Read Jinghpaw Common Language Bible 2009 2 HTESALONI 2 Bible Online

2 HTESALONI 2 - Jinghpaw Common Language Bible 2009 bible

2 HTESALONI 2

¹Nye a hpu nau ni e, anhte a Madu Yesu Hkristu bai du sa na ra ai lam hte Madu hte rau hpawng de ai lam hte seng nna, nanhte hpe ngai tsun lajin mayu nngai.

²Madu bai du sa na Nhtoi du ra ai, nga nna masha ni tsun ai ga a majaw, nanhte a myit mang ai lam hta akajawng sha myit shuk shak ai hte n zim n zam rai shamu shamawt mat ai lam n byin malit ga, nanhte hpe shadum shahprang dat nngai. Shing nga ai ga gaw, anhte myihtoi ga tsun ai shaloi, shing n rai mungga hkaw tsun ai shaloi, shing n rai laika ka ai shaloi lawm ai ga re ai ngu nna myit yang myit la na manit dai.

³Gara hku rai ti mung, nanhte hpe gade e mung n hkalem kau myit ga. Hpa majaw nga yang, hpang jahtum Karai Kasang hpe gumlau ai lam garai n byin yang, ngarai mung de jahkrat kau hkrum na rai nga ai n hkru Ai Wa garai n paw pru yang dai nhtoi du na ra ai n rai.

⁴Shi gaw masha ni nawku daw jau nga ai karai ngu ai baw nga manga hpe nhtan shai ninghkap nna, shi hkum nan hpe yawng mayawng a ntsa e hpung shingkang grau rawng ai wa re ngu nna shagrau shatsaw na ra ai. Shi gaw Karai Kasang a Nawku Htingnu kata de pyi sa shang dung nga nna shi hkum dai Karai Kasang re ai ngu nna tsun ndau na ra ai.

⁵Ngai gaw nanhte hte rau naw nga ai shaloi e, ndai yawng mayawng hte a lam nanhte hpe tsun dan ga ni ai. Nanhte n dum myit ni?

⁶Shing rai hkra rai ti mung, dai lam ya n byin wa hkra pat hkum shingdang da ai lam lama ma nga nga ai. Dai hpa re ai hpe nanhte chye nga myit dai. Aten ladaw du ai shaloi dai N hkru Ai Wa dan pru na ra ai.

⁷Chye na yak ai makoi magap da ai n hkru ai atsam gaw ya e pyi bungli galaw nga sai; rai ti mung ban hkum ai wa hpe shi a shara kaw na yeng seng kau ai aten garai n du yang, dai lam byin wa na ra ai n rai.

⁸Dai hpang dai N hkru Ai Wa dan pru na ra ai, rai ti mung Madu Yesu du sa ai shaloi N hkru Ai Wa hpe shi a n-gup kaw na pru ai nsa hte sat kau nna, shi a htoi kabrim ai hpung shingkang hte jahten shaza kau na ra ai.

⁹Dai N hkru Ai Wa gaw Satan a n-gun atsam hte du sa na ra ai rai nna masu ai lamik kumla amyu myu hte mauhpa amu ni hpe galaw dan na ra ai.

¹⁰Dai hta n-ga hten byak hkrum na ni a ntsa e, n hkru n kaja ai hku hkalem hkalau ai lam amyu baw sumhpa galaw na ra ai. Shanhte gaw hkye hkrang la hkrum na matu dai teng man ai lam hpe n hkap la ai hte n tsaw ra ma ai majaw, shanhte hten za si mat na mara ai.

¹¹Dai re ai majaw, dai sawt ai lam hpe shanhte kam sham hkra Karai Kasang gaw dai shut ai lam a n-gun atsam shanhte hta amu galaw na matu shangun dat wu ai.

¹²De a mahtai gaw, dai teng man ai hpe n kam n sham nna yubak a pyaw daw lam hta hkan sa ai ni nlang hte gaw daw dan ai hkrum na mara ai.

¹³Madu a tsaw ra ai hpu nau ni e, nanhte a majaw anhte gaw Karai Kasang a chyeju hpe tut nawng e shakawn kungdawn lu na ra ga ai. Hpa majaw nga yang, Karai Kasang gaw, nanhte hpe chyoi pra ai masha shatai ai Wenyi a n-gun atsam hte mung, teng man ai hpe kam sham ai nanhte a makam masham hte mung, shawng na hkye hkrang la hkrum ai ni hku nna nanhte hpe lata la sai.

¹⁴Karai Kasang gaw nanhte hpe anhte hkaw tsun ai dai Kabu Gara Shiga hku nna shaga la manit dai. Shi gaw anhte a Madu Yesu a hpung shingkang hta na nanhte hkam la ang ai hkam bum hpe madu la lu myit ga ngu nna shaga la manit dai.

¹⁵Dai re ai majaw, Hpu nau ni e, anhte a hkaw tsun ai mungga hku nna mung, shagun dat ai laika hku nna mung, nanhte hpe anhte sharin ya sai dai teng man ai lam ni hta ngang ngang kang kang lahpran tsap nna magra noi nga mu.

¹⁶Anhte a Madu Yesu Hkristu shi nan hte anhte hpe tsaw ra nna shi a chyeju hte anhte hpe htani htana grin ai nden marai hte ngang kang ai myit mada shara jaw ai Wa Karai Kasang gaw,

¹⁷nanhte hpe galoi mung mai kaja ai lam tsun shaga galaw gunhpai nga lu myit ga n-gun jaw shangang shakang ya u ga law.