Read Jinghpaw Common Language Bible 2009 YAWSHU 10 Bible Online

YAWSHU 10 - Jinghpaw Common Language Bible 2009 bible

YAWSHU 10

¹Yawshu gaw Yerihko mare hte de a hkawhkam hpe shamyit kau wu ai zawn Ai mare hte de a hkawhkam hpe mung tsep kawp sat shamyit nna gasat dang kau nu ai hpe mung, Gibeon masha ni hte Israela amyu masha ni ngwi pyaw sim sa lam galaw la nna, shanhte hte nga nga ma ai lam hpe mung Yerusalem [1] Hkawhkam Adonizedek na wu ai.

²Gibeon gaw hkawhkam dung ai mare zawn kaba nga ai hte Ai mare hta grau kaba nga ai rai nna dai mare na lasha ni kung ai share shagan masha ni rai nga ma ai majaw, ndai aten hta Yerusalem mare masha ni ja ja hkrit kajawng nga ma ai.

³Dai rai nna, Yerusalem Hkawhkam Adonizedek gaw Hebron Hkawhkam Horam, Yamut Hkawhkam Piram, Lahkisha Hkawhkam Yahpia, Eglon Hkawhkam Debira ni hpang de shiga shana dat wu ai.

⁴“Gibeon mare masha ni gaw Yawshu hte Israela amyu masha ni hte ngwi pyaw sim sa lam galaw da manu ai majaw Gibeon hpe gasat na matu ngai hpe sa karum la mi.”

⁵Dai Amori hkawhkam manga hte ngu na Yerusalem, Hebron, Yamut, Lahkisha hte Eglon hkawhkam ni n-gun galung la nna Gibeon hpe jawm wang nna htim gasat ma ai.

⁶Gibeon masha ni mung Gilgala e dap jung nga ai Yawshu hpang de masha shangun dat wu ai: “Anhte hpe hkum kau da mi! Anhte hpe karum la na ya jang sa wa marit! Anhte hpe hkye hkrang la mi! Bum ga na Amori hkawhkam ni yawng n-gun galung la let anhte hpe gasat nga masai.

⁷Dai rai nna, Yawshu hte shi a hpyen luksuk ting, magrau grang ai hpyen hpung lawm ai ni hpe woi let Gilgala kaw nna pru sa wa ma ai.

⁸Dai MADU gaw Yawshu hpe, “Shanhte hpe hkum hkrit et; ngai nang hpe awng padang jaw ya sade ai. Shanhte hta na kadai mung nang hpe hkap daw lu na ma ai n rai,” ngu nna tsun wu ai.

⁹Yawshu hte shi a hpyen luksuk ni gaw Gilgala kaw nna Gibeon du hkra shana tup lung wa nhtawm Amori masha ni hpe akajawng sha wa htim gasat dat ma ai.

¹⁰Dai MADU mung Amori masha ni hpe dai Israela hpyen luksuk ni a man e kajawng kaja byin shangun nhtawm Israela amyu masha ni mung shanhte hpe Gibeon e sat kau ma ai; shanhte gaw Bet Horon de lung wa ai uhkan hku hkan nna Azeka hte Makeda du hkra shachyut gasat kau ma ai.

¹¹Israela hpyen luksuk ni a lata kaw na uhkan hku Amori masha ni ru htaw yu wa nga ma yang, dai MADU gaw lamu de na sin tawng kaba jahkrat bun ai rai nna Azeka mare lam dingyang shanhte adup hkrum ma ai. Israela amyu masha ni sat kau ai hta sin tawng hte adup sat hkrum ai mahtang grau law nga ai.

¹²Dai MADU gaw Amori hpyen ni hpe dang kau ai awng padang Israela amyu masha ni hpe jaw ya ai shani, Yawshu gaw dai MADU hpe ga shaga wu ai. Shi gaw Israela amyu masha ni a man e ning ngu tsun wu ai: “Jan e, Gibeon a ntsa e naw la u; Shata e, Aiyalon Kadit e naw hkring u.”

