Read Jinghpaw Common Language Bible 2009 1 TIMOHTI 4 Bible Online

1 TIMOHTI 4 - Jinghpaw Common Language Bible 2009 bible

1 TIMOHTI 4

¹Htawm hpang de masha nkau mi gaw makam masham hpe kabai kau na mara ai; shanhte gaw masu hkalem ai wenyi ni a ga madat nna nat ni a sharin shaga ai lam ni hta hkan sa na mara ai lam dai, Wenyi gaw asan sha tsun nga ai.

²Kahtet ai hpri hte kaba jahkat kau hkrum ai zawn, tinang a mai n mai chye ginhka ai htauli htaula myit ni si mat sai masu hkalem ai ni gaw shing re ai sharin shaga ai lam ni hpe shachyam shabra dat ma ai.

³Shing re ai masha ni gaw hkungran ai hpe pat hkum da nna shahpa nkau mi hpe koi na matu sharin ma ai. Rai ti mung kam sham ai ni hte dai teng man ai lam hpe chye chyang ai ni gaw chyeju shakawn akyu hpyi nna sha lu na matu Karai Kasang gaw dai shahpa ni hpe hpan da nu ai.

⁴Karai Kasang hpan da sai arai yawng mayawng chyawm gaw mai kaja nga ai rai nna hpa baw shahpa hpe mung koi gam ra na n rai; rai ti mung shahpa yawng mayawng hpe chyeju shakawn akyu hpyi ai hte hkam la ra ga ai.

⁵Hpa majaw nga yang, Karai Kasang a mungga hte akyu hpyi ai ga gaw dai hpe shachyoi shapra ya nga ai rai nna Karai Kasang hkap la ging ai shahpa shabyin shatai ya nga ai.

⁶Ndai matsun ga ni hte maren Hkristan hpu nau ni hpe nang shadum shahprang nga n yang gaw nang gaw nang hkap la nga ai wenyi makam masham lam hpe mung, teng man ai sharin shaga ai ga hpe mung, hkan nga ai majaw Hkristu a shangun ma kaja rai nga nit dai.

⁷Rai ti mung, Karai Kasang hte n seng ai tsun na matu akyu n nga ai maumwi ga ni hpe koi kau nna, tinang a asak hkrung lam hpe tara hkungga ai lam hta shakung jahpan nga u.

⁸Hkum hkrang hte seng nna sha shaman shakyang ai lam gaw akyu loi sha mi nga ai; rai ti mung wenyi makam masham lam hta shaman shakyang ai gaw lam shagu hta akyu nga nga ai; hpa majaw nga yang dai gaw ndai prat hte htawm hpang prat a matu ga ndat rawng nga ai.

⁹Ndai gaw teng man ai hte kaja wa tsep kawp hkap la nna kam sham mai ai teng man ai ga rai nga ai.

¹⁰Shinggyim masha yawng hte, grau nna kam sham ai ni a hkye hkrang la ai Madu rai nga ai ahkrung nga ai Karai Kasang gaw anhte a myit mada shara rai nga ai majaw, anhte amu bungli galaw ai lam aja awa shakut nga ga ai.

¹¹Shanhte ni hpe ndai matsun ga ni hte sharin shaga ai ga ni hpe jaw ya nga u.

¹²Nang asak naw kaji ai brang ram rai nga ndai majaw, kadai mung nang hpe n yu kaji kau u ga, tsun ai ga hta mung, arawn alai hta mung, tsaw ra ai hta mung, makam masham hte myit san seng ai hta mung, kam sham ai ni a matu mara kasi kamang tai nga u.

¹³Ngai sa du ai ten du hkra shawa masha ni a man de Chyum Laika hti dan ai lam, mungga htawn tsun ai lam hte sharin achyin ai lam hpe aten jaw nna atsam dat galaw shakut nga u.

¹⁴Myihtoi ni hkaw tsun ai hte hpung woi ni na a ntsa e lata mara sari dang da ya ai shaloi nang hpe jaw da nna nang hta rawng nga ai wenyi hte seng ai chyeju kumhpa hpe n gawn n sawn di nna hkum hprai kau nga u.

¹⁵Na a kunghpan jat wa ai hpe masha yawng mayawng mu lu mu ga, lahta de tsun da sai lit ni hpe myit lawm ai hte hkan shatup let dai hta a manoi nga u.

¹⁶Na a hkum hpe mung na a sharin shaga ai lam hpe mung sadi let sin yu nga u. Nang gaw ndai lam ni hpe agalaw nga u; hpa majaw nga yang, shing rai galaw n yang gaw, na hkum hpe mung, hkaw tsun ai ga na la ai ni hpe mung hkye hkrang la lu na ra ai.