Read Jinghpaw Common Language Bible 2009 KOLOSE 3 Bible Online

KOLOSE 3 - Jinghpaw Common Language Bible 2009 bible

KOLOSE 3

¹Nanhte gaw Hkristu hte rau hkrung sharawt la ai hkrum manit dai rai nna, Karai Kasang a hkra maga e dung ningngai nga ai Hkristu nga ai sumsing lamu na arai ni hpe ra marit nga mu.

²Ga ntsa e nga ai arai ni hpe n manoi nga ai sha ningtsa na arai ni hpe myit manoi nga mu.

³Hpa majaw nga yang, nanhte gaw si mat sai ni rai nna, nanhte a asak gaw Hkristu hte rau, Karai Kasang hta kyem makoi da nga sai.

⁴Nanhte a asak majing gaw Hkristu rai nna, shi bai dan pru ai shaloi anhte mung shi hte rau hpung shingkang hta dan pru na raga ai.

⁵Dai re ai majaw anhte a kata e amu galaw nga ai mungkan ga a ra marin ai myit ni, hpye ai amu, n tsawm n htap awu asin re ai amu, ngang kayut ai, n hkru n hkra re ai marin marit ai hte lawhpa ai (lawhpa ai gaw gawkngu naw ai amyu mi rai nga ai.) lam re ai ni hpe nanhte sat kau lu na rai myit dai.

⁶Shing re ai lam ni a majaw shi hpe n madat n mara ai ni a ntsa e Karai Kasang a pawt sindawng ai gaw du na ra ai.

⁷Moi shawng de nanhte a asak hkrung lam ting hpe dai lam ni e dang ka-up tawn mu ai shaloi e, nanhte nan mung dai zawn re ai yubak mara ni hpe galaw let asak hkrung lai wa manit dai.

⁸Ya chyawm gaw, masin pawt ai, n yun bu ai, n ju n dawng ai myit, mara matsing ai, shatan nhkan ai hte ga kinsha re ai ni yawng hte hpe yeng seng kau mu.

⁹Shada da masu magaw ga hkum tsun myit; hpa majaw nga yang, dai gawng shingyan dingsa hte hpawn tinang a arawn alai ni hpe nanhte raw kau nna gawng shingyan ningnan hpe dagraw la manit dai.

¹⁰Hpan da ai Karai Kasang gaw dai masha ningnan hpe Karai Kasang shi a hkrang sumla hte grau grau bung wa hkra galaw lajang nga dingyang rai nga ai. Shing rai galaw ai gaw nanhte dai Madu hpe hkum tsup hkra chye chyang wa lu na matu rai nga ai.

¹¹De a majaw, Heleni masha hte Yuda masha, matu gadoi hkam ai wa hte matu gadoi n hkam ai wa, karing karang masha, masha chyazai chyalam ni, mayam ni, shanglawt masha ni ngu nna shanhte a lapran e naw ginhka chyai nga na lam mi n nga sai. Hkristu gaw nanhte yawng mayawng a kraw lawang hta shanu nga ai rai nna Hkristu gaw yawng mayawng hta ahkyak dik ai wa mung rai nga ai.

¹²Nanhte gaw Karai Kasang a masha ni rai nga myit dai rai nna, shi gaw nanhte hpe tsaw ra nna shi a matu mara lata la hkrum ai ni rai nga myit dai. Dai re ai majaw nanhte gaw n ja n hpra ai, matsan dum lama ai, myit nem ai, sumnung shingdi ai myit galu kaba ai hpe bu hpun dagraw nga mu.

¹³Nanhte hta marai langai ngai a ntsa e mara shagun shara nga ai shaloi shada da hkam sharang ai hte shada da mara raw dat hkat nga mu. Dai Madu gaw nanhte hpe mara raw dat kau ya manit dai hte maren, nanhte shada da mung mara raw dat lu na rai myit dai.

¹⁴Dai atsam marai ni yawng a ntsa e hkum tsup re ai myit hkrum kahkyin gumdin lam byin hkra arai yawng mayawng hpe gyit hkang ya ai tsaw ra myit hpe kahtap hpun nga mu.

¹⁵Hkristu jaw ya ai ngwi pyaw ai gaw nanhte a myit masin hta e a-up nga nna, dai gaw nanhte a daw dan hparan ai lam ni hta lam matsun madun nga u ga, hpa majaw nga yang, dai ngwi pyaw ai lam hpe hkam sha lu na matu Karai Kasang gaw nanhte hpe hkum hkrang langai sha hku shaga la manit dai; dai re ai majaw chyeju adum nga mu.

¹⁶Hkristu a mungga gaw nanhte a myit masin hta hpring tsup hkra shanu nga u ga. Hpaji byeng-ya nga manga hte nanhte shada da sharin achyin, matsun madun hkat nga mu. Shakawn kungdawn ga, mahkawn mangoi ai ga ni, Wenyi hte seng ai laka ga ni hte nanhte a kraw lawang hta Karai Kasang hpe chyeju dum ai hte mahkawn mangoi nga mu.

¹⁷Dai rai nna nanhte hpa galaw ti mung, mung sumtu tsun ai hta, magam bungli lam hta Madu Yesu a mying nsang gang let, yawng mayawng hte hpe agalaw nga nna, shi a marang e Kawa Karai kasang hpe chyeju shakawn nga mu.

¹⁸Madu jan ni e, tinang a madu wa ni hkang ai hku hkan nga mu, dai gaw Hkristan langai mi hku nna dai Madu hta hkan sa na matu sut ai lam rai nga ai.

¹⁹Madu wa ni e, nanhte a madu jan ni hpe tsaw ra nga nna, shanhte hpe kajet kaje hkum rai nga myit.

²⁰Ma ni e, kanu kawa ni a ga hpe tut nawng madat mara nga mu: dai gaw Karai Kasang sharawng awng ai Hkristan ni galaw ang ai amu rai nga ai.

²¹Kanu kawa ni e, nanhte a kasha ni hpe masin hkum shapawt myit; shing rai yang shanhte myit kaji myit daw mat na mara ai.

²²Mayam ni e nanhte a shinggyim madu ni hpe lam shagu hta madat mara nga mu: nanhte gaw myi man pa mayu ai hte shanhte a man e ga madat ai hku n re ai sha, Karai Kasang hpe hkrit hkungga let shanhte a ga hpe san seng ai myit hte madat mara nga mu.

²³Nanhte hpa galaw ti mung, masha a matu galaw ai zawn n rai, Karai Kasang a matu galaw ai zawn, nanhte a myit masin yawng hte ashaja nga mu.

²⁴Karai Kasang gaw shi a amyu masha ni hpe ga ndat tawn da ai shaman chyeju sali wunli hpe nanhte hkam la na rai nga myit dai hpe galoi mung adum nga mu. Hpa majaw nga yang, Hkristu chyawm gaw nanhte daw jau nga ai Madu majing rai nga ai.

²⁵N ding n man ai hku galaw ai masha shagu hpe shi galaw ai n ding n man ai amu a matu bai htang jaw ai hkrum na ra ai. Hpa majaw nga yang, Karai Kasang gaw tara jeyang ai lam hta myi man tau yu ai lam n nga lu ai.