Read Jinghpaw Common Language Bible 2009 1 HTESALONI 3 Bible Online

1 HTESALONI 3 - Jinghpaw Common Language Bible 2009 bible

1 HTESALONI 3

¹Dai rai nna, anhte n sharang lu saga ai majaw, Ahten mare e anhte hkrai hti nan nga na matu myit daw dan nhtawm,

²Hkristu a Kabu Gara Shiga hkaw tsun ai hta anhte rau magam bungli galaw nga ai anhte a hpu nau wa Timohti hpe shangun dat ga ai.

³Nanhte hta na kadai mung ndai ya hkrum hkra nga ai zingri zingrat lam ni a majaw makam masham hta kangi kanga n rai myit ga, nanhte hpe shadaw shalan n-gun jaw na matu, nanhte hpang de shi hpe shangun dat ga ai: Ndai zingri zingrat ai lam ni hpe anhte hkrum hkra nga ai gaw, anhte a matu Karai Kasang a yaw shada ai lam daw chyen mi rai nga ai ngu ai hpe nanhte nan chye nga myit dai.

⁴Hpa majaw nga yang, anhte gaw zingri zingrat hkrum sha na raga ai lam, nanhte hte rau anhte naw nga nga ai ten kaw nna nanhte hpe tsun sadi jaw magang saga ai. Dai hte maren hkrak sha ya byin wa sai hpe nanhte atsawm sha chye nga myit dai.

⁵Ngai matut nna n dang la ni ai majaw, nanhte a makam masham gara hku rai nga ai lam mu chye lu na matu Timohti hpe ngai shangun dat we ai. Kaja wa nanhte gaw Nat e gunglau ai de hkan mat wa nna, anhte a shakut shaja ai hte galaw da ai amu ni kaman lila n tai shangun mayu ga ai!

⁶Ya chyawm gaw, Timohti gaw anhte hpang de bai du wa ra ai rai nna, nanhte hta makam masham hte tsaw ra ai myit law htam wa sai lam kabu gara hkalum la mai ai shiga gun wa ya mi ai. Nanhte gaw anhte hpe tut nawng e atsawm sha myit dum tsaw ra nga myit dai hta n ga, nanhte hpe anhte grai mu hkrum mayu ga ai hte maren, nanhte mung anhte hpe mu hkrum mayu nga myit dai lam anhte hpe wa tsun dan mi ai.

⁷Dai rai nna hpu nau ni e, anhte ru yak jam jau hte nni nkri hkrum hkra nga ai ten hta nanhte a lam na lu ai majaw n-gun lu la ga ai. Dai gaw nanhte a makam masham a majaw n-gun lu la ai lam rai nga ai.

⁸Hpa majaw nga yang, nanhte Madu Yesu hta langai sha tai nna asak hkrung ai lam hta ngang ngang kang kang tsap nga ai majaw myit dik ai hku hkrung nga lu saga ai.

⁹Ya chyawm gaw, nanhte a jaw e anhte a Karai Kasang hpe chyeju dum shakawn lu saga ai. Nanhte a majaw Madu a man e anhte lu la ai kabu gara ai lam a matu mara, anhte shi hpe chyeju dum shakawn ga ai.

¹⁰Anhte gaw nanhte hpe myi man chyaw mu hkrum lu na hte, nanhte a makam masham hta naw ra nga ai hpe shatup shatsup na matu, anhte a myit masin yawng hte shani shana hpyi nem nga ga ai.

¹¹Anhte a Wa Karai Kasang shi nan hte Madu Yesu Hkristu gaw anhte a matu nanhte hpang de sa wa na lam lajang ya u ga.

¹²Nanhte shada da a ntsa e mung, masha yawng mayawng a ntsa e mung, nanhte tawn da ai tsaw ra myit gaw, nanhte a ntsa e anhte tawn da ai tsaw ra myit zawn grau grau galu kaba wa shangun na matu Karai Kasang nanhte hpe karum ya u ga law.

¹³Ndai lam hku nna shi nanhte hpe shadaw shangang na ra ai. Anhte a Madu Yesu gaw shi a chyoi pra ai ni yawng hte rau bai du sa ai shaloi e, nanhte gaw anhte a Kawa Karai Kasang a man e hkum tsup nna chyoi pra san seng ai ni tai wa na marin dai.