Read Jinghpaw Common Language Bible 2009 YAWSHU 14 Bible Online

YAWSHU 14 - Jinghpaw Common Language Bible 2009 bible

YAWSHU 14

¹Ndai gaw Yawdan hka a sinna hkran de nga ai Hkanan mung hpe Israela amyu masha ni kaning rai karan la ai lam rai nga ai. Hkinjawng Eleaza, Nun a kasha Yawshu, Israela amyu bawsang, lakung lama ni a ningbaw ni hpe dai masha jahpan hta hkan nna karan ya mu ai.

²Dai MADU Mawshe hpe hkang da nu ai hte maren, dai amyu bawsang jahku hte chyen mi hpe hpaida da let Yawdan hka a sinna hkran na lamu ga karan ya wu ai.

³Yawdan hka a sinpraw hkran na lamu ga hpe amyu bawsang lahkawng hte chyen mi hpe Mawshe masat ya nu ai. (Yosep a amyu matu mara ni hpe Manashe hte Ehprim amyu bawsang lahkawng hta karan ya nga ai.) Mawshe chyawm gaw Lewi masha ni hpe lamu ga dachyawk mi mung n jaw wu ai. Shing rai jaw na malai, shanhte nga na mare ni hte shanhte lu tawn ai dumsu yam nga hpung a matu udat shara pa layang ni hpe shanhte lu la nga ma ai.

⁵Dai MADU gaw Mawshe hpe hkang da nu ai hte maren, Israela amyu masha ni lamu ga sali karan la ma ai.

⁶Lani mi na aten hta, Yuda amyu bawsang hta na amyu masha nkau mi gaw Gilgala e dap jung nga ai Yawshu hpang de du sa ma ai. Shanhte hta na Kenizi masha Yehpuna a kasha Hkaleb gaw shi hpe, “Dai MADU gaw Kadesha Barnea mare e nang hte nye a lam Karai Kasang a masha Mawshe kaning nga tsun ai hpe nang chye nga ndai.

⁷Dai MADU a shangun kasa Mawshe gaw ndai mungdan hpe kin-yu yu na matu Kadesha Barnea mare kaw nna ngai hpe shangun dat ai hte shi hpe teng man ai shiga bai wa jaw ai shaloi, nye a asak mali shi ning rai nga li ai.

⁸Ngai hte rau lung wa ai masha ni tsun ai mahtang anhte amyu masha ni a myit hpe hkrit kahpra shangun ma ai. Rai ti mung, ngai chyawm gaw dai MADU nye a Karai Kasang a ga hpe sadi sahka hte madat mara hkan sa ni ai.

⁹Dai hte maren, ngai hkan shatup ai majaw, ngai kabye hkawm kau da sai mungdan hta nye a kashu kasha ni hte ngai dai lamu ga sali teng teng lu la na lam ngai hpe Mawshe ga sadi tawn da nu ai.

¹⁰Rai ti mung, ya chyawm gaw yu u, Israela amyu masha ni nam mali hkan e kayin hkawm nga ai nhtoi hte ting hta, dai MADU Mawshe hpe shing nga tsun ai shani kaw nna ya du hkra, dai MADU a ga hte maren, mali shi manga ning tup nye a asak hpe jahkrung da ya ni ai rai nna, ngai hpe yu yu mu, dai ni nye a asak matsat shi manga ning du sali ai.

¹¹Mawshe ngai hpe shangun ai shaloi n-gun lagaw ja nngai zawn dai ni mung ngai n-gun naw ja nga nngai. Hpyen majan amu shing n rai kaga lam maga ga a matu mung, ngai hta n-gun naw ja nga nngai.

¹²Dai rai nna, nye a masha ni hte ngai shiga jaw ai shani hta dai MADU ngai hpe ga sadi jaw ai dai bum ga ngai hpe jaw rit. Dai hta Anakim mying ai dai galu kaba ai masha ni, ngang ai bunghku hte kum da ai mare ni hta nga nga ai lam nang hpe anhte tsun dan saga ai. Dai MADU tsun ai ga hte maren, shi ngai hte rau nga nga u ga, shaloi shanhte hpe ngai shaden shapraw kau lu na nngai,” ngu nna tsun wu ai.

¹³Yawshu gaw Yehpuna a kasha Hkaleb hpe shaman ya nhtawm shi a sali ga matu Hebron mare hpe jaw ya wu ai.

¹⁴Shi gaw dai MADU Israela a Karai Kasang a ga hpe sadi sahka hte madat mara hkan sa wu ai majaw, Kenizi lakung Yehpuna a shadang sha Hkaleb a amyu matu ni Hebron mare hpe naw madu da nga ma ai.

¹⁵De a shawng e Hebron hpe Arba mare ngu nna shamying ma ai. (Arba gaw galu kaba htum ai Anakim amyu rai nga ai.) Ya chyawm gaw dai mungdan hta ngwi pyaw sim sa nga sai.