Read Jinghpaw Common Language Bible 2009 YAWSHU 7 Bible Online

YAWSHU 7 - Jinghpaw Common Language Bible 2009 bible

YAWSHU 7

¹Dai MADU gaw Israela amyu masha ni hpe Yerihko mare na arai hpa mung n hta la ai sha jahten kau na matu hkang da wu ti mung, n madat ya ma ai. Ahkan mying ai wa mahtang dai hkang da ai ga hpe n madat wu ai rai nna dai MADU gaw Israela masha ni hpe ja ja masin pawt bu nga ai. (Ahkan gaw Yuda amyu bawsang daw chyen mi rai nga ai Zera lakung lama hte seng ai Zabdi a kashu, Hkarmi a kasha rai nga ai.)

²Yawshu gaw Yerihko mare kaw nna Behtela a sinpraw maga Betawen makau na Ai mare de masha nkau mi hpe shangun dat nhtawm dai lamu ga hpe sa maram yu na matu hkang dat wu ai. Shing rai shanhte sa maram yu ngut ai hpang,

³Yawshu hpang de bai nhtang wa nhtawm, “Ai mare hpe masha shagu htim gasat n ra ai; masha hkying lahkawng masum daram sha shangun dat tim ram sai. Dai gaw mare kaba n rai nga ai majaw luksuk ting hpe sa gasat shangun na gaw n ra nga ai,” ngu nna tang madun ma ai.

⁴Shaloi Israela masha hkying masum daram mi hte htim gasat shangun ma ti mung, shanhte mahtang htingnut mat ra ma ai.

⁵Ai masha ni chyawm gaw shanhte hpe hkan shachyut let mare chyinghka kaw nna yu wa ai kadawng lam dingyang amyu masha marai sumshi kru hpe sat kau ma ai. Dai hpang Israela masha ni myit htum mat ai hte hkrit gari mat ma ai.

⁶Yawshu hte Israela ningbaw ni gaw lahpawt dum ai myit hte yawn hkyen let shanhte a hpun palawng ni hpe gang je kau nhtawm dai MADU a Ga Shaka Sumpu man e galeng nga nna, shanhte a baw hta nhpu hte bun nhtawm shana de du hkra yawn hkyen ai kumla madun nga ma ai.

⁷Yawshu gaw, “Tsaw Htum ai MADU e, nang hpa majaw ndai Yawdan hka woi rap n ni? Amori masha ni a lata de ap kau na matu rai nga a ni? Shing n rai anhte hpe shamyit kau na matu rai nga a ni? Yawdan wora hkran e anhte hpe hpa majaw n nga shangun n ni?

⁸O MADU e, ya chyawm gaw Israela mahtang gumlau hpyen a lata kaw na htingnut mat wa ai hpe ngai kaning ngu tsun lu na rai ta?

⁹Hkanani masha ni hte ndai mung na masha nlang ndai lam hpe na na rai ma ai. Shaloi shanhte gaw anhte hpe sa wang nna masha hkum shagu hte hpe sat kau na mara ai. Dai hpang na a arawng sadang hpung shingkang makawp maga na matu nang kaning di na rai nga n ta?,” ngu nna tsun wu ai.

¹⁰Dai MADU chyawm gaw Yawshu hpe, “Rawt u! Hpa majaw ga hta dai zawn rai galeng nga n ta?

¹¹Israela chyawm gaw yubak galaw shut masai! Shanhte hkan shatup na matu ngai hkang da ai dai ngai hte tawn da ai ga shaka hpe shanhte run kau manu ai. Jahten sharun kau na matu daw dan da ai arai nkau mi hpe mung shanhte hta la manu ai; shanhte gaw arai mung lagu, masu mung masu, shanhte a arai ni hta dai ni hpe bang la rai ma ai.

¹²Dai lam ni a majaw Israela ni shanhte a gumlau hpyen ni hpe n hkam lu ma ai. Ya chyawm gaw shanhte nan daw dan ai hkrum nga manu ai majaw hpyen wa kaw na htingnut mat wa ma ai. N hta lu na ngu, nang hkang da ti mung hta wa ai arai ni hpe nang n jahten kau dingsa, ngai nang hte rau nga lu na nngai n rai!

¹³Rawt u! amyu masha ni hpe jasan jaseng u. Shanhte hpe nye a man de pru sa na matu jin jin di da u. Dai MADU, Israela a Karai Kasang ngai gaw ndai lam hpe tsun ra nngai majaw, hpawt de jin jin rai nga na lam shanhte hpe tsun u; dai rai nna Israela e, jahten kau na matu ngai nanhte hpe hkang dat ai arai nkau mi nanhte a lata hta madu da nga myit dai! Dai arai ni hpe nang seng kau ai aten du hkra nanhte a gumlau hpyen ni hpe lu ninghkap lu na myit dai n rai.

