Read Jinghpaw Common Language Bible 2009 TITU 2 Bible Online

TITU 2 - Jinghpaw Common Language Bible 2009 bible

TITU 2

¹Rai ti mung nang chyawm gaw teng man ai makam masham hte myit hkrum ai lam hpe hkaw tsun sharin shaga lu na rai ndai.

²Asak kaba sai dingla ni hpe chyaru n len ai sha sadi na matu, temsi rai nga na matu, mu mada chye na ya na matu hte tinang hkum hpe hkang lu na matu mung, teng man ai makam masham rawng nga na hte, tsaw ra nna shakut sharang ai lam hta hpring tsup kunghpan nga mu ga mung sharin shaga u.

³Dai hte maren, asak kaba sai gumgai ni mung, kam sham nna tara hkungga ai ni, shatan nhkan ga n tsun ai hte chyaru a mayam n tai ai sha mai kaja ai lam sharin achyin chye ai ni rai lu mu ga, nang shanhte hpe sharin shaga ya lu na rai ndai.

⁴Shing rai Karai Kasang a mungga gaw shatan nhkan n hkrum u ga, shanhte mung tinang ni hta asak naw kaji ai hpawmi ni tinang a madu wa hte kashu kasha ni hpe tsaw ra ai,

⁵Sumnung shingdi nna sari sadang rawng ai, san seng ai dinghku num kaja tai nna tinang a madu wa hkang ai hku hkan ai ni rai lu na matu sharin shakyang ya lu na ma ai.

⁶Dai hte maren shabrang ni mung, tinang hkum hpe hkang nna sari sadang hte nga mu ga, shadum shahprang nga u.

⁷Lam shagu hpe galaw gun hpai ai lam hta, nang hkum nan kaja ai kasi ningli tai nga u. Myit malang ai hte grai laja lana ahkyak shatai ai hku shadum sharin u.

⁸Na a hpyen ni gaw nanhte hpe hpa lam hta mung mara n mu tam ai majaw kaya hkrum mu ga, nang gaw masha ni a mara shagun n hkrum hkra teng man ai ga ni hte shadum sharin nga u.

⁹Mayam ni gaw tinang a madu a npu e taw nga nna lam shagu hta shanhte kaw myi man pa lu hkra ga nhkap n tsun ai hte,

¹⁰lagu masun la ai baw n galaw mu ga. Shing rai na malai, shanhte gaw galoi mung kaja reng ai hte kangka sadi dung ai ni re ai lam madun dan lu na rai ma ai. Ndai lai ladat hku nna, shanhte gaw tinang galaw ai lam nga manga hta anhte a hkye hkrang la ai Karai Kasang a mungga a ningja hpe shapraw shadan dan lu na rai ma ai.

¹¹Hpa majaw nga yang, Karai Kasang gaw masha amyu yawng hpe shi a hkye hkrang la ai chyeju shapraw shadan dan nu ai.

¹²Anhte gaw anhte a galu kaba ai Karai Kasang ngu ai hkye hkrang la ai Madu Yesu a hpung shingkang dan pru na a lu ai nhtoi hpe ala nga let, tara n hkungga ai myit hte mungkan ga hpe marin marit ai myit hpe kabai kau na matu mung,

¹³sari sadang hte si si rai nga na lam, ding hpring nna tara hkungga ai asak hkrung lam hte ndai mungkan hta nga pra na matu mung, dai chyeju tara gaw anhte hpe sharin ya nga ai.

¹⁴Anhte hpe tara tawt lai ai n hkru n kaja ai mara yawng mayawng hta na hkye hkrang shaw la na matu mung, anhte gaw myit masin san seng nna shi hte chyu sha seng ai amyu tai let, kaja reng ai magam bungli galaw na myit katu sharawng ai amyu tai na matu mung, Hkristu gaw anhte a matu mara shi hkum dai hpe ap ya kau nu ai.

¹⁵Nang gaw ndai lam ni hpe hkaw tsun sharin shaga u. Nang n-gun jaw shadum shahprang sharin shaga ai shaloi nang lu ai ahkang aya nga manga jai lang u; kadai mung nang hpe n gawn n sawn, n yu kaji mu ga.