Read Jinghpaw Common Language Bible 2009 HEBRE 10 Bible Online

HEBRE 10 - Jinghpaw Common Language Bible 2009 bible

HEBRE 10

¹Yuda ni a Tara gaw kaja wa ajet re ai lam ni a teng man kup tsup ai hkrang kasi majing n re ai sha, du na ra ai ngamu ngamai lam a n dan n leng re ai shingna sha rai nga ai. Shanhte gaw tut nawng e nawng ya nga ai shagu hkungga amyu baw ni hpe sha shaning shagu nawng ya ma ai. Dai rai nna ndai hkungga ni hte Karai Kasang hpang de sit shang wa ai masha ni hpe dai tara gaw gara hku nna hkum tsup ai ni tai wa shangun lu na rai ta?

²Lama rai nna Karai Kasang hpe nawku daw jau nga ai masha ni hpe yubak mara kaw na jasan jaseng kau lu ai rai yang gaw, shanhte yubak mara naw lu ai ni re ngu nna galoi mung n myit nawn sana rai nna, hkungga nawng ai lam yawng mung hkring mat sana rai nga ai.

³Ya gaw shaning shagu nawng jau ai shagu hkungga ni gaw masha ni hpe shanhte a yubak mara ni a lam myit dum shangun na matu rai nga ai.

⁴Hpa majaw nga yang, usu asai hte bainam asai gaw yubak mara hpe galoi mung yeng seng kau ya lu ai n rai.

⁵Dai re ai majaw, Hkristu gaw ndai mungkan de du sa hkyen nga ai shaloi Karai Kasang hpe, “Nang gaw shagu hkungga ni hte kumhpa ni hpe ra nga ndai n rai; nye a matu hkum hkrang hpe nang lajang da nit dai;

⁶Tawn hkungri ntsa na hkum ting dusat hkungga ni hte mara raw hkungga ni hpe nang n sharawng ndai.

⁷Shaloi ngai gaw, ‘Karai Kasang e tara laika hta nye a lam ka da nga ai hte maren, nang myit ra ai hku galaw na, ya ngai nang e du sa ring ngai,’ ngu we ai,’” nga nna tsun ai.

⁸Bai shi gaw, “Nawng jau ai hkungga ni hte kumhpaw kumhpa ni hpe mung, tawn hkungri ntsa e nat nawng ai wan nat hkungga hpe mung, mara raw hkungga ni hpe mung, dai tara hte maren nawng jau ai mi rai hkra rai ti mung, dai hkungga ni hpe Madu nang ra sharawng nga ndai n rai,” nga nna shi shawng tsun ai.

⁹Dai hpang shi gaw, “Karai Kasang e nang myit ra ai hku hkan galaw na ya ngai nang e nga nga nngai,” nga nna tsun ai. Dai majaw Karai Kasang gaw shawng na nawng jau ai hkungga dingsa ni yawng hte hpe yeng seng kau nhtawm, Hkristu a nawng jau ai hpe dai ni a shara hta malai bang shagrin da nu ai.

¹⁰Yesu Hkristu gaw Karai Kasang galaw shangun mayu ai myit ra ai hku hte maren, shi a hkum hkrang nan hpe kalang mi hte yawng ngut hkra nawng ya kau ai a marang e, anhte yawng gaw yubak mara kaw na shachyoi shapra la ai hkrum lu saga ai.

¹¹Yuda hkinjawng shagu gaw shi a daw jau ai amu ni hpe shani shagu galaw nga let, hkungga nawng jau ai lam amyu mi hpe sha law law lang galaw nga ai; rai ti mung ndai nawng jau ai hkungga ni gaw yubak mara ni hpe galoi mung yeng seng kau ya lu ai n rai.

¹²Hkristu chyawm gaw yubak mara raw dat na matu, prat dingsa na matu akyu nga ai hkungga langai sha hpe nawng ya ngut jang, Karai Kasang a hkra maga de wa dung nga sai.

¹³Ya shi gaw dai yang e, shi a gumlau ni hpe shi a lagaw npu e lagaw kabye lahkum hku Karai Kasang e tawn da ya ai du hkra ala nga let, nga nga ai.

¹⁴Hpa majaw nga yang, shi gaw nawng ya ai hkungga langai mi hte shachyoi shapra la ai hkrum sai ni hpe prat dingsa na matu jahkum shatsup ya wu ai.

¹⁵Dai Chyoi Pra ai Wenyi mung anhte hpe sakse hkam ya mi ai. Shawng nnan e shi gaw,

¹⁶“Da ndai gaw du na ra ai nhtoi ni hta shanhte hte ngai tawn da na rai nga ai ga shaka rai nga ai; shanhte a kraw lawang ni hta nye a tara ni hpe bang da nna, shanhte a myit ni hta ka da na we ai,” nga nna dai Madu tsun ai.

¹⁷Dai hpang shi gaw, “Shanhte a yubak mara ni hpe mung, shanhte a n hkru n kaja ai amu ni hpe mung, ngai bai n dum na nngai,” nga nna bai tsun ai.

¹⁸Dai rai nna yubak mara ni hpe raw dat kau ai hkrum sayang gaw, yubak mara raw dat kau ya na matu hkungga nawng ya n ra sai.

¹⁹Dai re ai majaw, nye a hpu nau ni e, Yesu si hkam ai a marang e anhte gaw dai Chyoi Pra Htum ai Shara de shang na matu hkum tsup re ai awm dawm ahkang lu saga ai.