¹³Dai amyu gaw gumlau hpyen ni hpe gasat dang kau lu ai aten du hkra, ajan gaw ala nga nna, shata mung hkring nga ai. Ndai a lam Yashara a Laika hta ka da nga ai. Ajan gaw lamu ka-ang e hkring nan nga nna shani tup jan n shang ai nga nga ai.

¹⁴Dai MADU gaw masha a ga madat ya nna, dai zawn re ai nhtoi lani mi mung, shawng de, hpang de n byin yu nga ai. Dai MADU chyawm gaw Israela ni a hpang maga de gasat ya nga ai.

¹⁵Dai hpang, Yawshu hte shi hpyen luksuk ni Gilgala dap de bai nhtang mat wa ma ai.

¹⁶Dai Amori hkawhkam manga hte gaw hprawng mat wa nhtawm Makeda ginlawng hku e makoi rawng nga ma ai.

¹⁷Shanhte makoi rawng nga ma ai hpe marai langai ngai e sa mu nna Yawshu hpe wa tsun dan wu ai.

¹⁸Yawshu gaw, “Ginlawng hku mahka e nlung kaba ni hte galau pat nna sin masha tawn da mu; rai ti mung nanhte nan dai hkan e hkum nga nga myit;

¹⁹rai ti mung gumlau hpyen ni hpe shachyut nna shingdu hku shanhte hpe htim gasat mu; shanhte hpe shanhte a mare ni de hkum shang shangun myit! Dai MADU na a Karai Kasang shanhte hpe dang kau lu ai awng padang nang hpe jaw ya nit dai.

²⁰Yawshu hte Israela amyu masha ni chyawm gaw hpyen ni hpe htau sat kau mu ti mung, nkau mi mahtang mare bunghku kata de hprawng shingbyi shara mu tam ai hte sat kau n hkrum nga ma ai.

²¹Shaloi Yawshu a masha ni yawng mung shi nga ai Makeda dap de shim lum ai hte nhtang wa ma ai. Dai mung hta e Israela amyu masha ni hpe grang dakat gwi ai masha langai mi mung n nga nga ai.

²²Dai hpang Yawshu gaw, “Dai ginlawng hku chyinghka hpaw nna dai hkawhkam manga hpe ngai hpang de woi shapraw wa mi,” ngu nna tsun wu ai.

²³Dai rai nna, ginlawng hku chyinghka hpaw nhtawm Yerusalem, Hebron, Yamut, Lahkisha hte Eglon hkawhkam ni hpe shapraw la nna Yawshu hpang de woi wa ya ma ai.

²⁴Dai hpang Yawshu gaw Israela amyu masha ni yawng hpe shaga la nhtawm shi hte rau hpyen gasat ai du salang ni hpe dai hkawhkam ni a du kabye ya na hkang dat wu ai hte maren, shanhte galaw ma ai.

²⁵Dai hpang Yawshu gaw shi a du salang ni hpe, “Hkum hkrit nga myit, myit hkum daw nga myit. Dai MADU gaw nanhte a gumlau hpyen ni yawng hpe ning rai galaw na rai nga ai majaw myit jahkut daw dan nna kam hpa nga mu,” ngu nna tsun wu ai.

²⁶Dai hpang, Yawshu gaw hkawhkam ni hpe sat kau nhtawm hpun manga hta noi da wu ai. Shanhte a si mang ni hpe shana de du hkra noi da wu ai.

²⁷Jan du jang she, Yawshu hkang dat ai hte maren hpun kaw na jahkrat la nhtawm shanhte makoi nga ai ginlawng hku hta nan kabai bang kau ai hte ginlawng hku hpe nlung kaba hte pat da ma ai. Dai gaw dai yang e dai ni du hkra naw nga nga ai.

²⁸Dai shani jang, Yawshu gaw Makeda mare hte de a hkawhkam hpe gasat la wu ai rai nna mare e nga ai masha shagu hte hpe shi sat kau wu ai majaw, hkrung nga ai masha langai mi mung n ngam nga ai. Shi gaw Yerihko hkawhkam wa hpe shagrawt kau wu ai zawn Makeda hkawhkam wa hpe mung shagrawt kau wu ai.

