Read Jinghpaw Common Language Bible 2009 1 TIMOHTI 6 Bible Online

1 TIMOHTI 6 - Jinghpaw Common Language Bible 2009 bible

1 TIMOHTI 6

¹Mayam re ai ni gaw tinang a madu ni hpe hkungga lara ging ai ni re ngu nna hkam la ra ma ai. Shaloi she kadai mung Karai Kasang a mying ningsang hte anhte sharin shaga ai lam hpe n kaja ai hku jahpoi asawng na ma ai n rai.

²Hkristan madu ni a npu e nga ai mayam ni gaw tinang a madu ni hpe maren mara hpu nau ni rai ma ai ngu nna n kaw n law n mai di ai; hpa majaw nga yang, tinang a galaw daw ai majaw akyu hkam sha ai ni gaw tinang ni tsaw ra nga ai kam sham ai ni rai nga ma ai majaw shanhte hpe grau nna pyi daw jau ra nga ai. Nang gaw ndai lam hpe sharin shaga nna hkaw tsun lu na rai ndai.

³Kadai rai ti mung nhtan shai ai sharin shaga ai lam hpe sharin achyin ai wa gaw, anhte a Madu Yesu Hkristu a teng man hkum tsup ai mungga ni hte anhte a makam masham a sharin shaga ai lam hpe n hkan sa ai wa rai nga ai.

⁴Dai wa gaw grai gumrawng gumtawng nna hpa mung n chye ai wa rai nga ai. Shi gaw ga sumtu tsun shaga ai lam ni hta dangrang hkat na matu, ga law hkat na matu, n hkrak ai myit rawng ai wa rai nga ai. Shing rai galaw ai a majaw manawn masham ai lam, hpung garan ai lam, n sim n sa ndang kalang lam ni n kaw n law roi asawng ai lam ni, n kaja ai hku n rup n tsen ai lam ni hpe byin pru wa shangun nga ai.

⁵Dai hta n ga, myit n gu ai lam hte teng man ai lam hpe n mu n chye ai ni kaw nna ndang kalang ai lam ni gaw ya sha ya sha pru nga ai. Nawku htung ngu ai gaw lu su ngamai na matu re ngu nna shanhte myit la ma ai.

⁶Kaja wa nga yang gaw tinang lu ai hta myit dik chye ai rai yang nawku htung gaw masha langai mi hpe lu su shangun ai rai nga ai.

⁷Hpa majaw nga yang, anhte gaw mungkan ga de hpa la sa ga ta? Mungkan ga kaw nna hpa baw la pru wa lu ga ta? Hpa n la pru wa lu ga ai.

⁸Dai rai nna anhte gaw lusha hte hpun palawng ni lu nga ga yang gaw, dai hte myit dik nga ga.

⁹Rai ti mung sut su mayu ai ni gaw, agung alau hkrum ma ai hte angawk angak hte tsin yam shabyin shangun lu ai marin marit ai lam ni law law a mahkam dawnggawng hta lup mat ma ai; dai gaw shanhte hpe hten byak ai hte sum hkrum ai hta dun bang kau manu ai.

¹⁰Hpa majaw nga yang, gumhpraw marin ai myit chyawm gaw n hkru n kaja ai lam amyu myu a ru npawt rai nga ai. Masha nkau mi gaw gumhpraw hpe lu la na matu grai myit katu ra sharawng nga ma ai majaw makam masham kaw na lam yit mat wa ma ai hte yawn hkyen ai lam amyu myu hte shanhte a myit kraw lawang ni hpe daw hten mat shangun ma ai.

¹¹Nang chyawm gaw Karai Kasang a masha wa e, dai lam mahkra hte hpe koi gam nga u. Ding hpring ai, tara hkungga ai, kam sham ai, tsaw ra ai, shakut sharang ai hte sumnung ai myit ni hpe lu la hkra shakut shaja nga u.

¹²Makam masham hte seng ai gat shingjawng poi hta atsam htum hkra gat nna htani htana asak ngu ai kumhpa hpe na a matu lu la hkra di u; hpa majaw nga yang, dai asak hkrung lam hta e, nang hpe Karai Kasang shaga la ai shaloi nang gaw sakse law law ni a man e kam sham sai lam ngang ngang kang kang nang yin la nit dai.

¹³Nga yawng nga pra hpe asak jaw ya ai wa Karai Kasang a man e mung, Pilat a man e shi kam sham ai lam hpe ngang ngang kang kang yin la ai Hkristu a man e mung, ndai magam lit gun hpai na matu ngai hkang da de ai.

¹⁴Nang gaw nang hpe hkang da sai lam ni hpe madat mara nna Hkristu bai dan pru na ra ai shani nhtoi du hkra kang ka ai hte hkan sa shatup nga u.

¹⁵Langai sha rai nga ai daru magam hpung shingkang rawng nna up hkang ai wa, hkawhkam ni a Hkawhkam Madu ni a Madu, Karai Kasang gaw, aten ladaw du jang Madu Yesu hpe kalang mi bai dan pru shangun na ru ai.

¹⁶Shi chyu sha n si n mat ai wa rai nna, shi gaw kadai mung n shani sa lu ai nhtoi hta shanu nga ai. Kadai mung shi hpe n mu yu ai hte kadai mung shi hpe n mu lu nga ai. Shi hta arawng sadang hte htani htana hpung shingkang a nga nga u ga law! Amen.

¹⁷Ndai dinghta asak hkrung nga ai prat a sut gan ngamu ngamai ai lam ni hta gumrawng gumtawng n rai mu ga hte n grin ai ngamu ngamai ai lam ni hta shanhte a myit mada kam hpa shara n shatai ai sha anhte kabu gara hkam la na matu arai yawng mayawng hpe n daw n hta jaw ya ai Karai Kasang hta myit mada ala nga na matu hkang da u.

¹⁸Mai kaja ai galaw na matu mung, mai kaja ai bungli ni hta sut su na matu mung, masha kaga ni hpe karan kachyan jaw jahproi ai lam hta mung, n daw n hta jaw ya na matu jin jin rai nga mu ga shanhte hpe sharin shaga nga u.

¹⁹Ndai hku nna shanhte gaw hpang na prat a matu ngang kang ai npawt nhpang tai nga u ga, hpu ging ai sutgan shanhte mahkawng da lu nna teng man ai asak hkrung lam majing hpe lu la na mara ai.

²⁰Timohti e, nang hpe ap ya da ai aya hpe atsawm sha tek mahkyu nga u; n san n seng ai ga shaga ai lam hpe mung, chye chyang ai lam re ngu nna masha nkau mi shamying tsun shut ai angawk angak re ai ndang kalang ga ni hpe mung koi kau u.

²¹Hpa majaw nga yang, masha nkau mi gaw dai machye machyang lu ai ni rai ga ai nga ninglen dai makam masham kaw na yit mat wa ma ai. Karai Kasang a chyeju gaw nanhte yawng hte rau anga nga u ga law.