Read Jinghpaw Common Language Bible 2009 YAWSHU 2 Bible Online

YAWSHU 2 - Jinghpaw Common Language Bible 2009 bible

YAWSHU 2

¹Dai hpang Yawshu gaw Akasia dap kaw na kin-yu lahkawng hpe Hkanan mung na Yerihko mare hpe sa lagyim maram yu na hkang dat wu ai. Shan dai mare de du ai shaloi Rahab mying ai shawa num a nta e sa nga shalai kau ma ai.

²Israela masha nkau mi ndai mung hpe kin-yu yu na nga, shana e du shang wa manu ai lam hpe Yerihko hkawhkam wa na wu ai shaloi,

³shi gaw Rahab hpang de ning ngu shana dat wu ai: “Mungdan ting hpe kin-yu yu na masha ni na a nta e du nga masai! Shanhte hpe shapraw ya mi!”

⁴Shi chyawm gaw, “Lasha nkau mi nye a nta de sa ma ai, rai ti mung shanhte kanang na sa wa ma ai gaw ngai n chye nngai. Mare chyinghka garai n la, jan du wa ai aten hta shanhte bai pru mat wa masai. Shanhte gara de sa mat wa ma ai hpe n chye dat nngai; rai ti mung, shanhte a hpang alawan hkan shachyut myit yang gaw hkan dep lu na rai myit dai,” ngu nna htan wu ai. (Shing ngu dat wu ti mung Rahab chyawm gaw kin-yu yan hpe nta magaw ntsa de woi lung wa nhtawm magaw ntsa e lam tawn ai lachyit sumpan kata e makoi da wu ai.)

⁷Hkawhkam wa a masha ni mare kaw na pru mat wa ai hpang chyinghka la kau wu ai. Shanhte mung Yawdan hka rap ai lam de du hkra Israela kin-yu ni hpe hkan tam ma ai.

⁸Kin-yu ni dai shana garai n yup yang, Rahab gaw dai magaw ntsa de lung wa nhtawm,

⁹shan hpe, “Dai MADU nanhte hpe ndai mungdan jaw kau sai mung, mung masha shagu nanhte hpe hkrit kajawng nga saga ai mung, ngai chye nngai.

¹⁰Nanhte Egutu mung na pru wa myit ai shaloi nanhte a man na Panglai Hkyeng hpe dai MADU kaning rai jahkyet kau ai mung, Yawdan hka a sinpraw hkran na Amori Hkawhkam Sihon hte Oga yan hpe kaning rai sat kau manit dai lam hpe mung, anhte na saga ai.

¹¹Anhte shing re ai lam hpe na ga ai shaloi jang pyi hkrit gari nga saga ai; nanhte a lam na ga ai majaw anhte yawng myit daw mat saga ai. Dai MADU nanhte a Karai Kasang chyawm gaw sumsing lamu lahta tang hta mung, ndai ginding aga ntsa e mung Karai Kasang rai nga ai.

¹²Ngai gaw nan hpe matsan yu dum ai majaw shalawt dat made ai zawn, nye a dinghku masha ni hpe shaprawn da ya na lam, ya jang shi hta dagam da mi. Ngai nan hpe hkrak kam lu na kumla mung ngai hpe jaw da mi.

¹³Nye nu yan wa, nye a kahpu kanau ni hte nye a dinghku masha ni yawng hpe nan hkye la na lam, ga sadi jaw da mi! Anhte hpe hkum sat kau shangun mi!,” ngu nna tsun wu ai.

¹⁴Dai yan mung numsha hpe, “An tsun ai hte maren n galaw shatup ai rai yang, Karai Kasang an a asak dawm la kau ya u ga! An galaw ai amu kadai hpe mung nang n shabrawng ai rai yang, dai MADU anhte hpe ndai mungdan jaw ya mi ai shaloi, na a ngamu ngamai lam hpe an chyeju htang lu na ga ai, ngu nang hpe ga sadi jaw ga ai,” ngu nna tsun ma ai.

¹⁵Rahab gaw mare bunghku hte htep rai galaw da ai nta hta nga ai rai nna dai yan hpe hkuwawt hku sumri hte shayu dat nhtawm,

¹⁶“Bum ga de lung wa masu, dai n rai yang hkawhkam wa a masha ni nan hpe wa mu kau na mara ai. Dai masha ni bai nhtang wa ai aten du hkra dai yang e masum ya tup makoi nga masu. Dai hpang mahtang, nan a hkrun lam matut hkawm lu na rai myit dai,” ngu nna tsun wu ai.

¹⁷Shan mung dai numsha hpe, “Nang an hpe jaw shangun ai ga sadi hpe an shatup lu na ga ai.

¹⁸Ndai gaw nang galaw ra na lam rai nga ai. Yu u, ndai na a mung de anhte gasat shang wa ai shaloi, ya an hpe shayu dat ai hkuwawt hku hta ndai sumri hkyeng noi tawn nna, na nnu yan nwa, na kahpu kanau ni hte nta masha ni yawng hpe na a nta e shaga jahpawng da na rai ndai.

¹⁹Kadai mung nta nhku na shinggan de pru ai wa gaw shi a si hkrung si htan lam gaw shi galaw shut ai mara a majaw rai na ra ai; de a majaw anhte hta lit lu na ga ai n rai; rai ti mung nang hte rau nta nhku e nga ai wa hpe machyi jahkrum ai rai yang chyawm gaw an a lit rai na rai nga ai.

²⁰An galaw ai amu marai langai ngai hpe nang tsun shabrawng kau ndai rai yang chyawm gaw an hpe jaw shangun ai ga sadi hpe shatup lu na saga ai n rai,” ngu nna tsun ma ai.

²¹Dai numsha mung myit hkrum ya ai hte shan hpe dat dat wu ai. Shan pru mat wa ai hpang jang, hkuwawt hku hta sumri hkyeng noi da wu ai.

²²Kin-yu yan mung kawng de lung mat wa nhtawm wa makoi nga ma ai. Hkawhkam wa a masha ni masum ya tup mungdan jut shingnaw du hkra hkan tam ma ti mung, n mu ma ai rai nna shanhte mung Yerihko mare de bai nhtang mat wa ma ai.

²³Dai hpang kin-yu lahkawng yan mung bum ga kaw nna bai yu wa nhtawm Yawdan hka rap nna, Yawshu kaw bai du wa ma ai. Shing rai shan mung byin ai lam yawng mayawng shi hpe tsun dan let,

²⁴“Kaja wa teng teng dai MADU anhte hpe mungdan ting jaw ya mani ai; dai kaw na masha nlang anhte hpe hkrit kajawng nga masai,” ngu nna tsun dan ma ai.