Read Jinghpaw Common Language Bible 2009 1 PETRU 3 Bible Online

1 PETRU 3 - Jinghpaw Common Language Bible 2009 bible

1 PETRU 3

¹Dai hte maren madu jan ni e, tinang a madu wa hkang ai hku hkan nga mu; ndai lai hku nna nanhte hta Karai Kasang a mungga hpe garai n kam n sham ai madu wa ni lawm ai rai yang gaw, nanhte a arawn alai hpe mu nna ga hkaw mi n tsun ra ai sha kam sham ai masha shatai la lu na myit dai.

²Hpa majaw nga yang, shanhte gaw, nanhte a arawn alai kade chyoi pra ai hte sari rawng malit dai hpe mu ya na mara ai.

³Nanhte a hkum mawn sumli shatsawm jahtap na matu shinggan maka kumla rai nga ai kara lajang ai, ja gumhpraw arai sumraw ai, bu hpun palawng shareng ai hku n rai.

⁴Shing rai na malai, nanhte a tsawm htap ai ngu ai hta dai teng man ai myi hte n mu lu ai kata asak hkrung lam si mani nna galoi mung amu asim sha re ai myit ngu ai asak kaji kaba hte n seng ai tsawm htap ai lam rawng ra nga ai. Dai tsawm htap ai lam gaw Karai Kasang a man e hpu ging dik ai lam rai nga ai.

⁵Hpa majaw nga yang, moi shawng de na Karai Kasang hpe myit mada nga ai nawku makam masham kaba ai num ni mung shanhte a madu wa ni a hkang ai hte maren hkan sa ai hku nna shanhte a hkum hpe shatsawm jahtap ma ai.

⁶Sara mung dai hte maren galaw wu ai; shi gaw Abraham hpe madat mara nga let Abraham hpe shi a madu ngu nna gang shaga wu ai. Nanhte gaw hpa hpe mung n hkrit n kang ai sha mai kaja ai amu galaw nga myit yang gaw nanhte gaw ya Sara a shayi sha ni rai nga manit dai.

⁷Dai hte maren madu wa ni e, madu jan ni gaw n-gun kya ai amyu ni re ai ngu ai hpe atsawm sha chye na let nanhte a madu jan ni hte kanawn mazum nga mu. Shanhte hpe hkungga lara di mu, hpa majaw nga yang shanhte mung nanhte hte maren Karai Kasang kaw na asak a sali wunli kumhpa hpe hkam la na ni rai ma ai. Ndai lam galaw mu, shaloi she nanhte a akyu hpyi ai ga ni hpe hpa e mung dingbai dingna n shabyin na re.

⁸Hpungdim hku nna tsun mayu ai gaw, nanhte yawng hte hta maren mara re ai myit masa hte myit hta hkam sha ai lam rawng nga lu na rai nna; shada da shinggyim nau na zawn tsaw ra ai hte shada da matsan dum nna shagrit shanem hkat nga mu.

⁹N hkru n kaja ai hpe n hkru n kaja ai hte, matsa mawa dagam dala ga hpe matsa mawa dagam dala ga hte, bai hkum tai htang nga myit; shing rai na malai; shaman ya ai ga htang jaw mu; hpa majaw nga yang, dai shaman ga gaw shi nanhte hpe shaga la ai shaloi nanhte hpe jaw na matu ga sadi jaw da sai rai nga ai.

¹⁰Chyum Laika hta, “Tinang a asak hkrung lam hta kabu gara ai lam hkam sha let ngamu ngamai ai prat ladaw ni hpe ra sharawng mu mayu ai ni kadai mung, n hkru n kaja ai lam tsun shaga ai ga hpe koi kau nna masu ai ga tsun ai lam jahkring kau ra ai.

¹¹Shi gaw n hkru n kaja ai kaw na kayin mat wa nna mai kaja ai amu galaw let; shi a myit masin yawng hte dai ngwi pyaw sim sa ai lam a matu shakut shaja lu na rai nga ai.

