Read Jinghpaw Common Language Bible 2009 2 TIMOHTI 4 Bible Online

2 TIMOHTI 4 - Jinghpaw Common Language Bible 2009 bible

2 TIMOHTI 4

¹Karai Kasang a man e mung, hkrung nga ai ni hte si ai ni hpe tara jeyang na ra ai Hkristu Yesu a man e mung, shi gaw up hkang na matu Hkawhkam hku nna du sa na ra ai rai nna ngai nang hpe aja awa shadut dat de ai.

²Dai mungga hkaw dan na matu, chye na shangun na matu, mara madun nna daru na matu, n-gun jaw na matu, myit galu ai hte sharin shaga na matu, (du hkra ladaw ang ai rai ti mung, n ang ai rai ti mung) a shaja nga u, ngu nna ngai nang hpe shadut jahkat dat de ai.

³Masha ni gaw dai teng man nna ra n rawng ai sharin shaga ai lam hpe n madat n mara nna tinang a myit kayut ai hta hkan mat wa ai hte shanhte a myit hta kaya kayoi nga hkra madat la mayu ai lam ni hpe sharin ya na sara ni shanhte a matu grau grau law wa hkra tam lahkawn la ai aten du na ra ai.

⁴Shanhte gaw dai teng man ai lam hpe madat mara ai kaw na kayin htak mat wa nna masha a maumwi mausa ga ni hpe madat mara myit lawm mat wa na mara ai.

⁵Nang chyawm gaw hpa baw mabyin masa lam ni hkrum katut wa ti mung na a hkum hpe hkang tawn nna nni nkri hpe hkam sharang u. Dai Kabu Gara Shiga hkaw tsun ai sara amu hpe gun hpai nna, Karai Kasang a shangun ma langai mi hku na a lit nga manga hpe kup tsup hkra gun hpai nga u.

⁶Nye a matu chyawm gaw, nye a asak hpe nawng kau na aten du ra ai; ya nang e nan nye a matu dinghta asak hpe kau da na aten du magang ra ai.

⁷Ngai gaw gat shingjawng ai lam hta atsam htum hkra gat shakut se ai; gat na matu tawn da ai shadawn shadang hpe htum hkra gat shadu se ai; dai makam masham hpe ngai hkan shatup ni ai.

⁸Ya kaw nna ding hpring ai tara agyi ngu ai dai Madu gaw, tara jeyang ai Nhtoi hta ngai hpe jaw na rai nga ai dai ding hpring ai asak hkrung lam hte seng ai awng padang janmau hpe nye a matu mazing da nu ai. Ngai hpe sha n rai, shi bai du na nhtoi hpe ra sharawng let ala nga ai ni nlang hpe mung ap ya na ra ai.

⁹Ngai hpang de a lawan du lu na matu atsam htum hkra shakut u.

¹⁰Dema gaw ndai dinghta mungkan hpe tsaw ra ai majaw ngai hpe kau da nna Htesaloni mare de sa mat wa sai. Kareka gaw Galati mung de, Titu gaw Dalamati mung de sa mat wa masai.

¹¹Luka chyu sha ngai hte rau nga nga ai. Marku hpe shaga la nna nang hte rau woi sa wa rit; hpa majaw nga yang ndai amu hta shi ngai hpe karum la na re.

¹²Tuhkiku hpe chyawm gaw Ehpesu mare de ngai shangun dat se ai.

¹³Nang sa wa ai shaloi Troa mare na Karku kaw ngai tawn da ai nye a palawng galu mung, laika ni hpe mung, grau nna shanhpyi laika ni hpe mung, la sa wa ya rit.

¹⁴Janghkam Alexandru gaw ngai hpe n kaja ai law law wa galaw ni ai; shi galaw ai hte maren dai Madu gaw shi hpe bai tai htang jaw na ru ai.

¹⁵Nang nan shi hpe sadi makran nga u; hpa majaw nga yang shi gaw anhte hkaw tsun ai mungga hpe aja awa tsun ninghkap kau ya ai wa rai nga ai.

¹⁶Shawng na lang ngai je yang hkrum ai ten hta nye a hkum hpe ngai tsun makawp maga ai shaloi ngai hpang maga tsap nna kadai mung n sa madi shadaw lawm ma ai. Masha yawng gaw ngai hpe kabai kau da mi ai. Karai Kasang gaw shanhte ning rai galaw ai a majaw mara n tai u ga;

¹⁷Rai ti mung Madu gaw ngai hte rau nga nna ngai hpe n-gun lagaw shaja ya nga ai majaw ngai gaw maigan amyu masha ni yawng na lu hkra dai Kabu Gara Shiga hpe hkum hkum tsup tsup hkaw dan lu u ga, sat kau na daw dan hkrum ai kaw na mawai la ai hkrum ni ai.

¹⁸Dai Madu gaw n hkru n hkra ai lam yawng hta na ngai hpe mawai la nna, shi a sumsing lamu Mungdan de hkap hkra shim lam jaw let woi la na ring ngai. Shi hta htani htana prat dingsa e hpung shingkang anga nga u ga law! Amen.

¹⁹Priska hte Akula yan hte Onesihpuru a nta masha ni hpe shakram dat nngai.

²⁰Erastu gaw Korinhtu e nga nga ta sai; Trohpimu gaw machyi ai majaw Miletu mare e ngai tawn da se ai.

²¹Nshung garai n shang yang du sa wa lu hkra atsam htum hkra shakut u. Ubulu, Puden, Linu, Klawdia hte kaga Hkristan hpu nau ni yawng hte gaw nang hpe shakram dat ma ai.

²²Dai Madu gaw na a wenyi hte rau anga nga u ga. Karai Kasang a chyeju gaw nanhte hte rau anga nga u ga law.