Read Jinghpaw Common Language Bible 2009 HEBRE 3 Bible Online

HEBRE 3 - Jinghpaw Common Language Bible 2009 bible

HEBRE 3

¹Karai Kasang lata shaga la hkrum ai nye a Hkristan hpu nau ni e, anhte yin la ai nawku htung makam masham a Hkinjawng Agyi Kaba tai na matu Karai Kasang e shangun dat ai Yesu hpe myit yu mu.

²Mawshe gaw Karai Kasang a nta na shi a bungli hta kangka ai zawn, ndai amu galaw na matu lata la ai Karai Kasang a ntsa e kangka rai nga ai.

³Nta langai mi hpe gaw gap da ai wa gaw, dai nta hta grau ai arawng sadang lu ai hte maren Yesu mung Mawshe hta grau ai arawng sadang hte shagrau sha-a ai hpe hkam la ging nga ai.

⁴Nta ngu ai hpe marai langai ngai e gaw gap da nga ai; yawng mayawng hpe gaw gap ai wa chyawm gaw Karai Kasang rai nga ai.

⁵Mawshe gaw Karai Kasang a nta na shangun ma zawn kangka ai wa rai nna, htawm hpang de Karai Kasang tsun dan na ra ai lam ni hpe tsun ai wa rai nga ai.

⁶Hkristu chyawm gaw Karai Kasang a nta hpe up ai Kasha re ai hku nna kangka rai sadi dung nga ai. Anhte nden marai rawng nna tinang ni a kabu gara myit mada ai lam hpe jahtum du hkra myit mu myit hkut ai hte ngang ngang kang kang manoi nga ga yang gaw, Karai Kasang a nta masha ni rai nga ga ai.

⁷Dai re ai majaw, dai Chyoi Pra ai Wenyi tsun ai hte maren, “Nanhte dai ni Karai Kasang a nsen na myit yang gaw,

⁸Karai Kasang hpe gumlau nna nam mali e rai nga ai ten hta shi hpe chyam dinglik yu ai nanhte a nji nwa ni zawn du hkum ja nga myit.

⁹Karai Kasang gaw, nanhte a nji nwa ni shaning mali shi ning ting, nam mali e ngai galaw dan sai amu hpe mu ma ti mung ngai hpe ninghkap nna chyam yu nga ma ai.

¹⁰Dai re ai majaw ngai nanhte hpe pawt bu nna, ‘Shanhte galoi mung sadi n dung ai hte nye a hkang da ai ga ni hpe n hkan sa ma ai ngu nna ngai tsun mawe ai.’

¹¹Ngai pawt bu ai hte shanhte gaw, ‘Ngai shanhte hpe jaw na rai nga ai ban sa ai shara de galoi mung n shang lu na ma ai!,’ ngu nna ngai dagam da se ai.’”

¹²Kam sham ai hpu nau ni e, ahkrung nga ai Karai Kasang kaw na htak mat wa hkra n hkru n shawp kam shut chye ai myit masin rawng ai masha nanhte hta na langai mi mung n lawm malit ga, sadi nga mu.

¹³Nanhte hta na langai mi mung yubak mara e hkalem hkalau ai hkrum nna du ja ai masha n tai myit ga, Chyum Laika hta tsun ai “Dai ni” ngu nna anhte a matu naw tsun lu ai laman hte hta, shani shagu shada da mahtang karum shadaw hkat nga mu.

¹⁴Hpa majaw nga yang, Hkristan shawng nnan tai wa ai shaloi na zawn myit mu myit hkut ai makam masham hta jahtum du hkra ngang ngang manoi manat nga ga yang gaw, anhte yawng gaw Hkristu hte rau rum magam gunhpai ai ni rai ga ai.

¹⁵Chyum laika hta, “Dai ni nanhte Karai Kasang a nsen hpe na la myit yang gaw, Karai Kasang hpe nanhte a nji nwa ni gumlau ai shaloi na zawn, du hkum ja nga myit,” nga nna tsun nga ai.

¹⁶Karai Kasang a nsen hpe na nga ninglen, shi hpe gumlau ai ni gaw kadai ni wa rai nga ma ta? Shanhte gaw Egutu mung kaw nna Mawshe shaw woi wa ai ni yawng hte wa rai nga ma ai.

¹⁷Shaning mali shi ning tup Karai Kasang a pawt sindawng ai hkrum sha ai ni gaw kadai ni rai ma ta? Dai ni gaw, yubak mara galaw nna nam mali e kadang si mat ai ni rai nga ma ai.

¹⁸“Shanhte gaw ngai jaw na rai nga ai ngwi pyaw ban sa ai mung de galoi mung n shang lu na ma ai,” nga nna kadai hpe sha-ang nna Karai Kasang dagam da a ta? Shi a ga hpe n madat nna gumlau ai ni hpe sha-ang nna tsun ai n rai ni?

¹⁹Shanhte n kam n sham ma ai majaw dai mung de n shang lu ma ai hpe anhte mu chye lu ga ai.