Read Jinghpaw Common Language Bible 2009 YAKU 1 Bible Online

YAKU 1 - Jinghpaw Common Language Bible 2009 bible

YAKU 1

¹Karai Kasang hte Madu Yesu Hkristu a shangun ma rai nga ai Yaku kaw nna mungkan ting de chyam bra nga ai Karai Kasang a masha ni hpang de shakram dat ai.

²Nye a hpu nau ni e, nanhte agung alau amyu myu hte hkrum kadup myit dai shaloi e nanhte a matu kabu gara shara rai nga ai ngu nna hkam la mu.

³Hpa majaw nga yang, nanhte a kam sham ai myit hte shing re ai agung alau ni hpe dang kau lu myit dai shaloi e, tinang hta hkam jan lu ai n-gun grau nna jat wa ai hpe nanhte chye nga myit dai.

⁴Nanhte gaw hpa lam hta mung ra rawng ai lam n nga nna hpring tsup nga myit ga, nanhte a hkam sharang ai myit hpe jahtum du hkra ngang grin nga shangun u.

⁵Rai ti mung, nanhte hta na langai ngai hpaji ra kadawn nga a yang gaw, shi Karai Kasang kaw akyu hpyi nga u ga, Karai Kasang gaw shi hpe dai lam jaw ya na ru ai; hpa majaw nga yang, shi gaw yawng mayawng hpe n daw n hta chyeju hku nna jaw ya ai wa rai nga ai.

⁶Rai ti mung nanhte akyu hpyi ai shaloi kam shut ai myit hte n re ai sha, kam sham ai myit hte hpyi nem lu na rai myit dai. Kam shut ai wa kadai mung nbung e ahtu nna kanawng hkawm ai panglai na hka leng hte bung nga ai.

⁷Dai zawn re ai masha gaw shi galaw ai lam yawng mayawng hta shi a myit hpe n daw dan lu ai rai nna myit matu n ding ai wa rai nga ai.

⁸Shing re ai wa gaw agyoi ai wa rai nga ai majaw dai Madu kaw na lama ma lu la na zawn hkum nawn nga u ga.

⁹Matsan nga ai Hkristan hpu nau wa gaw, Karai Kasang e shi hpe shagrau dat hkrum ai shaloi kabu nga u ga.

¹⁰Lu su ai Hkristan hpu nau wa gaw, Karai Kasang e shi hpe shagrit kau hkrum ai shaloi mung kabu gara nga ra ai. Hpa majaw nga yang lu su ai ni gaw nam na nampu nampan zawn wai mat na mara ai.

¹¹Ajan gaw shi a kang kahtet ai hte rawt wa nna nampan hpun hkru hkraw mat ai. Nampan pu mung run hkrat mat ai hte de a tsawm htap ai gaw hten mat wa ai. Dai hte maren lu su ai wa gaw shi a magam bungli shachyen nga yang hten byak nna wai mat na ra ai.

¹²Agung alau ai lam ni hkrum yang ngang ngang kang kang sadi dung nga ai wa gaw a lu ai; hpa majaw nga yang dai wa gaw dai zawn re ai chyam dinglik ai lam hpe lai di awng dang kau lu ai shaloi Karai Kasang gaw shi hpe tsaw ra ai ni hpe jaw na nga nna ndat da sai asak hpe shi a shagrau kumhpa hku nna hkam la lu na ru ai.

¹³Masha langai mi dai zawn re ai agung alau ni hkrum wa yang, “Karai Kasang ngai hpe gunglau nga ai,” ngu nna tsun lu na n rai. Hpa majaw nga yang, dai n hkru n kaja ai gaw Karai Kasang hpe gunglau lu ai n rai; hpa majaw nga yang shi hkum nan kadai hpe mung gung lau jahkrum nga ai n rai.

¹⁴Rai ti mung masha langai mi agung alau hkrum ai ngu ai gaw, tinang a n hkru n shawp ai myit kayut ai lam e woi mat wa nna rim la kau hkrum ai hpe ngu ai rai nga ai.

¹⁵Shi a myit kayut ai gaw na-um na sin rai wa jang yubak mara hpe shangai dat wu ai; dai yubak mara kaba wa jang si ai hpe shangai dat wu ai.

¹⁶Tsaw ra ai hpu nau ni e, hkalem hkalau ai ni a majaw lam hkum dam myit!

¹⁷Mai kaja ai hte hkum tsup re ai chyeju kumhpaw kumhpa nlang hte gaw, sumsing nhtoi hkum ni hpan da ai hte ningsin hpe gale galau di nna n kayin shangun ai sumsing lamu e nga ai Karai Kasang kaw na yu wa sai rai nga ai.

¹⁸Shi hpan tawn da ai amyu ni yawng hta e anhte nambat langai shara lu ai alat amyu tai u ga, shi a myit ra ai hku hte maren dai teng man ai mungga hte shi anhte hpe shaprat dat mi ai.

¹⁹Nye a tsaw ra ai hpu nau ni e, ndai lam matsing tawn da nga mu! Nanhte langai hte langai gaw na la na mahtang lawan nna tsun shaga na hte masin pawt na lam hta hkum tin nga mu.

²⁰Masha a masin pawt ai gaw Karai Kasang ra sharawng ai ding hpring ai lam hpe anhte hta byin shangun lu ai n rai.

²¹Dai re ai majaw matsat shabat re ai sat lawat shagu hte n hkru n kaja ai arawn alai yawng hte hpe yeng seng kau mu. Karai Kasang kaw sumnung ai hte shawng kaw nna nanhte a kraw lawang ni hta e shi hkai da ya sai nanhte hpe hkye hkrang la lu ai mungga hpe hkap la mu.

²²Shi a mungga hpe na yu ai hku nna sha tinang a hkum hpe n hkalem kau myit ga; dai mungga hpe hkan galaw ai ni nan atai nga mu.

²³Dai mungga hpe na la nna n hkan galaw ai wa kadai mung, tinang hkum nan a myiman hpe jamna hta yu yu ai wa hte bung nga ai.

²⁴Shi gaw shi hkum nan hpe atsawm sha yu la nhtawm pru hkawm mat wa ai hte rau shi a gawng shingyan hpa hte bung ai hpe malap kau ai wa hte bung nga ai.

²⁵Rai ti mung masha ni hpe shalawt la ai hkum tsup re ai tara hta azi yu ai wa gaw dai tara hpe na la nna bai malap kau ai wa n re ai sha, matut nna hkan galaw ai wa rai nga ai majaw, shi galaw ai hpe Karai Kasang shaman ya ai hkam la na ru ai.

²⁶Ngai gaw nawku htung shadik ai wa rai nngai nga nna marai langai ngai myit nawn dam ti mung, shi a shinglet hpe n hkang lu yang gaw, shi a nawku htung gaw kaman lila sha rai nna shi a hkum hpe hkalem kau da wu ai.

²⁷Kawa Karai Kasang a man e san seng ai hte jet ai nawku htung ngu ai gaw, ruyak kyindut hkrum nga ai jahkrai nmai ni hte gaida ni hpe lanu lahku gawn lajang nna tinang hkum hpe mung, mungkan ga a awu asin re ai hpe mung, koi kau ai lam rai nga ai.