Read Jinghpaw Common Language Bible 2009 HEBRE 9 Bible Online

HEBRE 9 - Jinghpaw Common Language Bible 2009 bible

HEBRE 9

¹Shawng na ga shaka hta nawku daw jau ai hte seng ai htung lai ni nga ai hte maren masha lata hte galaw ai nawku shara mung nga ra nga ai.

²Hpa majaw nga yang, sum langai mi gap da nga ai. De a shawng na gawk hta pyengdin shadun hte Karai Kasang kaw nawng ya ai hkungga, muk mara da ai ku nga nga ai. Dai hpe Chyoi Pra ai shara ngu mu ai.

³Bai lahkawng ngu na nba grang a kata maga gawk na hpe Chyoi Pra Htum ai Shara ngu ma ai.

⁴Dai hta e manam pyaw ai baw nat ai aja hkungri hte hkum ting ja hte sup tawn ai Ga Shaka Sumpu rawng nga ai. Dai Sumpu kata e manna muk rawng ai ja dibu mung, alap hkalung ni prut pru wa ai Arun a dawhkrawng mung, jep ai Tara hpe ka tawn ai lungpa 2 mung, rawng nga ai.

⁵Dai Sumpu a ntsa e singkaw tu ai hkrung kanu sumla nga ai rai nna Karai Kasang shanu nga ai kumla shapraw ma ai. Shanhte a singkaw ni hpe yubak mara ni hpe raw kau ya ai shara ngu ai Sumpu magap ntsa e hpyan ka-up nga ma ai. Ndai lam a lachyum hpe azin ayang htai dan shara n nga ai.

⁶Ndai nawku daw jau ai htung lai hte maren, hking jahkum lajang ngut ai hpang, hkinjawng ni gaw shanhte a daw jau ai amu gun hpai na matu sum kata na shawng du ai gawk de shani shagu shang ma ai.

⁷Rai ti mung sum kata maga na shara de chyawm gaw hkinjawng agyi kaba wa hkrai sha tinang nan a matu mung, masha ni a n dum n chye nna shut ai mara a matu mung, nawng ya ai asai lang let laning mi hta e lang mi sha, shang lu ai.

⁸Ndai htung lai hte maren, shawng du ai gawk naw grin nga dingsa gaw chyoi pra htum ai shara de shang na lam mung garai n hpaw na re ai lam dai Chyoi Pra ai Wenyi gaw asan sha sharin ya nga ai.

⁹Ndai lam gaw ndai prat a lam madi madun ai ga shadawn langai mi rai nga ai. De a lachyum gaw Karai Kasang kaw sak nawng ai kumhpaw kumhpa ni hte dusat hkungga ni gaw nawku daw jau ai wa a myit masin hpe hkum tsup shangun lu ai n rai.

¹⁰Dai lam ni gaw shahpa luhpa hte jasan jaseng ai htung lai amyu myu hte seng nna galaw ai lam ni sha rai nga ai. Dai ni gaw, Karai Kasang e ningnan bai gram lajang na ra ai aprat garai n du ai laman gan tawn da ai ntsa lam hte seng ai hkan sa tara ni rai nga ma ai.

¹¹Rai ti mung Hkristu gaw ya anhte hkam sha lu nga sai ngamu ngamai lam a Hkinjawng Agyi Kaba hku nna du sa nga sai. Shi daw jau amu galaw ai sum gaw lata hte n galaw da ai rai nna, ndai hpan tawn da ai mungkan ga hte n seng ai grau kaba nna hkum tsup re ai nawku sum rai nga ai.

¹²Hkristu gaw Chyoi Pra Htum ai Shara kata de kalang mi hte ngut hkra shang ai shaloi, hkungga nawng na matu bainam sai, usu sai n la shang ai sha, shi nan a asai hte shang nna anhte a matu htani htana hkye hkrang la ai lam lu la nu ai.

¹³Bainam sai, usu sai, wan nat kau sai nga upra a wan wu ni hpe nawku daw jau ai htung tara hku sawn yang awu asin rai mat ai masha ni a ntsa e lapri bun yang, shanhte a awu asin re ai hpe shachyoi shapra ya lu ai teng yang gaw,

¹⁴Hkristu a sai gaw dai hta grau nna shachyoi shapra ya lu ai n rai ni? Hkristu gaw dai htani htana Wenyi hte tinang a hkum hpe ra n rawng ai hkungga hku nna Karai Kasang kaw nawng ya kau sai. Hkrung nga ai Karai Kasang hpe anhte nawku daw jau lu hkra Hkristu a asai gaw anhte a myit masin hpe akyu n rawng ai nawku htung lai chyasi ni hta hkan nang ai kaw na shachyoi shapra la na ra ai.

