Read Jinghpaw Common Language Bible 2009 YAWSHU 21 Bible Online

YAWSHU 21 - Jinghpaw Common Language Bible 2009 bible

YAWSHU 21

¹Lewi lakung lama ni a ningbaw ni gaw hkinjawng Eleaza, Nun a kasha Yawshu hte Israela amyu bawsang yawng a lakung lama ni a ningbaw ni hpang de sa ma ai.

²Hkanan mung na Shilo mare hta shanhte hpe, “Anhte nga na mare ni jaw ya na matu mung, dai mare ni a grup yin hta anhte a yam nga u hpung ni a matu udat shara jaw ya na matu mung, dai MADU gaw Mawshe a lata hku jaw ya mani ai,” ngu nna tsun ma ai.

³Dai rai nna, dai MADU hkang da nu ai hte maren, Israela amyu masha ni mung Lewi masha ni hpe shanhte madu da ai lamu ga hta na mare hte udat shara ni jaw ya ma ai.

⁴Lewi amyu bawsang hta na Kohat a lakung lama ni lu la na mare ni hpe shawng masat da ya nga ai. Hkinjawng Arun a lakung lama ni a matu masat ya ai mare ni gaw Yuda, Simun, hte Benyamin ni hta na mare shi masum rai nga ai.

⁵Naw nga ai Kohat a lakung lama ni a matu masat ya ai mare ni gaw Ehprim, Dan hte sinna maga de na Manashe ni hta na mare shi rai nga ai.

⁶Gershon a lakung lama ni a matu masat ya ai mare ni gaw Yisahka, Ashe hte Naphtali hte sinpraw maga de na Manashe ni a lamu ga hta na mare shi masum rai nga ai.

⁷Merari a lakung lama ni a matu masat ya ai mare ni gaw, Rubin, Gad, hte Zebulun ni hta na mare shi lahkawng rai nga ai.

⁸Israela amyu masha ni gaw Mawshe hpe dai MADU hkang da nu ai hte maren, ndai mare ni hte shanhte a matu udat shara lamu ga ni hpe hpaida da let Lewi masha ni hpe masat ya ma ai.

⁹Ndai ni gaw Yuda hte Simun amyu bawsang ni a lamu ga hta na mare mying ni rai nga ai;

¹⁰dai ni hpe Lewi amyu, Arun a amyu matu Kohat a lakung lama ni hpe jaw ai mare ni rai nga ai. Shanhte a matu shawng masat ya na mare ni rai nga ai.

¹¹Shanhte gaw Arba mare ngu ai (Anak a kawa mying gang da ai Arba mare), ya chyawm gaw Hebron ngu shamying ai Yuda bum ga na mare hte hpawn, de a grup yin na udat shara lamu ga hpe jaw ma ai.

¹²Rai tim, dai mare a yi sun hkauna ni hte de a kahtawng ni chyawm gaw Yehpuna a kasha Hkaleb hpe sali ga hku jaw kau manu ai.

¹³Hebron (hprawng shingbyi na mare langai ngai) hta jan nna hkinjawng Arun a amyu matu ni hpe masat ya ai mare ni gaw Libna,

¹⁴Yatira, Eshtemoa,

¹⁵Holon, Debira,

¹⁶Ain, Yuta, Bet Sheme, mare ni hte hpawn udat shara lamu ga ni hpe masat ya ma ai. Yuda hte Simun amyu bawsang hta na mare jahku rai nga ai.

¹⁷Benyamin a lamu ga hta na Gibeon, Geba,

¹⁸Anahtot hte Almon mare mali hte udat shara lamu ga ni jaw ma ai.

¹⁹Hkinjawng Arun a amyu matu ni lu la ai mare hte udat shara yawng shi masum rai nga ai.

²⁰Lewi amyu bawsang hta na Kohat a lakung lama masha ni a matu Ehprim a lamu ga kaw na mare nkau mi hpe mung masat ya ma ai.

