Read Jinghpaw Common Language Bible 2009 2 TIMOHTI 1 Bible Online

2 TIMOHTI 1 - Jinghpaw Common Language Bible 2009 bible

2 TIMOHTI 1

¹Karai Kasang a myit ra ai hku hte, maren Hkristu Yesu a kasa tai nna Hkristu Yesu hte langai sha tai nga ai a marang e anhte lu la na ga ndat hte seng ai asak a lam shana shabra na matu shangun dat hkrum ai ngai Pawlu gaw, nye a tsaw ra ai ngai sha Timohti hpe ga shana dat nngai.

²Kawa Karai Kasang hte anhte a Hkristu Yesu gaw nang hpe chyeju matsan dum ai hte ngwi pyaw lam jaw ya u ga law.

³Nye a ji wa ni galaw ai zawn, san seng ai myit hte ngai daw jau nga ai Karai Kasang hpe ngai shakawn nngai. Ngai gaw shani shana akyu hpyi ai hta nang hpe galoi mung adum nga let Karai Kasang hpe chyeju shakawn nga nngai.

⁴Na a myi prwi ni hpe ngai dum ya nga nngai rai nna ngai hta dai kabu gara ai hte hpring tsup wa u ga, nang hte hkrum lu na matu ngai grai myit n dawt nga nngai.

⁵Nang gaw na a nwoi dwi Lui hte na nnu Uni yan hta shawng rawng ai baw n sawt ai makam masham nang hta mung rawng nga ai hpe ngai dum nga nngai. Shanhte hta rawng ai baw makam masham gaw nang hta mung rawng nga na hpe ngai kam nga nngai.

⁶Dai re ai majaw ngai nang hpe lata mara nna aya dang ya ai shaloi Karai Kasang kaw na nang hkam la sai chyeju kumhpa hpe ahkrung nga shangun na matu nang hpe ngai bai shadum dat de ai.

⁷Hpa majaw nga yang, Karai Kasang anhte hpe jaw ai Wenyi e, anhte hpe hkrit agam ai myit jaw mi ai n rai; Dai Madu a Wenyi gaw anhte hpe n-gun atsam, tsaw ra myit hte tinang hkum hpe hkang la lu ai myit she jaw mi ai.

⁸Dai rai nna anhte a Madu a matu sakse hkam ai hta hkum kaya nga u; bai nna Hkristu a jaw e bawng dung ai wa nye a majaw mung hkum kaya nga u; shing rai na malai, Karai Kasang gaw nang hpe n-gun lagaw jaw da nit dai hte maren, dai Kabu Gara Shiga a jaw e nni nkri hpe hkam sharang u.

⁹Karai Kasang gaw anhte galaw sai mai kaja dum ai amu bungli lama ma a majaw n rai, shi nan a yaw shada ai lam hte chyeju a majaw anhte hpe hkrang la nna shi a amyu masha tai na matu shaga la mani ai. Shi gaw mungkan nnan lat ai ten a shawng kaw nna Hkristu Yesu a marang e dai chyeju anhte hpe jaw da mani ai.

¹⁰Rai ti mung ya gaw, anhte a hkye hkrang la ai Madu Hkristu Yesu du sa ai aten e, dai lam anhte hta shadan dan dat mani ai. Shi gaw si hkrung si htan a atsam hpe yeng seng kau nna, dai Kabu Gara Shiga hku nna n si n mat ai asak hkrung lam hpe shadan dan dat nu ai.

¹¹Dai Kabu Gara Shiga hpe shana shabra na matu Karai Kasang gaw ngai hpe kasa langai mi hku nna mung, sharin achyin ya ai sara hku mung, san da ni ai.

¹²Dai lam a majaw ndai nni nkri ru yak jam jau ni hpe ngai hkam jan nngai, Rai ti mung nye a kam hpa ai myit gaw ngai hta naw hpring chyat nga ai. Hpa majaw nga yang, ngai kadai wa hpe kam manoi nga nngai gaw ngai chye nga ai hte ngai hpe kam nna nye a lata hta ap tawn da sai dai Kabu Gara Shiga hpe tara jeyang ai Shani Nhtoi du hkra makawp maga mahkyu da ya lu ai n-gun atsam shi hta rawng nga ai ngu nna ngai myit mu myit hkut nga nngai.

¹³Ngai nang hpe sharin ya ai teng man ai mungga hpe nang hkan sa na kasi kamang shatai let ngang ngang jum da nna, anhte Hkristu Yesu hte langai sha tai nhtawm asak hkrung ai hte seng ai makam masham hte tsaw ra myit hta ngang ngang jum manoi nga u.

¹⁴Nang hpe kam nna ap ya da sai mai kaja ai arai ni hpe anhte hta shanu nga ai dai Chyoi Pra ai Wenyi a atsam hte a mahkyu nga u.

¹⁵Nang chye nga ndai hte maren, Hpugelu yan Heramoge hte hpawn Asi kaji mung e nga ai ni yawng ngai hpe kau da mani ai.

¹⁶Dai Madu gaw Onesihpuru a nta masha ni hpe chyeju jaw ya u ga, hpa majaw nga yang shi gaw law law lang ngai hpe myit n gun lu la shangun ni ai hta n ga, shi gaw ngai bawng dung hkrum nga ai hpe n kaya ai wa rai nga ai.

¹⁷Shi gaw Roma mare du ai shaloi jang, ngai hpe n mu yang mu hkra hkan tam sagawn la ai.

¹⁸Madu gaw shi hpe dai tara jeyang ai nhtoi hta matsan dum ai lam jaw ya u ga; Ehpesu mare e shi ngai hpe gade wa karum sai gaw, nang atsawm sha chye nga ndai.