Read Jinghpaw Common Language Bible 2009 YAWSHU 22 Bible Online

YAWSHU 22 - Jinghpaw Common Language Bible 2009 bible

YAWSHU 22

¹Dai hpang Yawshu gaw Rubin, Gad hte Sinpraw maga de nga ai Manashe amyu bawsang ni hpe shaga jahpawng da wu ai.

²Shi gaw shanhte hpe, “Dai MADU a shangun kasa Mawshe nanhte hpe hkang da mada hte maren, nanhte lam magup galaw manit dai; nanhte gaw nye a hkang da ai lam yawng mayawng hpe mung madat mara hkan sa nga manit dai.

³Nanhte gaw ndai aten du hkra kahpu kanau Israela amyu masha ni hpe galoi mung n kau da yu myit dai. Dai MADU nanhte a Karai Kasang a hkang da ai ga ni hpe sadi sahka hte madat mara hkan sa manit dai.

⁴Ya chyawm gaw shi ga sadi tawn da sai hte maren, dai MADU nanhte a Karai Kasang gaw nanhte a Israela hpu nau amyu masha ni hpe ngwi pyaw sim sa lam jaw ya nu ai. Dai re ai majaw, dai MADU a shangun kasa Mawshe gaw nanhte hpe jaw ya sai Yawdan hka a sinpraw hkran na nanhte a matu ngu madu da sai mung ga na dum nta de bai nhtang wa manu.

⁵Mawshe hkang da manit dai tara hpe nanhte teng teng madat mara hkan sa lu na rai myit dai; dai MADU nanhte a Karai Kasang hpe tsaw ra nna, shi a myit ra ai hku galaw let shi a hkang da ai ga ni hpe madat mara nhtawm shi hta sadi sahka nga nna nanhte a myit kraw lawang mahkra hte mung, asak mahkra hte mung, shi hpe daw jau lu na rai myit dai,” ngu nna tsun wu ai.

⁶Yawshu mung ndai shaman ga hte shanhte hpe, “Nanhte gaw grai sut su nhtawm yam nga law law, aja gumhpraw, magri mang, hpri hte hpun palawng law law hte dum nta de nhtang wa na rai myit dai. Nanhte a gumlau hpyen ni kaw na lu la ai arung arai ni hpe nanhte a hpu nau amyu bawsang ni hte karan la mu,” ngu nna dum nta de dat dat wu ai. Dai hpang, shanhte mung tinang a dum nta buga de pru mat wa shajang ma ai. Mawshe gaw Yawdan hka a sinpraw hkran na lamu ga, Manashe amyu bawsang chyen mi hpe jaw nu ai; rai ti mung Yawshu gaw Yawdan hka a sinna hkran na lamu ga hpe kaga amyu bawsang ni hte hpawn kaga ka-ang hkup jaw ya wu ai.

⁷

⁸

⁹dai rai nna, Rubin, Gad hte sinpraw hkran na Manashe amyu bawsang ni dum nta de nhtang wa na nga, Hkanan mung Shilo mare e naw nga ai Israela amyu masha ni kaw na shanhte a mung ga ngu na Gilead mung de dai MADU Mawshe hpe hkang da nu ai hte maren pru mat wa ma ai.

¹⁰Rubin, Gad hte Yawdan hka sinpraw maga de nga ai Manashe amyu bawsang ni Yawdan hka a sinna hkran na Gelilot mare e naw du ma yang, dai yang na hka kau e galu kaba nna yu sharawng na zawn san ai tawn hkungri hpe galaw da ma ai.

¹¹Naw ngam nga ai Israela amyu masha ni gaw Rubin, Gad hte sinpraw hkran maga na Manashe amyu bawsang chyen mi ni gaw Yawdan hka ndai hkran shanhte a maga na Gelilot mare hta tawn hkungri galaw da manu ai nga nna tsun ai shiga hpe na ma ai.

