Read Jinghpaw Common Language Bible 2009 HEBRE 8 Bible Online

HEBRE 8 - Jinghpaw Common Language Bible 2009 bible

HEBRE 8

¹Ya anhte tsun dan nga ai lam ni a ahkyak ai ga madung gaw: anhte gaw Sumsing Lamu na Daru Magam hte hpring ai tingnyang a hkra maga de dung nga ai Hkinjawng Agyi Kaba lu ga ai.

²Shi gaw sumsing lamu na chyoi pra dik ai shara hta Hkinjawng Agyi Kaba amu gun hpai nga ai, dai shara gaw sumsing lamu ngu ai masha lata hte n galaw da ai, Karai Kasang e galaw da ai sum majing rai nga ai.

³Hkinjawng Agyi shagu gaw kumhpaw kumhpa ni hte dusat hkungga ni hpe Karai Kasang kaw nawng jau na matu dang da hkrum ai wa rai nga ai, Dai hte maren anhte a Hkinjawng Agyi Kaba mung shi hta nawng jau na hkungga lama mi lu ra nga ai.

⁴Shi gaw ga ntsa e nga ai rai yang, hkinjawng agyi gara hku mung tai na n rai; hpa majaw nga yang, Yuda tara hte maren kumhpaw kumhpa ni nawng jau ai hkinjawng ni nga chyalu rai sai.

⁵Hkinjawng ni hku nna shanhte galaw ai bungli gaw sumsing lamu na nawku daw jau ai kasi a shingnip shingna sha rai nga ai. Mawshe galaw lai wa sai amu ni mung, dai hte maren sha tai nga ai. Hpa majaw nga yang, Mawshe gaw dai chyoi pra ai sum gaw gap na hkyen ai shaloi, Karai Kasang gaw shi hpe “Bum ntsa e ngai nang hpe madun dan sade ai hkrang kasi hte maren yawng mayawng hpe galaw lu hkra sadi nga u,” nga nna tsun ai majaw rai nga ai.

⁶Rai ti mung ya chyawm gaw dai hkinjawng agyi kaga ni lu ai aya hta grau ai hkinjawng amu a aya Yesu hpe jaw ya sai. Karai Kasang hte masha a lapran e Yesu lajang ya ai ga shaka tara gaw grau kaja ai ga shaka rai nga ai. Hpa majaw nga yang, dai ga shaka gaw shawng na hta grau kaja ai ga sadi ni hta npawt de da nga ai.

⁷Shawng na ga shaka hta ra n rawng ai teng yang gaw, hpang na lahkawng ngu na ga shaka hpe gaw da shara n nga ai.

⁸Rai ti mung Karai Kasang gaw shi a amyu masha ni hpe mara shagun let, “Israela amyu masha ni hte mung, Yuda amyu masha ni hte mung ga shaka ningnan tawn da na nhtoi du na ra ai.

⁹Dai ga shaka gaw, shanhte hpe ngai lata hte dun la nna, Egutu mung na woi wa ai shaloi, shanhte a kaji kawa ni hte ngai tawn da ai ga shaka hte bung na ra ai n rai. Shanhte gaw ngai hte tawn da ai ga shaka hta sadi n dung ma ai majaw, ngai shanhte hpe n yu n gawn na nngai, nga nna dai Madu tsun ai.

¹⁰Ya ndai ga shaka gaw du na ra ai nhtoi ni a hpang e Israela amyu masha ni hte ngai tawn da na ga shaka rai nga ai. Shanhte a myit masin kata hta nye a tara hpe ngai bang da ya na mawe ai, shanhte a kraw lawang hta ka da na we ai: Shanhte a Karai Kasang ngai tai na nngai rai nna, shanhte gaw nye a amyu masha ni tai na mara ai.

¹¹Shanhte hta na kadai wa mung tinang a mungchying sha shada hpe mung, tinang a hpu nau shada hpe mung, Karai Kasang hpe chye chyang wa hkra sharin achyin ya ra na ma ai n rai. Hpa majaw nga yang, kaji htum ai kaw nna kaba htum ai du hkra shanhte nlang hte gaw ngai hpe chye chyap na mara ai.

¹²Shanhte a mara hpe ngai raw kau ya nna, shanhte shut hpyit ai lam ni hpe ngai bai dum ya sana n rai, nga nna dai Madu tsun nga ai.”

¹³Dai ga shaka ningnan a lam tsun ai lachyum gaw, Karai Kasang gaw shawng na ga shaka hpe dingsa shatai kau ai lam rai nga ai; dingsa nna tsam mat ai hpa rai ti mung, gade n na yang mat mat na ra ai.