Read Jinghpaw Common Language Bible 2009 HEBRE 7 Bible Online

HEBRE 7 - Jinghpaw Common Language Bible 2009 bible

HEBRE 7

¹Ndai Melhkizedek gaw, Salem Mare a hkawhkam hte Tsaw Htum ai Karai Kasang a hkinjawng wa shi rai nga ai. Hkawhkam mali hpe gasat dang kau nna Abraham bai du wa yang, Melhkizedek gaw shi hpe hkap tau la nna shaman ya wu ai.

²Abraham mung shi la wa ai lanep yawng hta na htam shi na htam mi Melhkizedek hpe jaw wu ai. (Melhkizedek ngu ai mying a shawng na lachyum gaw, Ding Hpring ai a Hkawhkam rai nna, Salem hkawhkam ngu ai lachyum gaw Ngwi Pyaw ai a Hkawhkam ngu ai rai nga ai.)

³Melhkizedek a kanu kawa kaji kawoi ru sai labau hpe mung shi shangai wa ai hte si mat wa ai labau hpe mung n mu lu ai majaw, shi gaw Karai Kasang a Kasha hte bung nna, dinggrin anga nga ai hkinjawng wa rai nga ai.

⁴Anhte a dan hkung ai kaji kawa Abraham gaw majan pa kaw na shi lu wa ai lanep yawng a htam shi hta na htam mi Melhkizedek hpe sak jaw ai rai yang, shing rai sak jaw ai hpe hkam la ai wa gaw gade kaba ai wa rai na gaw nanhte myit sawn yu mu.

⁵Hkinjawng ni rai nga ai Lewi a aru arat ni gaw Israela amyu masha ni kaw na htam shi hta na htam mi hta la na matu dai tara hta shanhte hpe hkang da manu ai. Dai Israela amyu masha ni mung Abraham a aru arat ni pyi rai nga ma ai.

⁶Melhkizedek gaw Lewi amyu hta na n rai ti mung Abraham kaw na htam shi hta na htam mi hkam la nna Karai Kasang kaw na ga ndat lu la tawn ai Abraham hpe shaman ya wu ai.

⁷Shaman ya ai wa gaw shaman hkam la ai wa hta grau kaba ai wa rai nga ai gaw hpa ningdang shara n nga ai.

⁸Hkinjawng agyi ni hku nna htam shi hta na htam mi hta la ai gaw si chye ai masha ni e hta la ai rai nga ai; rai ti mung Melhkizedek hta la ai htam shi hta na htam mi gaw Chyum Laika hta tsun ai hte maren asak ahkrung nga ai wa e hta la ai rai nga ai.

⁹Htam shi hta na htam mi hta la ai Lewi wa gaw Abraham a lata hku nna htam shi hta na htam mi Melhkizedek hpe jaw nu ai ngu nna tsun lu nga ai.

¹⁰Hpa majaw nga yang, Melhkizedek gaw Abraham hpe hkap tau la ai shaloi e, Lewi garai n shangai ai, shi a kaji kawa Abraham a nshang e she naw rai nga ai, ngu nna tsun lu nga ai.

¹¹Israela amyu masha ni hpe dai jep ai Tara jaw ai shaloi Lewi amyu lakung a hkinjawng aya hkringhtawng hta npawt nhpang shatai nna jaw ya sai. Ya Lewi amyu lakung a hkinjawng ni hkum tsup hkra gun hpai lu ma ai teng yang gaw, Arun n re ai sha, Melhkizedek a hkringhtawng hpe hkam la ai kaga hkinjawng langai mi bai paw pru ra na n rai.

¹²Hpa majaw nga yang, dai hkinjawng hkringhtawng hpe galai kau dat lu ai rai yang gaw, dai jep ai tara mung galai kau ra na sha rai nga ai.

¹³Ndai ya tsun nga ai lam hte seng ai wa anhte a Madu gaw amyu ru sai kaga kaw na wa rai nna, dai amyu hta na kadai mung hkinjawng langai mi hku nna galoi me tawn hkungri hta daw jau yu ai n rai.