¹⁵Ndai lam a majaw Karai Kasang e shaga la hkrum ai ni gaw Karai Kasang ga sadi jaw da sai htani htana shaman chyeju sali wunli hkam la lu mu ga nga, Hkristu gaw ga shaka ningnan hpe lajang ya sai. Shing rai hkam la na ahkaw ahkang lu la ai lam gaw, shawng na ga shaka kata e nga ai shaloi shut hpyit tawt lai kau ai yubak mara ni kaw na shalawt dat na matu si hkam ai lam langai mi byin pru wa sai majaw rai nga ai.

¹⁶Sali wunli hte seng ai ga ndat hpe shabyin na matu gaw, ga madat da ai wa kaja wa si sai lam sakse madun lu ra nga ai.

¹⁷Hpa majaw nga yang, ga madat tsun da ai wa naw hkrung nga yang gaw ga madat garai n tai mai nga ai. Ga madat tsun da ai wa si jang she grin lu nga ai.

¹⁸Dai rai nna shawng na ga shaka pyi gaw sai lang nna she shagrin da nga ai.

¹⁹Shawng nnan e Mawshe gaw shi a jep ai Tara hta rawng ai hkang da ai lam yawng mayawng hte hpe amyu masha ni hpe tsun dan ngut jang, hkyeng ai sagu mun hte husup lakung, hpe la nna usu sai, bainam sai ni hte ntsin kayau la nna Tara laika a ntsa e mung, masha ni yawng hpe mung, lapri bun wu ai.

²⁰Dai hpang shi gaw, “Ndai gaw nanhte madat mara hkan sa na matu tawn da ai ga shaka hpe dazik dawk shagrin da ai asai rai nga ai,” nga nna tsun ai.

²¹Dai hte maren Mawshe gaw nawku ai sum a ntsa e mung, nawku daw jau ai hta lang ai arai ni yawng a ntsa e mung, dai asai hte lapri bun wu ai.

²²Jep ai Tara hte maren nga yang, arai yawng ganoi mahkra hpe asai hte jasan jaseng kau lu nga ai rai nna, asai ru hkaw yang sha yubak mara ni hpe raw dat kau ya nga ai.

²³Sumsing lamu e mi kaw nna nga nga ai arai ni a kanan ni rai nga ai lahta de tsun lai wa sai rai ni hpe shing re ai lam hku nna jasan jaseng kau lu nga ai. Rai ti mung sumsing lamu na arai ni nan hpe chyawm gaw grau nna kaja ai hkungga ni hte jasan jaseng kau ra nga ai.

²⁴Hpa majaw nga yang, Hkristu gaw kaja wa chyoi pra ai shara majing a kanan rai nga ai masha lata hte galaw ai Chyoi Pra ai Shara de n shang ai sha, sumsing lamu de nan shang nna, ya anhte a malai Karai Kasang a man de dan pru nga sai.

²⁵Yuda hkinjawng agyi wa gaw dusat sai lang nna shaning shagu dai Chyoi Pra Htum ai Gawk de shang shang rai nga ai. Rai ti mung Hkristu chyawm gaw tinang hkum hpe law law lang nawng ya ai n rai.

²⁶Shing rai nawng ya ra ai rai yang gaw, ginding aga nnan lat kaw nna law law lang si hkam hkam rai na nu ai; ya chyawm gaw, mungkan ga prat htum na ni wa ai ten hta kalang mi hte ngut hkra du sa nna shi hkum dai nawng ya kau ai hte yubak mara hpe yeng seng kau nu ai.

²⁷Shinggyim masha shagu gaw kalang mi sha si ra na rai nna, dai hpang Karai Kasang a daw dan ai hkrum na ra ai.

²⁸Dai hte maren Hkristu mung masha law law a yubak mara hpe kalang mi hte ngut hkra gun kau ya na matu shi a hkum hpe hkungga shatai nna nawng kau nu ai. Yubak gun kau ya ai lam hte n seng ai sha shi hpe ala nga ai ni hpe hkye hkrang la na matu lahkawng lang ngu na bai dan pru na ra ai.