Read Jinghpaw Common Language Bible 2009 YAKU 5 Bible Online

YAKU 5 - Jinghpaw Common Language Bible 2009 bible

YAKU 5

¹Lu su ai ni e, ya e ngai tsun ai hpe madat yu mu! Nanhte gaw du magang ra ai nni nkri nji nmu lam a majaw hkrap ngu hkrap ngoi rai nga mu!

²Nanhte a ngamu ngamai ai sut gan ni gaw yat tsam mat nna nanhte a hpun nba hpe manut ni e sha kau manu ai.

³Nanhte a ja hte gumhpraw ni hta nhkan jung mat nga ai rai nna dai nhkan gaw nanhte nhtan shai ai maga na sakse tai na ra ai rai nna nanhte a hkum shan hpe wan zawn sha kau na ru ai. Nanhte gaw ndai hpang jahtum na nhtoi ni hta e sut gan mahkawng sumpum da manu ai.

⁴Nanhte gaw nanhte a yi sun hkauna ni hta amu bungli galaw ai masha ni hpe hpa shabrai mung n jaw myit dai. Shanhte aput angun ai nsen ni hpe madat yu mu! Nanhte a nsi naisi ni hpe dan shinggyin ya ai ni a marawn jahtau ai nsen gaw daru magam rawng ai Madu Karai Kasang a na hta hkrang shang wa sai.

⁵Ndai ga ntsa e nanhte a asak hkrung lam gaw hkum hkrang myit masin hpe shangwi shapyaw ya ai arung arai kaja ni hte pyaw daw lam hkrai hpring chyat rai nga malit dai. Nanhte gaw sat kau hkrum na nhtoi a matu nanhte a hkum ni hpe hpum sau hkra kawn da nga myit dai.

⁶Nanhte gaw mara n kap ai masha ni hpe daw dan nna sat kau manu ai; shanhte gaw nanhte hpe ninghkap nga ai n rai.

⁷Dai re ai majaw hpu nau ni e, dai Madu du sa ai du hkra hkam sharang nga mu. Yi sun hkauna galaw sha ai wa langai mi gaw shi a lamu ga kaw na hpu ging ai nsi naisi ni shapraw ya na ra ai hpe gara hku ala nga ai hpe yu yu mu! Shi gaw myit galu ai hte marang nhpaw hte marang shadoi htu ai ten du hkra ala nga ai.

⁸Nanhte mung dai zawn myit galu let hkam sharang nga mu. Nanhte a myit mada ai lam hpe shangang shakang mu; hpa majaw nga yang Madu bai du sa na nhtoi gaw ni wa magang ra ai.

⁹Nye a hpu nau ni e nanhte Karai Kasang e daw dan ai n hkrum myit ga, nanhte shada da mara shagun aput angun hkum galaw myit, Tara agyi wa gaw du magang ra ai rai nna dan pru na jin jin rai nga sai.

¹⁰Nye a hpu nau ni e, Madu a mying ningsang hte htawn tsun ai myihtoi ni a lam hpe myit dum sum ru yu mu; nni nkri hkrum ai shaloi myit galu ai hte hkam sharang ai hpe kasi ningli la mu.

¹¹Shanhte gaw hkam sharang lu ai ni rai ma ai majaw anhte gaw shanhte hpe a lu ai ni ngu gaw ai. Yoba a myit galu ai lam hpe nanhte na yu manit dai. Hpang jahtum Madu gaw shi hpe gara hku karum madi shadaw jaw ya sai lam nanhte chye nga myit dai. Hpa majaw nga yang dai Madu gaw tsaw ra matsan dum nna n gaw n wai myit hte hpring tsup ai wa rai nga ai.

¹²Dai hta n ga nye a hpu nau ni e, nanhte ga sadi tawn ai shaloi dagam dala ga hkum lang myit. Sumsing lamu shing n rai ginding aga shing n rai hpa hpe rai ti mung gang nna hkum dagam myit. Nanhte tsun ai ga gaw “Re ai,” rai yang re ai; “N re ai,” rai yang n re ai ngu nna sha tsun mu, shaloi nanhte gaw Karai Kasang a daw dan ai kaw na lawt lu na myit dai.

¹³Nanhte hta na langai ngai ruyak jam jau hkrum nga myit ni? Shi akyu hpyi nga u ga. Langai ngai myit pyaw nga a ni? Shi mahkawn shakawn nga u ga.

¹⁴Nanhte hta na langai ngai machyi makaw hkrum nga myit ni? Shi gaw hpung salang ni hpe shaga la nhtawm, shanhte gaw dai Madu a mying ningsang hte dai wa hpe tsanlun sau chya ya nna shi a matu akyu hpyi ya mu ga.

¹⁵Kam sham ai myit hte akyu hpyi ai ga gaw dai machyi ai wa hpe shamai shatsai lu nna dai Madu gaw shi hpe bai hkam kaja wa shangun na ru ai hte shi galaw hkrup kau ai yubak mara ni hpe mung raw dat kau ya na ra ai.

¹⁶Nanhte shamai shatsai ai hkrum myit ga, nanhte a yubak mara ni hpe shada da shapraw dan nna, shada da a matu mara akyu hpyi ya nga mu. Ding hpring ai wa a akyu hpyi ai ga gaw shabyin lu ai atsam law law rawng nga ai.

¹⁷Elia gaw anhte hte maren shinggyim masha hpan langai mi sha rai nga ai. Marang n htu u ga, shi aja awa akyu hpyi dat wu yang masum ning e shata kru tup ga ntsa e marang n htu ai nga mat ai.

¹⁸Bai kalang mi shi akyu hpyi dat wu yang sumsing lamu hpaw wa let de a marang htu jahkrat dat ya nna ginding aga gaw nsi naisi ni hpe shapraw ya wu ai.

¹⁹Nye a hpu nau ni e, nanhte hta na marai langai ngai dai teng man ai lam kaw na dam mat wa ai wa hpe marai langai ngai bai woi nhtang wa ai ngu ga.

²⁰Kadai rai ti mung yubak lu ai wa langai mi hpe shi a shut hpyit ai hta na shabai dat ai wa gaw yubak lu ai wa a wenyi hpe si ai kaw na hkye hkrang la nna shi hpe yubak mara ni law law kaw na raw dat hkrum na matu galaw ya ai wa rai nga ai hpe dum chye nga mu law.