¹²Israela amyu masha ni dai lam hpe na ma ai shaloi, sinpraw hkran na amyu bawsang ni hpe sa gasat na nga shawa hpung ting Shilo mare de sa hpawng nga ma ai.

¹³Dai hpang, Israela amyu masha ni gaw hkinjawng Eleaza a kasha Hpineha hpe Gilead mung e nga ai Rubin, Gad hte sinpraw maga de na Manashe amyu bawsang ni hpang de shangun dat wu ai.

¹⁴Hpineha hte rau sinna maga de na amyu bawsang shagu hta na marai langai hpra hpra, amyu lakung lama ni hta na dinghku shagu a ningbaw ni hte rau marai shi sa mat wa ma ai.

¹⁵Rubin, Gad hte sinpraw hkran na Manashe amyu bawsang ni nga ai Gilead mung de shanhte sa mat wa nhtawm,

¹⁶dai MADU a shawa hpung ting a matu ngu nna shanhte gaw shanhte hpe, “Israela a Karai Kasang hpe ndai zawn re ai n hkru ai amu hpa majaw galaw kau myit ni? Nanhte a matu ndai tawn hkungri hpe gaw nna, dai MADU hpe nanhte gumlau kau nga myit hka i! Nanhte gaw shi a hpang loi mi mung n hkan nga myit hka!

¹⁷Dai MADU gaw shi a amyu masha ni hpe ana zinli hte ari jaw mi yang, Peora e anhte galaw shut kau ai yubak mara hpe dum mai nga ga ai n rai ni? Dai lam a majaw anhte ya du hkra nni nkri hkrum sha nga ga ai. Dai yubak mara anhte a matu n ram nga a ni?

¹⁸Ya mung shi a hpang n hkan na ngu nga myit ni? Nanhte gaw dai ni dai MADU hpe gumlau myit dai rai yang, hpawt ni Israela hta masha shagu hte hpe shi pawt sindawng na rai wu ai.

¹⁹Dai re ai majaw, nanhte a lamu ga mahtang nawku na matu n htuk dum myit dai rai yang, dai MADU a Sum nga ai shi a mung de rap sa wa mi. anhte a lamu ga nkau mi wa la mi. Rai ti mung, dai MADU anhte a Karai Kasang a tawn hkungri hta kaga tawn hkungri gaw nna dai MADU hpe hkum gumlau nga myit; anhte hpe nan mung hkum gumlau nga myit.

²⁰Zera a kasha Ahkan mung jahten kau na matu daw dan da sai arai ni hpe hta la kau nu ai majaw, Israela shawa hpung ting ari jaw ai hkrum nga ai hpe dum nga mu. Shi galaw shut kau sai yubak a majaw Ahkan shi chyu sha si hkrum wu ai n rai,” ngu nna tsun ma ai.

²¹Rubin, Gad hte sinpraw maga de nga ai Manashe amyu bawsang hta na amyu masha ni gaw sinna maga de nga ai amyu bawsang ni hta na dinghku lakung lama ningbaw ni hpe ning ngu bai htan dat ma ai:

²²“Chyahtum Chyalai N-gun rawng ai wa gaw Karai Kasang rai nga ai! Shi gaw dai MADU rai nga ai! Chyahtum Chyalai N-gun rawng ai wa gaw Karai Kasang rai nga ai! Shi gaw dai MADU rai nga ai! Shi gaw anhte ndai amu hpe hpa majaw galaw nga ga ai lam chye ai zawn nanhte hpe mung anhte chye shangun nga ga ai! Anhte gumlau nna dai MADU hta kam sham ai myit n rawng saga ai rai yang, anhte hpe galoi mung hkum jahkrung da mi!

²³Dai MADU a ga hpe n madat ai sha shagu hkungga, shadung hkungga hte mahku hkungga nawng jau na, anhte a matu tawn hkungri hpe anhte a matu gaw kau saga ai rai yang chyawm gaw, dai MADU nan anhte hpe ari jaw mi ga.