²⁰Shi gaw shi a hkum hkrang ngu ai Nawku Htingnu nba grang hpe lai di nna Karai Kasang a man de hkrang shang ai asak hkrung lam ningnan langai mi anhte a matu hpaw ya mani ai.

²¹Anhte hta Karai Kasang a nta dinghku hpe up sin na hkinjawng kaba langai mi lu ga ai.

²²Dai re ai majaw anhte gaw mara lu dum ai kraw lawang ni hpe shachyoi shapra kau nna, anhte a hkum hkrang hpe mung san seng ai ntsin hte kashin kamun kau ngut jang, n shut n shai hkrak re ai makam masham hte Karai Kasang hpang de sit shani shang wa ga.

²³Anhte yin la kam sham ai makam masham a myit mada ai lam hta n shamu n shamawt hkra anhte maju jung nga ga; hpa majaw nga yang, Karai Kasang gaw shi tawn da ai ga sadi hta kangka re ai wa rai nga ai hpe anhte kam hpa lu ga ai.

²⁴Anhte gaw anhte shada da karum shingtau hkat na matu, shada da tsaw ra myit madun hkat let, mai kaja ai lam galaw na matu shada da myit tau myit htang hkat nga ga.

²⁵Shada da hkrum zup hpawng de ai htung lai hpe nkau mi kau tawn da ai lam galaw nga ma ai; anhte gaw dai zawn n galaw ai sha, dai Madu bai du sa na shani ninghtoi ni wa magang ra ai hpe nanhte chye nga myit dai majaw, shada da grau nna n-gun jaw hkat nga ga.

²⁶Hpa majaw nga yang, anhte gaw dai teng man ai lam hpe chye na hkam la ngut sayang me, yubak hpe dingsang galaw dingyang rai nga ga yang gaw, anhte a yubak mara a matu nawng ya na shagu hkungga naw nga sana n rai.

²⁷Anhte gaw du na ra ai tara daw dan ai lam hte Karai Kasang hte nhtan shai ai ni hpe nat jahten kau na nachying hkrithpa wan hpe hkrit kahpra let ala nga na lam sha nga sai.

²⁸Mawshe a Tara hpe n madat n mara tawt lai ai wa kadai mung, sakse lahkawng masum a ga hte mara lu ai ngu nna daw dan hkrum ai rai yang, matsan n dum ai sha si ari jaw ai hkrum ma ai.

²⁹Dai rai yang gaw, Karai Kasang a Kasha hpe n kaw n law di kau ai wa, tinang hkum hpe yubak mara kaw na shachyoi shapra la ai Karai Kasang a ga shaka hte seng ai asai hpe hpa n nawn, ahpa atang re ai arai shatai ai wa, chyeju jaw ya ai Wenyi hpe roi n ra re ai wa gaw kaning rai na kun? Shi hkrum sha ging ai ari gaw gade grau sawng na kun? She myit yu mu!

³⁰Hpa majaw nga yang, “Ngai matai htang na mawe ai, nga nna mung, yubak a shabrai hpe ngai hteng ya na nngai,” nga nna mung, bai dai Madu gaw shi a amyu masha ni hpe tara daw dan na ra ai, nga nna mung, tsun ai wa gaw kadai re ai hpe anhte chye ga ai.

³¹Hkrung nga ai Karai Kasang a lata de hkrat bang wa ai lam gaw nachying hkrithpa wa rai nga ai!

³²Lai wa sai nhtoi ni hta nanhte kaning re ai ni re ai hpe bai dum nga mu. Dai nhtoi ni hta Karai Kasang a nhtoi hpe hkam la lu ai hpang, tsin-yam tsindam law law hkrum sha lai wa manit dai; rai ti mung nanhte shakut sharang dating ai a majaw dai gaw nanhte hpe dang kau lu ai n rai.

³³Nanhte nan masha shawa a man e jahpoi asawng ai hte zingri zingrat ai lam ni ya sha ya sha hkrum lai wa manit dai, bai kaga aten ni hta gaw, nanhte zawn zingri zingrat hkrum sha nga ai manaw manang ni a maga de nga nna ruyak jam jau jawm hkam sha ai hku nna karum n-gun jaw manit dai.

³⁴Nanhte gaw bawng dung ai ni hkrum ai nni nkri hpe hkap shalan shabran lawm myit dai; nanhte a arung arai ni hpe kashun kashe di la kau hkrum ai shaloi mung kabu gara ai hte asum hkam myit dai, hpa majaw nga yang, grau nna kaja reng ai dinggrin anga nga ai arung arai lama mi nanhte naw lu nga myit dai hpe nanhte chye nga myit dai.

³⁵Dai re ai majaw nanhte a nden marai hpe hkum kau hkum tat myit, shing rai yang, nanhte shabrai kaba lu la na marin dai.

³⁶Karai Kasang a myit ra ai lam hkan galaw na hte, shi a ga sadi ni hte maren akyu hkam la lu hkra nanhte myit galu kaba hkam sharang ra nga myit dai.

³⁷Hpa majaw nga yang, Chyum Laika hta, “Loi hkring mi rai jang du sa na ra ai wa gaw, aten jahkring mi laman du sa na ra ai, shi hkring shana chyai nga na n rai.

³⁸Nye a ding hpring ai masha ni chyawm gaw, kam sham ai hte hkrung nga na mara ai. Rai ti mung shanhte hta na langai ngai sit htingnut htak mat wa a yang gaw, ngai shi hta sharawng awng na nngai n rai,” nga nna tsun nga ai.

³⁹Anhte gaw sit htingnut nna mat mat ai masha ni n re ai sha, kam sham nna hkye hkrang la hkrum ai ni rai nga ga ai.