¹²Hpa majaw nga yang, ding hpring ai ni ntsa e dai Madu yu mada nga ai rai nna, shanhte a akyu hpyi ai ga ni hpe shi madat ya nga ai. Rai ti mung n hkru ai amu galaw ai ni hpe chyawm gaw shi n madat ya nga ai.”

¹³Nanhte kaja ai lam galaw na matu sharawng awng nga myit yang gaw nanhte hpe kadai sharu shatsang lu na rai ta?

¹⁴Rai ti mung lama rai nna teng man ai lam hpe hkan sa galaw nga ninglen nanhte nni nkri hkrum myit yang gaw, kabu lu nga na rai myit dai. Kadai wa hpe mung hkum hkrit nga myit; myit mung hkum ru myit.

¹⁵Nanhte a myit masin ni hta Hkristu hpe hkungga lara ai hte Madu ra ai hku shagrau sha-a nga mu; nanhte hta hkam la da sai myit mada ai lam hpe masha langai ngai san dam ma yang, ga lachyum htai dan lu na matu jin jin rai nga mu.

¹⁶Rai ti mung dai hpe sumnung shingdi nna hkungga lara ai hte galaw nga mu, Nanhte hpe n kaw n law nga nna roi asawng ai ni gaw nanhte Hkristu a hpang hkan nang ai ni hku nna hkan sa nga ai mai kaja ai arawn alai hpe mu nna shanhte tsun kau ai lam hte seng nna kaya kahpa hkrum mat mu ga, nanhte a myit masin asan sha re ai hku asak hkrung nga mu.

¹⁷Hpa majaw nga yang, Karai Kasang a myit ra ai lam she rai yang gaw, mai kaja ai amu galaw ai a majaw nni nkri hkrum ai gaw n hkru n kaja ai lam galaw nna nni nkri hkrum ai hta grau kaja nga ai.

¹⁸Hpa majaw nga yang, Hkristu gaw anhte a yubak mara ni a majaw kalang mi hte yawng a matu ngut hkra si hkam sai. Shi gaw kaja ai masha langai mi rai nga da nna yubak lu ai ni a malai si hkam nu ai. Shing rai galaw ai lam gaw nanhte hpe Karai Kasang hpang de woi wa na matu rai nga ai. Shi gaw hkum shan hku nna sat kau ai hkrum timung, wenyi hta Karai Kasang jahkrung la sai.

¹⁹Shi gaw shi a wenyi hkum hta rai nga yang htawng rawng nga ai wenyi ni hpang de sa nna hkaw dan mu ai.

²⁰Dai wenyi ni gaw shawng de Noa sanghpaw li shachyaw ai nhtoi ni hta Karai Kasang gaw myit galu kaba hte ala nga yang shi hpe n madat n mara ai ni a wenyi ni rai ma ai. Dai sanghpaw li hta masha n law la ai-yawng rai yang she marai matsat sha hka hta na hkye la ai hkrum ma ai.

²¹Dai hka hta na zawn, dai hka lup ngu ai kumla gaw ya e nanhte hpe hkye hkrang la lu nga ai. Dai gaw hkum shan hta e kap ai matsat shabat hpe sharun kau na lam n rai; myit masin asan sha hte Karai Kasang a man e ga sadi tawn da ai lam rai nga ai. Si ai kaw na Yesu Hkristu bai hkrung rawt wa ai a marang e nanhte gaw hka lup hkam la ai hte hkye hkrang la ai hkrum manit dai.

²²Yesu Hkristu gaw sumsing lamu de lung mat wa nhtawm, Karai Kasang a hkra maga de anga nga ai rai nna lamu kasa ni yawng hte sumsing lamu na ahkang aya lu ai ni hte, hpung dagu rawng ai ni yawng hpe up hkang nga ai.