Shi nan dai hkum hkrang hte seng ai asak a npawt rai nga ai. Shi chyu sha lam shagu hta nambat langai shara la da nna yawng mayawng a nhtung nhka tai wa u ga, si mat ai ni kaw na hkrung sharawt la ai Kasha alat ningshawng rai nga ai.

¹⁹Hpa majaw nga yang, Karai Kasang shi nan a myit ra daw dan ai hte maren, Kasha wa gaw shi hta Karai Kasang a marai hkum hpring tsup hkra hkam la nu ai.

²⁰Dai rai nna, Karai Kasang gaw ninggawn tawa nga yawng nga pra ting shi hte mahku mara bai rai wa u ga, myit daw dan da nu ai. Karai Kasang gaw wudang ntsa e ap nawng si hkam ai Kasha a asai hte mahku mara simsa lam galaw nhtawm, sumsing lamu hte ginding aga e nga ai yawng mayawng hte hpe shi hpang de woi la wu ai.

²¹Nanhte mung moi shawng de gaw nanhte galaw ai n hkru n hkra ai bungli hte myit mang ai lam a majaw Karai Kasang hte tsan gang mat nna, shi a hpyen ni tai mat manit dai.

²²Rai ti mung, ya Karai Kasang gaw, shinggyim hkum shan dagraw tawn ai shi a Kasha hpe si hkam shangun ai hku nna nanhte hpe shi a jinghku ni shatai manit dai. Shing rai galaw ai lam gaw, nanhte gaw chyoi pra nna agang chyalang n kap ai hte mara n rawng ai sha shi a man de nanhte hpe shashawn la lu na matu rai nga ai.

²³Kaja wa nanhte gaw nanhte hkam la kam sham ai lam hpe ngang kang nna teng man ai npawt hkridun zawn ngang grin nga u ga, matut nna makawp maga sin lajang tawn lu na rai myit dai. Bai nna nanhte gaw dai Kabu Gara Shiga na la ai shaloi lu la tawn ai myit mada ai lam kaw na htak mat hkra ari jahkrat kau na ahkang jaw mai na myit dai n rai. Ndai Kabu Gara Shiga a majaw ngai Pawlu gaw magam gun wa langai mi tai wa ni ai, dai Kabu Gara Shiga chyawm gaw mungkan ting hta masha shagu hpe hkaw tsun dan ai mungga rai nga ai.

²⁴Ya chyawm gaw, nanhte a matu mara ngai hkrum ai tsin-yam tsindam hta kabu gara nga nngai. Hkristu gaw shi a hkum hkrang ngu ai Hpung a matu nni nkri hkrum nu ai hte maren, ngai gaw nye a hkum hkrang a matu nni nkri hkam ai hku nna Hkristu a hkum hkrang ngu ai dai Hpung a matu hkam na naw ngam nga ai nni nkri ni hpe ngai hkan shatup karum nga nngai.

²⁵Nanhte a matu mai kaja ai lam galaw u ga, Karai Kasang gaw Hpung a magam gun wa langai mi hku nna ngai hpe san da ai hkrum ni ai. Ngai hpe ap ya da ai lit gaw dai Kabu Gara Shiga hpe ngam da ai lam n nga hkra hkaw tsun na lam rai nga ai.

²⁶Shi gaw dai sung htum nna makoi magap da ai mungga hpe mungkan hta nga ai shinggyim masha ni n chye hkra chyaloi nhkoi prat mi hte prat mi du hkra makoi magap da wu ti mung, ya gaw shi a amyu masha ni hpe shadan dan nu ai.

²⁷Karai Kasang a shatawng shada ai lam gaw, masha amyu baw shagu a matu hpung shingkang rawng nna mauhpa hte sung htum ai mungga a lam shi a amyu masha ni hpe shadan dan na lam rai nga ai. Dai sung htum ai mungga gaw, Hkristu nan nanhte a kraw lawang hta shanu nga ai lam rai nga ai; lam mi hku tsun ga nga yang, nanhte gaw Karai Kasang hte rau dai hpung shingkang hpe hkam la lu na lam rai nga ai.

²⁸Dai majaw anhte gaw masha shagu hpe Hkristu a lam hkaw dan ga ai. Masha shagu hpe Hkristu hta myit su kunghpan ai Hkristan masha langai hkrai hku nna Karai Kasang a man de shashawn lu u ga, anhte gaw hpaji byeng-ya nga manga hte shanhte hpe sadi jaw, sharin achyin nga ga ai.

²⁹Shing rai dai lam byin lu hkra, ngai gaw Hkristu jaw ya ai mauhpa n-gun atsam hte jam jau hkam nna galaw shakut nngai. Dai n-gun atsam ngai hta amu galaw nga ai gaw, ngai galaw ai bungli hta dan dawng nga ai.