Read Jinghpaw Common Language Bible 2009 1 HTESALONI 2 Bible Online

1 HTESALONI 2 - Jinghpaw Common Language Bible 2009 bible

1 HTESALONI 2

¹Hpu nau ni e, nanhte hpang de anhte sa ai lam gaw kaman lila n rai nga ai lam nanhte nan chye nga myit dai.

²Anhte gaw nanhte nga ai Htesaloni mare de garai n sa yang, Hpilipi mare e anhte hpe gara hku zingri zingrat ai hte asawng asang di ai hkrum sha saga ai hpe nanhte chye nga myit dai. Shing rai nhtan shai ninghkap ai lam law law nga ti mung, nanhte hpe Karai Kasang kaw na Kabu Gara Shiga tsun dan lu na matu anhte a Karai Kasang gaw anhte hpe nden marai jaw da mani ai.

³Anhte gaw shut ai lam hte n san n seng ai maw mawn ai myit hte langai ngai hpe hkalem hkalau mayu ai myit hte, nanhte hpe shadum jahprang ga ai n rai.

⁴Shing rai na malai anhte gaw Karai Kasang tsun shangun ai hte maren galoi mung atsun nga ga ai; hpa majaw nga yang, Karai Kasang gaw anhte hpe gingdan ai ni re ai lam jep sagawn mu chye lu sai rai nna, dai Kabu Gara Shiga hkaw tsun na matu kam da mani ai. Anhte gaw masha hpe sharawng awng shangun na shakut ga ai n rai, anhte a maw mawn ai myit hpe manaw jep yu ai Karai Kasang hpe sharawng awng shangun na matu she shakut ga ai.

⁵Hpa majaw nga yang, nanhte atsawm sha chye nga myit dai hte maren, anhte gaw nanhte hpang de n teng n man ai hku asawng hkalem ai ga tsun shaga let, shing n rai nammak lawhpa ai lam hpe magap ai ga ni lang let sa ga ai n rai. Dai lam hta Karai Kasang nan sakse rai nga ai.

⁶Anhte gaw nanhte kaw na mung, kaga ni kaw na mung, masha kadai kaw na mung shakawn shagrau ai lu la hkra shakut ga ai n rai.

⁷Anhte gaw Hkristu a kasa ni re ai hte maren ahkaw ahkang hpe lang nna tsun shaga lu ga ai. Rai ti mung anhte gaw, nanhte hte rau nga nga ai ten hta, kasha ni hpe lanu lahku ai kanu zawn sumnung ai hte lanu lahku ga ai.

⁸Nanhte gaw anhte a grai nja nhpra re ai ni tai wa manit dai! Karai Kasang kaw na Kabu Gara Shiga sha n rai, anhte a asak hpe pyi garan jaw na jin jin rai nga ga ai.

⁹Hpu nau ni e anhte gade daram amu bungli galaw shakut shaja lai wa saga ai hpe kaja wa nanhte dum nga myit dai. Nanhte hpe hpa lit n shali n shayak sha u ga, anhte gaw anhte a kan bau bungli hpe shani shana galaw shakut let Karai Kasang a Kabu Gara Shiga hpe hkaw tsun ga ai.

¹⁰Kam sham nga ai ni nanhte a man e anhte a arawn asam san seng nna teng man ai hte mara n rawng nga ai gaw anhte a matu nanhte nan sakse ni rai nga myit dai, dai hte maren Karai Kasang mung sakse rai nga ai.

¹¹Kawa gaw tinang a kasha ni hpe yu gawn lajang ai zawn, nanhte langai hte langai hpe anhte yu gawn lajang lai wa saga ai lam nanhte chye nga myit dai.

¹²Anhte gaw nanhte hpe n-gun jaw ai lam hte shadaw shalan ai lam galaw saga ai. Shi a mungdan hta shang sha lu na hte hpung shingkang hkam la lu mu ga, nanhte hpe shaga la ai Karai Kasang hpe sharawng awng shangun ai asak hkrung lam hta e hkawm sa nga na matu anhte matut manoi shadut jahkat saga ai.

¹³Bai Karai Kasang a chyeju hpe n sim n sa shakawn na lam kaga langai mi naw nga nga mali ai. Nanhte hpang de anhte dai Karai Kasang a mungga sa hkaw tsun dan ai shaloi masha a mungga hpe zawn n rai, Karai Kasang a mungga re ai hku nanhte na nna kam sham ai hte hkap la manit dai. Dai mungga gaw nanhte kam sham ai ni a kata hta bungli galaw ya nga ai majaw Karai Kasang a mungga majing nan rai nga ai.

¹⁴Hpu nau ni e nanhte hta byin hkrum hkra ai lam ni gaw, Yuda mung na Karai Kasang a Hpung ni rai nga ai Hkristu a masha ni hta mung hkrum hkra nga ma ai. Nanhte gaw tinang a buga masha ni a lata hta zingri zingrat hkrum ai zawn, shanhte mung Yuda masha ni a lata hta hkrum nga ma ai.

¹⁵Yuda masha ngu ai ni gaw Madu Yesu hpe mung, myihtoi ni hpe mung, sat kau ai ni rai nna anhte hpe mung zingri zingrat ai ni rai ma ai. Shanhte gaw Karai Kasang sharawng awng na hku n galaw ma ai! Masha shagu a matu n htan shai ai hpyen tai ma ai.

¹⁶Anhte maigan masha ni hpe shanhte kaning rai hkye hkrang la hkrum lu na lam hkaw tsun ai hpe pyi Yuda masha ni hkum shingdang shakut ma ai. Ndai lai hku nna shanhte shut hpyit nga ai yubak mara ni hpe hkum hkra galaw manu ai. Dai rai nna hpang jahtum e Karai Kasang a pawt sindawng ai gaw shanhte a ntsa de du hkrat wa sai!

¹⁷Anhte mung, hpu nau ni e, myit masin hte n rai, hkum hkrang hte tawng marang mi sha nanhte hte daw hka wa saga ai rai nna, nanhte hpe grai myit dum marit nga ga ai hte bai hkrum lu na matu grai shakut nga ga ai.

¹⁸Anhte gaw nanhte hpang de bai wa mayu ga ai. Ngai hkum nan nanhte hpang de bai sa wa na matu lahkawng lang shakut yu ni ai, rai ti mung Satan gaw anhte hpe ban hkum shadang kau mi ai.

¹⁹Anhte a Madu Yesu bai du sa ai shaloi, shi a man e kaga kadai n rai, nanhte hpe sha mahta nna anhte a myit mada shara, kabu gara shara hte awng dang ai lam a matu gumrawng na janmau rai nga ai.

²⁰Kaja wa nanhte gaw anhte a hpung shingkang hte kabu gara shara rai nga myit dai.