²⁹Shaloi Yawshu hte shi a luksuk ni Makeda mare kaw na Libna mare de sa wa nhtawm dai mare hpe gasat ma ai.

³⁰Dai MADU gaw mare dai hte hkawhkam wa hpe Israela masha ni a lata hta awng padang jaw ya mu ai rai nna dai mare na masha langai mi hpe mung n ngam da ai sha sat kau mu ai. Yerihko hkawhkam wa hpe shagrawt kau ai zawn dai hkawhkam wa hpe mung shagrawt kau mu ai.

³¹Dai hpang, Yawshu hte shi a luksuk ni gaw Libna mare kaw na Lahkisha mare de matut wang da nhtawm htim gasat ma ai.

³²Dai MADU gaw Lahkisha mare hpe mung, Israela amyu masha ni a lata hta awng padang jaw ya wu ai rai nna hpang shani e dang la kau ma ai. Libna mare hpe hpya kau ma ai zawn dai mare na masha langai mi pyi n ngam mat hkra sat shamyit kau ma ai.

³³Gezera Hkawhkam Horam gaw Lahkisha mare hpe karum na nga lung wa ai hpe Yawshu gaw dai hkawhkam hte shi a masha nlang hte hpe mung langai mi pyi n ngam mat hkra hkap sat kau wu ai.

³⁴Dai hpang, Yawshu hte shi a luksuk ni Lahkisha mare kaw na Eglon mare de matut sa wang nhtawm dai mare hpe gasat kau ma ai.

³⁵Dai shani jang, dai mare hpe shanhte dang la lu ma ai rai nna, Lahkisha mare hpe shanhte hpya kau mu ai zawn dai mare na masha shagu hte hpe sat kau ma ai.

³⁶Dai hpang, Yawshu hte shi a luksuk ni Eglon mare kaw na bum lam hku lung wa nhtawm Hebron mare hpe gasat ma ai.

³⁷Dai mare hte de a hkawhkam hpe mung, de a grup yin na mare ni hpe mung, dai hta nga ai masha nlang hte hpe mung sat kau ma ai. Eglon hpe hpya kau ai zawn dai mare hte dai hta nga ai ni nlang hte hpe langai mi mung n ngam hkra atsai awai shamyit kau ma ai.

³⁸Dai hpang, Yawshu hte shi a luksuk ni gaw Debira mare de nhtang wa nna gasat ma ai.

³⁹Dai mare hte de a hkawhkam hpe mung, de a grup yin na mare ni yawng hpe mung gasat la wu ai. Shanhte gaw dai mare hta nga ai masha shagu hte hpe sat kau ma ai. Yawshu gaw Hebron, Libna hte de a hkawhkam hpe shagrawt kau wu ai zawn Debira hte de a hkawhkam hpe mung shagrawt kau wu ai.

⁴⁰Yawshu gaw mungdan ting ngu na bum ga na hkawhkam ni, sinpraw maga na kadit ni, sinna maga de na layang ni, dingdung maga de na hkun hkraw ai shara mahkra hpe gasat la wu ai. Shi gaw masha kadai hpe mung n ngam da ai sha sat kau wu ai; Ndai gaw dai MADU Israela a Karai Kasang hkang da ai hte maren galaw ai amu rai nga ai.

⁴¹Yawshu a majan ginra ngu na Kadesha Barnea kaw na dingda maga hkin-gau makau na Gaza du hkra, Goshen mung ting hte dingdung maga Gibeon du hkra gasat la lu wu ai.

⁴²Dai MADU Israela a Karai Kasang gaw Israela a matu gasat ya nga ai majaw, Yawshu gaw dai hkawhkam ni yawng hte shanhte a lamu ga ni hpe kalang dat gasat la lu wu ai.

⁴³Dai hpang, Yawshu hte shi a luksuk ni Gilgala dap de bai nhtang mat wa ma ai.