Read Jinghpaw Common Language Bible 2009 YAWSHU 8 Bible Online

YAWSHU 8 - Jinghpaw Common Language Bible 2009 bible

YAWSHU 8

¹Dai MADU gaw Yawshu hpe, “Nang hte rau hpyenla ni hpe woi nna Ai mare de lung wa su. Hkum hkrit nga et; myit hkum htum et. Ai hkawhkam hpe dang kau lu na awng padang ngai nang hpe jaw na de ai; shaloi shi a mung masha, mare hte lamu ga ni hpe mung nang madu lu na rai ndai.

²Yerihko mare hte de a hkawhkam hpe nang shagrawt kau ndai zawn Ai mare hte de a hkawhkam hpe mung shagrawt kau lu na rai ndai; rai ti mung ndai lang chyawm gaw dai mare na arung arai hte yam nga ni, nanhte a matu madu la mai na rai myit dai. Dai rai nna mare shingdu hku akajawng sha htim gasat la na hkyen tawn u,” ngu nna tsun wu ai.

³Dai rai nna Yawshu gaw hpyenla ni yawng hte rau Ai mare de lung wa na shajin da nga ma ai. Shi gaw magrau grang htum ai hpyenla mun masum hpe lata la nhtawm ndai aming hte rau shana e shanhte hpe shangun dat wu ai:

⁴“Dai mare a maga mi de sa gawp nga na rai myit dai, rai ti mung mare hte nau wa hkum tsan myit, htim gasat na jin jin rai nga mu.

⁵Nye masha ni hte ngai chyawm gaw mare de shanang sa wa na ga ai. Ai masha ni anhte hpe htim na matu pru sa wa jang, shawng de lang mi anhte galaw yu saga ai zawn kayin hprawng hprawng rai na ga ai.

⁶Shanhte mung hkan shachyut nang ma ai rai nna, ndum shami mare hte tsan wa hkra hprawng shalen la na ga ai. Shaloi shawng na hte maren shanhte kaw na anhte hprawng mat wa sai nga nna shanhte myit la na mara ai.

⁷Dai hpang, nanhte gaw up nga ai kaw na pru wa nhtawm dai mare hpe gasat dip la na rai myit dai. Dai MADU nanhte a Karai Kasang gaw nanhte a lata hta dai mare ap ya na ra ai.

⁸Dai mare hpe dang la ngut jang, dai MADU hkang da sai hte maren, nat kau na rai myit dai; Dai gaw nanhte hkan sa na tara ni rai nga ai.”

⁹Dai rai nna Yawshu gaw shanhte hpe shangun dat wu ai. Shanhte mung up nga na shara masat da ya ai Ai mare a sinna maga Behtela hte Ai lapran e sa up let ala nga ma ai. Yawshu chyawm gaw dap e dai shana naw nga shalai kau wu ai.

¹⁰Yawshu gaw jahpawt jau jau rawt nna hpyenla ni hpe shaga shinggyin da wu ai. Dai hpang shi hte Israela ningbaw ni shanhte hpe Ai mare de woi lung wa ma ai.

¹¹Shi hte rau hkan ai hpyenla ni mahtang mare de shanang sa wa nhtawm dingdung maga de dap jung da ma ai; shanhte dap jung ai shara hte Ai mare a lapran e kadit langai din nga ai.

¹²Shi gaw marai hkying manga daram hpe woi nna mare a sinna maga Ai hte Behtela lapran e up da wu ai.

¹³Dai mare a dingdung maga de na dap dung nlang hte hte, mare a sinna maga ang ai masha ni hpe majan a matu hkyen lajang tawn da ma ai. Yawshu chyawm gaw dai kadit e shana nga shalai kau wu ai.

¹⁴Ai mare a hkawhkam gaw Yawshu a masha ni hpe mu ai shaloi, lawan ladan gan lajang la nhtawm shi hte shi a masha ni yawng shawng de na shara hta nan Israela masha ni hpe htim gasat na nga, Yawdan Kadit de pru sa wa ma ai. Shi gaw shingdu kaw nna gasat hkrum na hpe n chye da wu ai.

¹⁵Yawshu hte shi a masha ni mahtang htingnut wa masu let prang yang de hprawng mat wa ma ai.

¹⁶Shanhte hpe hkan na nga, mare na lasha nlang ni hpe shaga shinggyin la nhtawm Yawshu hpe hkan shachyut let mare hte tsan mat wa ma ai.

¹⁷Ai mare na lasha shagu mung Israela masha ni hpe hkan shachyut ma ai rai nna mare hpe tawn kau da ai hte dai mare hpe makawp maga na masha kadai mung n nga nga masai.