¹⁴Hpawt de manap aten e, amyu bawsang hte bawsang shawng de sit sa wa lu na lam shanhte hpe tsun u. Ngai lata shaw dat ai amyu bawsang gaw lakung lama hku hkan nna shawng de sit sa na rai myit dai. Ngai lata shaw dat ai lakung lama gaw dinghku hku hkan nna shawng de sit sa na rai myit dai. Ngai lata shaw dat ai dinghku kaw na masha langai hte langai gaw shawng de sit sa na rai myit dai.

¹⁵Dai hpang lata shaw la hkrum ai wa hpe majai kau sai arai hte hpawn mu hkrup ai wa gaw nye a ga shaka hpe run kau nhtawm Israela hpe hkrit kaya ai baw amu woi jahkrum nu ai majaw shi mung, shi a dinghku mung, shi madu da ai arai shagu hte hpe mung nat kau na rai myit dai,” ngu nna tsun wu ai.

¹⁶Hpang jahpawt manap jau jau aten e, Yawshu gaw Israela amyu masha ni hpe bawsang hte bawsang woi shapraw wu yang, Yuda amyu bawsang mahtang lata shaw la hkrum nga ai.

¹⁷Yuda amyu bawsang hpe shawng de lakung hte lakung woi sit wu yang, Zera lakung lama mahtang lata shaw la hkrum nga ai. Dai hpang Zera a lakung lama hpe dinghku hte dinghku woi sit wu yang, Zabdi a dinghku lata shaw la hkrum nga ai.

¹⁸Dai hpang Zabdi a dinghku hpe lasha langai hte langai shawng de woi sit wu yang, Zabdi a kashu, Hkarmi a kasha Ahkan mahtang lata shaw la hkrum nga ai.

¹⁹Yawshu gaw shi hpe, “Ngai sha e, dai MADU Israela a Karai Kasang a man, ndai yang e, teng man ai ga tsun nna mara yin la u. Nang kaning rai galaw kau nit dai lam, ya ngai hpe tsun dan e, ngai hpe dai lam ip da na hkum shakut et,” ngu nna tsun wu ai.

²⁰Ahkan gaw, “Dai gaw teng nga sai. Ngai gaw dai MADU Israela a Karai Kasang hpe shut kau ni ai hte ndai gaw ngai galaw shut kau sai amu rai nga ai.”

²¹Anhte lu rim la ai arai ni hta tsawm ai Babelon ntsa palawng langai, gumhpraw pawng manga daram, pawng mi jan li ai ja tawng ni hpe mu nna grai yu ra ai hte la kau se ai. Dai arai ni hpe nye a sum kata na ga hta lup da we ai; gumhpraw hpe chyawm gaw htumpa e tawn da nngai,” ngu nna htan wu ai.

²²Dai rai nna Yawshu gaw masha nkau mi hpe shangun dat nna dai sum de shanhte gat sa yu mu yang, yu u, dai yang e lup makoi da nga ai majai kau sai arai ni hte htumpa e gumhpraw ni hte teng teng tawn da nga ai hpe sa mu ma ai.

²³Shanhte gaw dai arai ni hpe sum kaw na la shapraw nhtawm Yawshu hte Israela masha ni yawng hpang de la wa nna dai MADU a man e tawn da ma ai.

²⁴Yawshu hte Israela amyu masha ni yawng gaw Ahkan hpe mung, gumhpraw, ntsa palawng hte ja tawng hte hpawn, Ahkan a shayi shadang sha ni, shi a sagu, dumsu hte lawze ni, shi a sum, shi lu tawn ai arai baw hkum sumhpa ni hpe la nhtawm Tsin-Yam Tsindam Kadit de shanhte hpe woi sa wa ma ai.

²⁵Yawshu gaw, “Nang anhte hpe hpa majaw sharu shatsang kau nu ni? Dai MADU gaw ya jang na a ntsa e tsin-yam tsindam shadu dat na ru ai!,” ngu nna tsun wu ai. Dai hpang amyu masha ni yawng mung Ahkan hpe nlung hte kabai sat kau ma ai. Shi a dinghku masha ni hte shi a sut gan ni hpe mung nlung hte kabai nna wan nat kau ma ai.

²⁶Shanhte gaw shi a ntsa e nlung sumpum kaba kawng da ya ma ai rai nna dai ni du hkra dai yang e nga nga ai. Dai hkan nna shara dai hpe Tsin-Yam Tsindam Kadit ngu nna naw shamying da ma ai. Dai hpang dai MADU gaw masin kawp mat wu ai.