²¹Dai ni gaw Ehprim bum ga na Shehkem mare hte de a udat shara lamu ga (Hprawng shingbyi na mare langai ngai) Gezera,

²²Kibzim, Bet Horon hte dai ni hta udat shara lamu ga hte hpawn mare mali jaw ma ai.

²³Dan a lamu ga kaw na mare mali rai nga ai. Dai ni gaw Elateke, Gibehton,

²⁴Aiyalon, Gatrimon hte de a udat shara lamu ga ni hte hpawn jaw ma ai.

²⁵Sinna maga de na Manashe a lamu ga hta na Tanak hte Gatrimon mare hte de a udat shara lamu ga ni hte hpawn mare lahkawng jaw ma ai.

²⁶Kohat a lakung lama dinghku masha ni yawng lu la ai mare hte hpawn udat shara lamu ga shi rai nga ai.

²⁷Kaga Lewi amyu matu hta na Gershon a lakung lama ni mung sinpraw hkran maga na Manashe lamu ga hta na mare lahkawng lu la ma ai. Dai ni gaw Bashan mung na Golan mare (Hprawng shingbyi na mare langai ngai), Behtera hte hpawn udat shara lamu ga ni jaw ma ai.

²⁸Yisahka a lamu ga hta na mare mali rai nga ai. Dai ni gaw Kishon, Daberat,

²⁹Yarmut, Enganim hte de a udat shara ni rai nga ai.

³⁰Ashe a lamu ga kaw na mare mali rai nga ai. Dai ni gaw Mishala, Abdon,

³¹Helakat, Rehob hte dai ni a udat shara ni rai nga ai.

³²Naphtali lamu ga kaw na (Hprawng shingbyi na mare langai ngai), Galile mung e rai yang Kedesha hte de a udat shara lamu ga, (Hprawng shingbyi na mare langai ngai), Hamot Dora hte Kartan hte de a udat shara lamu ga ni rai nga ai mare masum hte hpe lu la nga ma ai.

³³Gershon a lakung lama kaw na ran yu wa ai dinghku masha ni lu la ai mare ni hte dai ni hta lawm ai udat shara lamu ga yawng shi masum rai nga ai.

³⁴Naw ngam ai Lewi amyu Merari a lakung lama ni mung Zebulun lamu ga hta na Yokneam, Kata,

³⁵Dimna, Nahala mare mali hte de a udat shara lamu ga ni hpe lu la nga ma ai.

³⁶Rubin a lamu ga hta na Bezera, Yahaza,

³⁷Kedemot, Mepat mare mali hte de a udat shara lamu ga ni lu la ma ai.

³⁸Gad amyu bawsang a lamu ga hta na shanhte lu la ai mare ni gaw Gilead mung na Ramot hte de a udat shara lamu ga (Hprawng shingbyi na mare langai ngai), Mahanim,

³⁹Heshbon, Yazera, mare mali hte de a udat shara lamu ga ni rai nga ai.

⁴⁰Merari lakung lama ni hpe masat ya ai mare yawng shi lahkawng rai nga ai.

⁴¹Israela amyu masha ni madu da ai lamu ga hta na Lewi masha ni hpe jaw ai mare ni hte hpawn udat shara lamu ga yawng mali shi matsat rai nga ai.

⁴³Dai rai nna, shanhte hpe shi jaw na nga nna shanhte a kaji kawa ni hpe dagam shaka da sai mungdan yawng mayawng Israela amyu masha ni hpe dai MADU jaw nu ai rai nna, dai hpe shanhte madu la nhtawm dai mung e nga nga ma ai.

⁴⁴Shanhte a kaji kawa ni hpe ga sadi jaw da sai hte maren, mungdan ting hta ngwi pyaw sim sa nga na lam, dai MADU gaw shanhte hpe jaw nu ai. Dai MADU nan Israela kashu kasha ni shanhte a gumlau hpyen ni yawng hpe dang manga kau lu ai awng padang jaw ya nu ai majaw gumlau hpyen ni kadai mung n rawt tsap lu nga ma ai.

⁴⁵Israela amyu masha ni hte shi tawn da ai ga sadi shagu hpe dai MADU galaw shatup nu ai.