Read Jinghpaw Common Language Bible 2009 YAKU 2 Bible Online

YAKU 2 - Jinghpaw Common Language Bible 2009 bible

YAKU 2

¹Nye a hpu nau ni e, nanhte gaw hpung shingkang rawng ai Madu anhte a Madu Yesu Hkristu hpe kam sham ai ni re ai hte maren, masha ni hpe shinggan lam hku mu mada da ai hta hkan nna langai hte langai hpe shai ai hku galoi mung hkum kanawn mazum nga myit.

²Ga shadawn, lu su ai masha langai mi gaw ja lachyawp chyawp nna reng ai hpun palawng bu hpun ai wa langai mi hte matsan ai masha langai mi ashep ashin re ai hpun palawng bu hpun nna nanhte a hpawng de sa wa ai ngu ga,

³Nanhte gaw dai reng ai hpun palawng bu hpun ai wa hpe grau hkungga nna, “Ndai kaja dik ai shara kaw dung u,” ngu nhtawm, matsan ai wa hpe gaw, “Wo nang e tsap u, shing n rai nang e nye a lagaw nhpang dun ntsa dung u,” nga ai rai yang,

⁴nanhte a kata e lachyen lahka re ai lam ni hpe shabyin nna, n hkru n kaja ai maw mawn ai myit hte daw dan ai ni tai ai majaw, mara lu myit dai.

⁵Nye a tsaw ra ai hpu nau ni e, madat mu! makam masham hta lu su ai ni tai lu na hte shi hpe tsaw ra ai ni hpe jaw na nga nna ndat da sai sumsing lamu a sali wunli hkam la na matu Madu gaw ndai mungkan hta matsan mayan re ai ni hpe lata la mu ai.

⁶Nanhte mahtang matsan mayan wa hpe n gawn n sawn di kau manit hka! Nanhte hpe zingri zingrat di nna tara agyi ni a man de dun ahkyit wa ai ni gaw kadai ni rai ma ta? Dai ni gaw lu su ai ni rai ma ai!

⁷Shanhte gaw nanhte hpe jaw da sai mying kaja hpe jahpoi jahpyak ya ai ni rai ma ai.

⁸Nanhte gaw, “Na a htingbu wa hpe na a hkum hte maren tsaw ra u,” nga nna chyum laika hta rawng ai sumsing lamu Mungdan a tara hpe madat mara myit yang gaw, nanhte mai kaja jaw ang ai hpe galaw nga myit dai.

⁹Rai ti mung nanhte gaw masha ni hpe shanhte a shinggan lam hku mu lu ai hta hkan nna hkap la kanawn mazum myit yang gaw, nanhte mara lu myit dai rai nna Tara tawt lai ai masha langai mi hku nna dai tara gaw nanhte hpe jeyang daw dan hkrum na myit dai.

¹⁰Jep ai tara langai mi hpe tawt lai ai wa kadai rai ti mung jep ai tara yawng hpe tawt lai nu ai.

¹¹Hpa majaw nga yang, “Masha num hkum shaw,” nga nna hkang da ai wa nan, “Masha hkum sat,” nga nna tsun nga ai. Nang gaw masha num hpe n shaw hkra rai ti mung, masha hpe sat n yang gaw jep ai tara tawt lai ai wa nang rai nga ndai.

¹²Dai re ai majaw nanhte gaw shalawt dat ai tara hte maren tara daw dan hkrum na ni zawn tsun shaga hkan sa galaw nga mu.

¹³Hpa majaw nga yang matsan dum ai lama myit n rawng ai masha hpe daw dan ai shaloi Karai Kasang gaw matsan dum lama ai lam madun na ru ai n rai; rai ti mung matsan dum lama ai lam gaw tara daw dan ai hpe awng dang kau wu ai.

¹⁴Nye a hpu nau ni e, masha langai ngai gaw, ngai hta makam masham rawng nga ai nga nna tsun nga ti mung shi a magam bungli galaw ai lam hta sakse n madun a yang gaw hpa akyu nga a ta? Dai makam masham gaw nang hpe hkye la lu a ni?

¹⁵Ga shadawn, bu hpun palawng ra kadawn ai hte lu na sha na shahpa dum hprut nga ai hpu nau ni, shing n rai kajan kana ni nga ai ngu gaw,

¹⁶nanhte gaw shanhte hpe, “Nanhte hpe Karai Kasang shaman ya u ga! Hkru hkru sha mu, lum lum nga mu!,” nga nhtawm me asak a matu ra ahkyak ai gaw n jaw myit yang gaw, hpa akyu nga na rai ta?

¹⁷Makam masham hta mung dai hte maren rai nga ai. Magam bungli n lawm ai makam masham gaw kaman chyasi rai nga ai.

¹⁸Rai ti mung, “Marai langai mi hta makam masham rawng nna kaga langai mi hta magam bungli galaw ai lam ni nga nga ai,” nga nna marai langai ngai tsun dara a yang gaw, “Magam bungli n lawm ai makam masham ngai hpe madun dan rit; ngai chyawm gaw nye a makam masham hpe nye a magam bungli ni hte nang hpe madun na de ai.”

¹⁹Karai Kasang langai sha nga ai hpe nang kam n ni? Rai sa, mai kaja nga ai! Nat ni mung kam sham nga nna hkrit gari nga ma ai.

²⁰Angawk ai wa e, magam bungli n lawm ai makam masham gaw kaman lila rai nga ai hpe nang chye mayu da wu ni?

²¹Anhte a ji wa Abraham gaw Karai Kasang a man e ding hpring sharawng awng ai lam hpe gara hku lu la wu ta? Shi gaw shi a kasha Isak hpe tawn hkungri ntsa e sak nawng ai ngu ai magam bungli hta lu la wu ai.

²²Shi a makam masham hte magam bungli rau sha ginrun nna rau galaw nga ai hpe nang n mu n chye n ni? Shi a makam masham gaw shi a magam bungli a marang e hkum tsup wa lu sai.

²³“Abraham gaw Karai Kasang hpe kam sham wu ai rai nna shi a makam masham a majaw shi hpe ding hpring ai wa ngu nna hkap la wu ai,” nga nna Chyum Laika hta tsun ai ga gaw dik tup wa sai. Dai rai nna Abraham gaw Karai Kasang a jinghku wa ngu ai hpe hkam la wu ai.

²⁴Dai rai nna masha gaw shi a makam masham a majaw sha n rai, shi a magam bungli hte Karai Kasang a man e ding hpring sharawng awng ai wa tai wa lu nga ai hpe nanhte mu chye nga myit dai.

²⁵Shawa num Rahab a lam mung dai hte maren rai nga ai. Shi gaw Israela kin-yu ni hpe hkap hkalum la nna kaga lam hku lawt pru mat wa na matu karum la ai magam bungli a majaw Karai Kasang a man e ding hpring sharawng awng ai hpe hkam la lu nu ai.

²⁶Dai re ai majaw, hkum hkrang hta wenyi asak n rawng yang gaw chyasi rai nga ai hte maren, magam bungli n lawm ai makam masham mung chyasi rai nga ai.