²⁴Dai hku n re ai sha, htawm hpang prat e nanhte a amyu matu ni mahtang anhte hpe, ‘Dai MADU Israela a Karai Kasang hte nanhte hpa galaw da myit ni?,’ nga nna tsun na hpe anhte hkrit ga ai majaw ndai amu hpe anhte galaw saga ai.

²⁵Shi gaw Rubin, Gad hte anhte a lapran e Yawdan hka hpe jarit shatai nna madin din da nu ai. Dai MADU hte nanhte hpa n galaw da nga myit dai. Nanhte a amyu matu ni gaw anhte a amyu matu ni hpe dai MADU hpe nawku ai hta n hkrum wa shangun chye nga ai.

²⁶Dai re ai majaw wan nat hkungga a matu n re ai tawn hkungri langai anhte galaw da saga ai;

²⁷rai ti mung, shing di na malai, anhte a amyu masha ni hte nanhte a amyu masha ni a matu mung, anhte a hpang ban prat a matu mung sakse tai nga na rai nna shagu hkungga hte mahku hkungga ni hpe nat nawng na anhte a hkungga ni hte shi a chyoi pra ai Sum a man e, dai MADU hpe anhte teng teng nawku ga ai. Ndai gaw dai MADU hte anhte hpa n seng nga ga ai ngu nna nanhte a amyu matu ni anhte hpe tsun shara n nga mu ga ngu nna she ndai hpe gaw da saga ai.

²⁸Dai hku galoi mung byin taw gaw, dai gaw anhte a myit ra ai amu rai nga ai. Shaloi anhte a amyu matu ni mung, ‘Yu mu! dai MADU a tawn hkungri hte bung ai tawn hkungri hpe anhte a kaji kawa ni galaw da manu ai. Dai gaw wan nat hkungga a matu mung, shagu hkungga a matu mung n rai nga ai; rai ti mung anhte hte nanhte a amyu masha ni a lapran sakse tai na matu rai nga ai,’ ngu nna tsun lu na rai ma ai.

²⁹Wan nat hkungga, shadung hkungga hte shagu hkungga ni nawng jau na tawn hkungri galaw let dai MADU hpe anhte teng teng gumlau na ga ai n rai. Shi a hpung shingkang shanu nga ai Sum a man e dai MADU anhte a Karai Kasang a tawn hkungri hta kaga hkungri shaje anhte galaw na ga ai n rai,” ngu nna htan mu ai.

³⁰Hkinjawng Hpineha hte sinna hkran maga na amyu bawsang ni a lakung lama ni hta na dinghku ningbaw tai ya nga ai dai shawa hpung tin hpe woi awn ai masha shi hte gaw Rubin, Gad hte sinpraw hkran maga na Manashe amyu bawsang ni tsun ai ga hpe na mu yang, shanhte kabu myit dik dum nga ma ai.

³¹Hkinjawng Eleaza a kasha Hpineha gaw shanhte hpe, “Dai MADU anhte hte rau rai nga ai hpe ya chye saga ai. Nanhte gaw shi hpe n gumlau myit dai hte dai MADU jaw na ari kaw na mung Israela amyu masha ni hpe hkrang la manit dai,” ngu nna tsun mu ai.

³²dai hpang, Hpineha hte ningbaw ni Gilead mung e nga ai Rubin, hte Gad amyu masha ni kaw na pru mat wa nhtawm Hkanan mung de nhtang wa nna Israela amyu masha ni hpe shiga wa shana ma ai.

³³Israela amyu masha ni myit pyaw myit dik ai hte Karai Kasang hpe shakawn kungdawn ma ai. Rubin Gad amyu masha ni nga ai mung hpe gasat jahten kau na lam galoi mung n shaga yu manu ai.

³⁴Rubin hte Gad amyu masha ni gaw, “Ndai tawn hkungri gaw anhte yawng a matu dai MADU nan Karai Kasang rai nga ai hpe sakse tai ya nga ai,” ngu nna tsun ma ai. Shing rai dai hpe, “Sakse,” ngu nna shanhte shamying ma ai.