Read Jinghpaw Common Language Bible 2009 YAWSHU 3 Bible Online

YAWSHU 3 - Jinghpaw Common Language Bible 2009 bible

YAWSHU 3

¹Yawshu hte Israela amyu masha ni yawng hpang jahpawt e jau jau rawt nhtawm Akasia dabang kaw na pru wa let hka rap sa wa na matu dabang galaw da ai hkring sa shara Yawdan hka de sa wa ma ai.

²Ya masum ya na ai hpang, Israela ningbaw ni dap hkan dinghkren hkawm nhtawm,

³amyu masha ni hpe, “Dai MADU nanhte a Karai Kasang a Ga Shaka Sumpu hpai ai hkinjawng ni hpe nanhte mu ai shaloi, dap kaw na pru nhtawm shanhte a hpang hkan nang na rai myit dai.

⁴Nanhte gaw shawng de galoi mung ndai lam hku garai n lai yu myit dai majaw gara lam hku hkawm sa na lam shanhte lam madun dan na mara ai. Rai ti mung Ga Shaka Sumpu de shani lu na myit dai n rai; Sumpu a hpang deng ka-ang hkup gang nna hkan nang na rai myit dai,” ngu nna tsun mu ai.

⁵Yawshu gaw amyu masha ni hpe, “Dai MADU gaw hpawt ni e nanhte hta mauhpa lamik kumla galaw dan na ra ai majaw, tinang hkum ni hpe jasan jaseng da mu,” ngu nna tsun wu ai.

⁶Dai hpang, hkinjawng ni hpe mung Ga Shaka Sumpu hpai let amyu masha ni a shawng e pru sa wa na lam tsun mu ai. Shanhte mung shi tsun ai hte maren galaw ma ai.

⁷Dai MADU gaw Yawshu hpe, “Ngai gaw Mawshe hte rau nga ai zawn nang hte mung rau nga nga nngai hpe shanhte dum chye wa lu hkra, dai ni, ngai nang hpe dai Israela amyu masha ni yawng a man e arawng aya kaba hkam la ai masha langai mi hpe zawn shagrau sha-a hpang na de ai.

⁸Ga Shaka Sumpu hpai ai hkinjawng ni hka de du jang, hka hkin-gau makau kaw tsap nga lu na re ai, ngu tsun u,” ngu nna tsun wu ai.

⁹Dai hpang Yawshu gaw amyu masha ni hpe, “Ndai de sa wa marit; dai MADU nanhte a Karai Kasang tsun ai ga hpe madat la mu.

¹⁰Nanhte rawt lung wa myit yang, shi gaw Hkanani, Hiti, Hiwi, Perizi, Girgashi, Amori hte Yebusi masha ni hpe teng teng gawt shapraw kau na rai wu ai. Ahkrung nga ai Karai Kasang gaw nanhte hte rau rai nga ai hpe nanhte chye lu na rai myit dai.

¹¹Yu u, ginding aga yawng a Madu a Ga Shaka Sumpu mahtang nanhte a shawng e Yawdan hka rap mat wa na ra ai.

¹²Ya chyawm gaw Israela amyu bawsang shagu hta na marai langai ngai di nna marai shi lahkawng hpe lata san da mu.

¹³Ginding aga yawng a MADU a Ga Shaka Sumpu hpe hpai ai hkinjawng ni hka de shanhte a lagaw kabye hkra dat ai shaloi jang, lwi nga ai Yawdan hka gaw hkring mat nhtawm hka hku de na hka gaw shara mi hta sumpum tsaw mat wa na ra ai,” ngu nna tsun wu ai.

¹⁴Dai aten gaw nmut aten rai nna hka tung nga ai. Amyu masha ni Yawdan hka rap di na matu dabang kaw na pru wa ma ai shaloi, hkinjawng ni gaw Ga Shaka Sumpu hpai nna shanhte a shawng e sa wa nga ma ai. Hkinjawng ni hka kabye dat ai hte rau,

¹⁶lwi nga ai hka gaw hkring mat nna grai tsan ai Zarehtan makau na Adam mare du hkra sumpum tsaw mat wa nga ai. Jum Nawng de lwi yu wa ai hka mung tsep kawp hkyet mat ai rai nna amyu masha ni mung Yerihko mare ang ang hku rap sa wa ma ai.

¹⁷Amyu masha ni hkun hkraw ai ga ntsa hku kabye rap nga ma yang, dai MADU a Ga Shaka Sumpu hpai nga ai hkinjawng ni gaw amyu masha ni yawng rap kawt mat wa ai aten du hkra Yawdan hka ka-ang na hkun hkraw ai ga ntsa e tsap nga ma ai.