¹⁸Dai hpang dai MADU gaw Yawshu hpe, “Na a nri Ai mare de ladawn da u; dai mare na a lata de ngai ap ya nga nngai,” ngu nna tsun wu ai. Yawshu gaw shi hkang ai hte maren galaw wu ai,

¹⁹shi a lata sharawt dat ai hte up nga ai masha ni tin tin rawt lung wa nhtawm mare kata de kagat shang wa nna gasat dip la ma ai. Shanhte gaw dai mare hpe mung tin tin wan nat kau da ma ai.

²⁰Ai masha ni shanhte a mare hpe kayin yu ma yang, lamu de wan hkut dingchyung rai lung wa ai hpe shanhte mu ma ai. Bai hprawng mat wa masu ai prang yang de na Israela amyu masha ni mung shanhte hpe nhtang htim gasat ma ai majaw shanhte a matu hprawng lawt na lam n nga nga malu ai.

²¹Up da ai hpyenla ni dai mare hpe lu la kau nna, wan hkru nga ai hpe Yawshu hte shi a masha ni mu ma yang, shanhte nhtang sa wa nhtawm Ai mare masha ni hpe sat hpang ma ai.

²²Mare kata de du nga sai Israela amyu masha ni mung shang gasat lawm ma ai. Israela amyu masha ni e wang matep da hkrum nga ma ai majaw Ai mare masha ni yawng sat kau hkrum nga ma ai. Kadai mung hprawng lawt lu ma ai n rai. Ai hkawhkam hta jan nna dai mare e kadai mung hkrung nga lu ai n rai.

²³Dai hpang hkawhkam wa mung rim hkrum ai rai nna Yawshu hpang de woi wa ya ma ai.

²⁴Israela amyu masha ni gaw shanhte hpe prang yang hkan hkan shachyut ai gumlau hpyen shagu hpe sat kau ma ai. Shanhte Ai mare de bai nhtang gasat nna dai yang na masha shagu hte hpe sat kau ma ai.

²⁵Dai mare e nga ai masha shagu sat kau hkrum ma ai aten du hkra, Yawshu gaw shi a nri n jahkrat kau ai sha, Ai mare de aladawn da wu ai. Dai shani e sat kau hkrum ai Ai mare na numsha lasha yawng mun mi hkying lahkawng rai nga ai.

²⁷Dai MADU gaw Yawshu hpe hkang da nu ai hte maren, dai mare na rim la lu ai yam nga hpung hte lanep arai mahkra gaw Israela masha ni shanhte a matu magawn la shajang nga ma ai.

²⁸Yawshu gaw Ai mare hpe nat kau wu ai rai nna dai ni du hkra dai mare hten run taw nga ai.

²⁹Shi gaw Ai mare a hkawhkam wa hpe shana de du hkra hpun hta noi da wu ai; shana de du wa jang, Yawshu hkang da ai hte maren si mang hpe hpun hta na la shayu nhtawm mare chyinghka lam de shang wa ai chyinghka lam e kabai tawn da nna de a ntsa e nlung sumpum kaba sumpum gawng da mu ai rai nna, dai ni du hkra dai yang e naw nga nga ai.

³⁰Dai hpang Yawshu gaw Ebala Bum ntsa e dai MADU Israela a Karai Kasang a matu tawn hkungri galaw wu ai.

³¹Dai MADU a shangun kasa Mawshe, Israela amyu masha ni hpe jaw ya ai tara hta, “Hpri arai hte n tawk shapri ai nlung hte galaw ai tawn hkungri rai na rai ndai,” ngu nna matsun da sai hte maren shi galaw wu ai. Shanhte gaw dai MADU a matu dai tawn hkungri ntsa hta wan nat hkungga nawng jau let shanhte a mahku hkungga ni sak jaw ma ai.

³²Dai yang e, Israela amyu masha ni yu nga yang, Mawshe ka da sai tara ga ni hpe nlung hta Yawshu bai ka tawn wu ai.

³³Dai Israela amyu masha ni hte shanhte a ningbaw ni, du salang ni hte tara agyi ni, shanhte hta hkan nga nang ai maigan masha ni gaw dai MADU a Ga Shaka Sumpu hpai ai Lewi hkinjawng ni hte Sumpu a man lahkawng maga de tsap nga nhtawm ka-ang hkup gaw Gerizim Bum maga de shingdu dat nna, ka-ang hkup gaw Ebala Bum de shingdu dat let tsap nga ma ai. Dai gaw aten du ai shaloi shaman chyeju hkam la na matu Karai Kasang a masha Mawshe hkang da ai lam rai nga ai.

³⁴Yawshu gaw Tara laika hta ka da mada shaman ga hte dagam dala ga ni lawm ai tara ga yawng mayawng hpe ja ja hti wu ai.

³⁵Yawshu mung Mawshe hkang da mada hpe shawa hpung ting hte shanhte hta na numsha ni hte ma kaji ni, shanhte hta hkan nang ai maigan masha ni yawng a man e hti dan wu ai.