¹⁴Shi gaw Yuda amyu hta na shangai wa sai hpe yawng chye nga ai; Mawshe gaw hkinjawng ni hte seng nna tsun ai shaloi Yuda amyu ru sai a lam hpa mung n tsun da nga ai.

¹⁵Melhkizedek hte bung ai kaga hkinjawng langai mi paw pru wa ai majaw hkinjawng amyu galai mat sai lam grau nna dan leng wa sai.

¹⁶Dai wa gaw hkinjawng aya hta masha e gaw de shalat da ai tara masa hku nna dang da hkrum ai wa n rai; n htum n wai lu ai asak a n-gun atsam hku nna dang da hkrum ai wa she rai nga ai.

¹⁷Hpa majaw nga yang, Chyum Laika hta, “Nang gaw Melhkizedek a hkringhtawng hta matut nna htani htana hkinjawng langai mi tai na rin dai,” nga nna tsun nga ai.

¹⁸Shawng na tara gaw n-gun kya nna akyu n nga mat sai majaw yeng seng kau ai hkrum sai.

¹⁹Hpa majaw nga yang, Mawshe a Tara gaw hpa lam hpe mung hkum tsup hkra galaw lu ai n rai. Ya chyawm gaw dai grau kaja ai myit mada shara jaw mani ai rai nna, de a marang e anhte Karai Kasang kaw sit shani shang lu ga ai.

²⁰Dai hta kaga Karai Kasang dagam da ai ga mung naw nga ai. Bai kaga ni hkinjawng shatai ai shaloi dai zawn re ai dagam ga n lawm nga ai.

²¹Rai ti mung Yesu gaw dagam ai ga hte hkinjawng tai wa sai. Karai Kasang shi hpe tsun ai gaw, “Nang gaw htani htana hkinjawng tai na rin dai: nga nna dai Madu dagam ai ga tsun sai majaw, shi a ga hpe dawm kau na ra ai n rai,’” nga nna tsun ai.

²²Ndai zawn aya hkam ai lam hta shai hkat ai majaw Madu Yesu gaw grau kaja ai ga shaka hpe pahkam hkam ya ai wa tai wa sai.

²³Bai nna shai hkat ai lam kaga naw nga ai; hkinjawng aya hkam la ai kaga hkinjawng ni law law nga ma ai; shanhte gaw si ai lam hpe n koi yen lu ma ai majaw shanhte a bungli hpe n matut galaw lu ma ai.

²⁴Rai ti mung, Yesu gaw htani htana asak hkrung nga ai rai nna, shi a hkinjawng aya mung marai langai ngai a lata de htawt galai mat wa ai n rai.

²⁵Dai rai nna shi gaw shi hpe manoi kam hpa let Karai Kasang kaw sit shang wa ai ni hpe galoi mung hkye mawai la na atsam rawng nga ai; hpa majaw nga yang, shi gaw shanhte a matu Karai Kasang kaw hpyi nem ya na, tut nawng e ahkrung nga ai.

²⁶Dai rai nna Yesu gaw anhte hta byin nga ai ra kadawn ai lam ni hpe karum kapa ya ai, anhte a matu hkrak ai Hkinjawng Agyi Kaba wa rai nga ai. Shi gaw chyoi pra san seng nna shi hta shut ai lam shing n rai yubak mara hpa mung n rawng nga ai; shi gaw yubak lu ai ni hta n lawm ai sha ginhka la nna sumsing lamu du hkra shagrau shatsaw da hkrum ai wa rai nga ai.

²⁷Shi gaw kaga hkinjawng agyi ni zawn shawng e tinang lu ai yubak mara ni a matu shani shagu hkungga nawng ya ra ai n rai. Shi gaw shi hkum nan hpe hkungga shatai nna nawng ya ai shaloi kalang mi hte ngut hkra nawng kau nu ai.

²⁸Mawshe a tara gaw n-gun kya nna n hkum n tsup ai masha ni hpe Hkinjawng Agyi Kaba aya hta dang da nga ai; rai ti mung tara shapraw ai hpang e du sa ai, Karai Kasang dagam let jaw ai ga ndat gaw, htani htana hkum tsup ai Kasha wa hpe Hkinjawng Agyi Kaba aya hta dang da wu ai.