Read Jinghpaw Common Language Bible 2009 YAKU 3 Bible Online

YAKU 3 - Jinghpaw Common Language Bible 2009 bible

YAKU 3

¹Nye a hpu nau ni e, anhte sara ni gaw kaga masha ni hta grau nna ja ai tara hte daw dan ai hkrum na raga ai hpe dum let, nanhte marai law law wa sara hkum tai mayu nga mu.

²Anhte nga manga hte gaw ya sha ya sha shut chye ga ai. Rai ti mung masha langai mi gaw, shi tsun shaga ai hta galoi mung n shut ai rai yang gaw, dai wa gaw hkum tsup ai wa rai nna shi a hkum hkrang ting hpe hkang lu ai wa rai nga ai.

³Anhte gaw gumra hpe anhte a ga madat mara shangun na matu, gumra a n-gup hta gumhtung bang ya ga ai shaloi anhte ra ai de sa shangun lu ga ai.

⁴Shing n rai sanghpaw li langai mi a lam myit yu ga; grai kaba ai sanghpaw li hpe n gun ja ai nbung laru kaba e ahpawt gumpye ai hkrum wa ti mung, grai kaji ai li hkang hte hkang lu ai rai nna li hkang ai wa sa mayu ai de sa wa ai.

⁵Shinglet mung dai hte maren rai nga ai. Dai gaw hkum hkrang a daw shan hta kaji sha rai nga ti mung shakawng gumrawng ai lam hta kaba nga lu ai. Kachyi sha re ai wan numli gaw ning san ai nam maling kaba hpe hkru kau lu ai hpe she myit yu mu.

⁶Dai shinglet mung wan hte bung nga ai. Shinglet gaw anhte a hkum hkrang daw shan hta na n hkru n shawp ai mungkan rai nna hkum hkrang ting hta dai n hkru ai hpe chyam bra wa shangun nga ai. Shinglet gaw ngarai wan hte nan anhte a asak hkrung lam ting hpe shachyi dat nga ai.

⁷Shinggyim masha gaw kaga dusat, uni uzai hte u amyu myu, gumrawt hkawm ai baw hte hka na nga ni hpe masha a lata hte hku shani la lu ma ai rai nna, dai gaw ni mat nga ma ai.

⁸Rai ti mung shinglet hpe gaw kadai wa mung hku shani la lu ai lam n nga ga ai. Dai gaw n hkru n kaja nga ai hte up hkang da n lu nna si shangun ai baw gung tuk hte hpring chyat nga ai.

⁹Anhte gaw dai shinglet hpe anhte a Madu hte Wa hpe chyeju dum shakawn shagrau ai hta mung, Karai Kasang a hkrang bung sumla hte maren hpan da sai shinggyim masha shada da matsa mawa dagam dala ngu nna tsun ai hta mung jai lang nga ga ai.

¹⁰Dai n-gup langai mi kaw nna sha chyeju shakawn shaman ai ga ni hte matsa mawa dagam ga ni pru wa ai. Nye a hpu nau ni e, dai gaw nanhte hta n byin ang ai!

¹¹Npun hpaw ai hka hpawk langai mi hta na sha, mu ai ntsin hte hka ai ntsin shapraw dat lu ai n rai.

¹²Nye a hpu nau ni e, maihpang hpun hta tsanlun si, sabyi ru hta maihpang si n si lu nga ai; dai hte maren jum shum ai hka hpawk kaw nna mu ai ntsin hpe n shapraw lu nga ai.

¹³Nanhte hta hpaji byeng-ya hte chye chyang ai masha langai ngai nga a ni? Dai wa gaw shi hpaji byeng-ya rawng ai lam hpe shi a mai kaja ai asak hkrung lam hte mung, shagrit shanem nna hpaji byeng-ya rawng nga ai hku mai kaja ai magam bungli galaw ai hte mung sakse madun u ga.

¹⁴Rai ti mung nanhte a myit hta e, manawn masham ai myit, myit machyi ai, tinang akyu tam ai myit rawng ai rai yang nanhte a hpaji byeng-ya rawng dum nna grang gumrawng ai hte dai teng man ai lam hpe shut kau ai mara hkum galaw myit.

¹⁵Shing re ai hpaji byeng-ya chyawm gaw sumsing lamu de nna yu wa ai hpaji byeng-ya n rai; dai gaw dinghta mungkan hte wenyi lam n re ai asai ashan hte nat matse hte sha seng nga ai.

¹⁶Manawn masham ai myit, tinang a akyu tam ai myit nga ai shara kaw kashuk kashak n ru n ra re ai lam hte n hkru n kaja ai lam amyu myu hpe mung byin pru shangun nga ai.

¹⁷Rai ti mung ntsa de na du sa ai hpaji byeng-ya chyawm gaw shawng npawt e san seng ai, dai hpang ngwi pyaw sim sa ai, sumnung shingdi ai hte hku hkau ai lam hpe byin shangun nga ai hta n ga, tsaw ra matsan dum myit hte hpring nna kaja ai magam bungli ni ngu ai apu asi ni hpe shabyin shapraw nga ai. Dai gaw myi man lata ai lam hte hpyi hpun ai lam hta n lawm nga ai.

¹⁸Dai mai kaja ai lam gaw sim sa ai lam galaw ai ni sim sa ai hta gat hkai nna shabyin shapraw dat ai apu asi rai nga ai.