Read Jinghpaw Common Language Bible 2009 KOLOSE 4 Bible Online

KOLOSE 4 - Jinghpaw Common Language Bible 2009 bible

KOLOSE 4

¹Madu ni e, nanhte mung sumsing lamu e Madu langai mi lu nga myit dai hpe myit dum let, tinang a mayam ni hpe shangun marang sha ai lam ni hta ram ging ai hte tara ding ai hku galaw nga mu.

²Akyu hpyi ai hta ayan shakut sharang rai nga nna, amaja nga ai let Karai Kasang hpe chyeju adum nga mu.

³Madu Yesu a sung htum ai mungga a lam hkaw tsun lu na ahkaw ahkang ginshan kaja Karai Kasang anhte hpe jaw u ga, anhte a matu mung akyu ahpyi ya nga mi. Hpa majaw nga yang, Hkristu a sung htum ai mungga hpe hkaw tsun ai a majaw ya e ngai htawng rawng nga nngai.

⁴Dai sung htum ai mungga hpe ngai hkaw tsun dan na lit lu nga nngai hte maren asan sha hkaw tsun lu n ga, akyu hpyi ya mi.

⁵Nanhte lu ai ahkaw ahkang shagu hpe ga n hkrat hkra atsawm sha jai lang let garai n kam n sham ai ni a man e hpaji byeng-ya hte hkawm nga mu.

⁶Nanhte tsun ai ga gaw galoi mung jum shum ai zawn na ra shing-nyi rawng nna chyeju masa hku myit lawm shangun ai ga rai nna san ai masha shagu hpe jaw ai mahtai jaw lu na matu shajin da nga mu.

⁷Anhte a tsaw ra ai hpu nau wa, kangka re ai magam gun wa, Madu a magam amu hta shingdep shingtau shangun ma rai nga ai Tuhkiku gaw, ngai hte seng ai lam shiga yawng mayawng nanhte hpe shana ya na marin dai.

⁸Anhte yawng kaning rai nga ga ai mabyin masa lam nanhte hpe tsun dan ai hte nanhte a myit masin shangwi shapyaw ai hkrum lu malit ga, ngai shi hpe nanhte hpang de shangun dat se ai.

⁹Shi the rau nanhte kaw na rai nga ai kangka re ai tsaw ra ai hpu nau wa Onesimu hpe mung ngai shangun dat se ai. Shan gaw nang na byin mabyin hte hpe nanhte hpe tsun shana ya na mara ai.

¹⁰Nye a bawng dung manang Aristarku nanhte hpe shakram dat ai. Bai nna Barnaba a kahkri Marku mung nanhte hpe shakram dat ai. (Nanhte hpang de Marku du sa wa ai shaloi hkap hkalum la mu ngu nna matsun dat ai lam ni hpe nanhte lu la tawn chyalu rai manit dai.)

¹¹Yustu ngu nna mung shamying ai Yesu mung, nanhte hpe shakram dat ai. Ndai marai masum chyu sha kam sham ai Yuda masha ni rai nna, Karai Kasang a mungdan a matu ngai hte rau amu galaw ai nye a shingdep shingtau ni rai nga ma ai hte ngai hpe karum dik ai ni rai ma ai.

¹²Nanhte kaw na rai nga ai Hkristu a mayam wa Epahpra gaw nanhte hpe shakram dat ai. Shi gaw nanhte a matu myit rawt sharawng awng ai hte akyu hpyi nga ai. Nanhte gaw Karai Kasang a myit ra ai lam hta tup hkrak madat mara hkan sa nna myit su kunghpan ai hte kam sham ai lam hta atsawm sha myit hkawn ai Hkristan tai nga let, dinggrin lahpran tsap nga lu myit ga, shi gaw Karai Kasang kaw hpyi nem ya nga ai.

¹³Shi gaw nanhte a matu mara mung, Ladoki hte Herapoli e nga ai ni a matu mara mung, bungli hpe nhtum nni galaw shakut nga ai gaw, ngai nan shi a matu sakse hkam nga nngai.

¹⁴Anhte a tsaw ra ai tsi sara Luka yan Dema gaw nanhte hpe shakram dat ma ai.

¹⁵Ladoki e nga ai hpu nau ni hte Nimhpa hte shi a nta e hkrum zup nna nawku zuphpawng ai hpung hpe shakram ya mi.

¹⁶Ndai shagun dat ai laika hpe nanhte hti ngut jang, Ladoki hpung masha ni hpe mung hti shangun mu. Dai hte maren Ladoki hpung ni kaw nna bai shalai shagun dat na ra ai nye a laika hpe mung nanhte hti yu mu.

¹⁷Dai Madu a amu hta gun hpai na matu ap da hkrum ai hpe ngut hkra gun hpai na matu Arhkipo hpe tsun shana mu.

¹⁸Ngai Pawlu nan nye a lata hte ndai shakram ai ga ni hpe ka dat nngai. Ngai htawng e bawng dung nga ai hpe nanhte hkum malap kau nga myit! Karai Kasang a chyeju gaw nanhte hte rau anga nga u ga law.