Read Jinghpaw Common Language Bible 2009 HEBRE 6 Bible Online

HEBRE 6 - Jinghpaw Common Language Bible 2009 bible

HEBRE 6

¹Dai re ai majaw anhte gaw Hkristan makam masham a ga kanu ni hpe tawn kau da nhtawm, makam masham hta kunghpan kaba sai masha ni hte htap htuk ai hkum tsup kunghpan ai sharin shaga ai lam de lahkam sa wa ga. Anhte gaw akyu n rawng amu ni hpe tawn kau da nna Karai Kasang hpe kam sham let,

²hkalup hkam ai lam, lata mara aya dang ai lam, si ai kaw na bai rawt wa ai lam hte htani htana daw dan hkrum ai lam ni hpe bai sharin kahtap npawt gaw na n ra saga ai.

³Ya Karai Kasang ahkang jaw yang anhte ndai hpe galaw na ga ai.

⁴Hpa majaw nga yang, dai makam masham kaw na htak mat wa sai ni hpe myit malai kalang mi bai lu shangun na lam kaning rai mai byin na kun? Shanhte gaw Karai Kasang a nhtoi hta kalang mi nga yu sai rai nna sumsing na chyeju kumhpa hpe chyim yu sai hte dai Chyoi Pra ai Wenyi hpe jawm hkam la yu sai ni rai ma ai.

⁵Bai nna shanhte gaw Karai Kasang a mungga gaw mai kaja nga ai hpe mung, htawm hpang prat hte seng ai hpung shingkang atsam hpe mung, tinang nan mu hkrum hkam sha nna chye sai ni rai ma ai.

⁶Shing re ai hpang she, ya shanhte gaw shanhte a makam masham hpe kau da manu ai. Shanhte gaw Karai Kasang a Kasha hpe wudang hta kalang mi bai jen da nna, shawa masha ni a man e n gawn n sawn di kaya jahkrum da nga ma ai majaw, shanhte hpe myit malai bai lu shangun na matu gara hku mung n mai byin mat sai.

⁷Law law lang htu bun ai marang hka hpe hkap la nna shawt hkai ai ni a matu akyu rawng ai hkai nmai tu kaba shangun ai aga hpe Karai Kasang shaman chyeju ajaw ya nga ai.

⁸Rai ti mung dai aga gaw ju hpun hte atsing ni sha tu pru shangun ai rai yang gaw hpa akyu mi n nga ai hta n ga, Karai Kasang a dagam dala ai hkrit hpa hte wan hta jahten kau ai hkrum na ra ai.

⁹Tsaw ra ai ni e, anhte ning nga nna tsun ga ti mung, nanhte hte seng nna anhte myit tsang ai lam nga ga ai. Nanhte gaw dai hkye hkrang la ai lam hte seng nna grau kaja ai shaman chyeju lu la manit dai hpe anhte chye ga ai.

¹⁰Hpa majaw nga yang, Karai Kasang gaw n tara ai wa n rai nga ai. Shi gaw nanhte galaw gun hpai lai wa sai magam bungli hpe mung, Madu hpe tsaw ra ai lam nanhte madun dan na matu lai wa sai ten kaw nna ya du hkra Hkristan masha shada da karum la hkat ai hpe mung, Karai Kasang malap kau wu ai n rai.

¹¹Anhte a ra sharawng ai lam kaba gaw nanhte a myit mada ai lam ni hpring tup wa ai du hkra langai hte langai gaw tinang myit rawt sharawng awng ai myit hpe jahtum du hkra grin nga shangun na lam rai nga ai.

¹²Anhte gaw nanhte hpe lagawn ai ni n tai shangun mayu ga ai. Rai ti mung, kam sham ai hte myit galu kaba ai ni tai let Karai Kasang jaw ya sai sali wunli hkam la ai ni zawn nanhte hpe tai wa shangun mayu ga ai.

¹³Karai Kasang gaw Abraham hpe ga sadi jaw ai shaloi, shi a ga sadi hte maren shi galaw na wu ai lam dagam da wu ai. Shi hta grau kaba ai mi n nga sai majaw, shi nan a mying hpe gang nna dagam wu ai.

¹⁴Karai Kasang gaw, “Ngai nang hpe kaja wa shaman ya nna, matu mara ni law law jaw ya na ngu nna ga ndat jaw da de ai,” nga nna tsun ai.

¹⁵Abraham gaw hkam sharang ai hte ala nga ai majaw Karai Kasang a ga sadi hte seng ai sali wunli hpe hkam la nu ai.

¹⁶Masha gaw dagam ai ga tsun ai shaloi tinang hta grau kaba ai wa langai ngai a mying gang nna dagam ga ma ai hte shanhte a ndang kalang hkat ai lam yawng hpe dai dagam ai ga hte shagrin shangut kau lu ma ai.

¹⁷Karai Kasang gaw shi a shatawng shada ai lam hpe galai shai kau shangun na n re ai lam ga sadi hte seng ai sali wunli hkam la ai ni hpe asan sha madun dan mayu wu ai; dai re ai majaw, shi a ga sadi hta dagam ai ga jat bang wu ai.

¹⁸Shing rai dai ga sadi hte dagam ai ga myu lahkawng yan gaw n mai galai mat ai baw re ai majaw Karai Kasang gaw masu ga tsun ai n rai. Dai re ai majaw shi hta shingbyi nna shim ai lam lu la ai ni ngu ai anhte gaw anhte hpe jaw ya ai myit mada shara hta ngang ngang kang kang magra noi nga na matu n-gun jaw ai lam grai wa lu la saga ai.

¹⁹Anhte gaw dai myit mada shara hpe anhte a asak hkrung lam a matu hpri chyinghkyi langai mi zawn hkam la lu saga ai. Dai myit mada ai lam gaw shim ai hte grin ai lam rai nna sumsing lamu na htingnu kata a nba grang kata maga gawk de waw lai hkrang shang wa sai.

²⁰Yesu gaw anhte a malai dai shara e anhte a shawng e du shang nga sai rai nna Melhkizedek a hkringhtawng lam hku htani htana hkinjawng agyi kaba tai wa sai.