Read Jinghpaw Common Language Bible 2009 1 PETRU 5 Bible Online

1 PETRU 5 - Jinghpaw Common Language Bible 2009 bible

1 PETRU 5

¹Hpung hpe yu gawn lajang nga ai ngai hpung salang wa langai mi zawn, hpung salang ni hta lawm nga ai nanhte hpe hpyi lajin dat nngai. Ngai gaw Hkristu hkam ai nni nkri ni hpe mu ai sakse langai mi hku nna mung, dan pru na ra ai hpung shingkang hpe nanhte hte rau hkam la na myit mada nga ai wa hku nna mung, nanhte hpe ngai hpyi nem made ai.

²Karai Kasang nanhte hpe ap ya da sai sagu hpung a sagu rem ai ni zawn, Karai Kasang galaw shangun mayu ai hku hte maren myit lawm ai hte kabu gara let bau rem gawn lajang nga mu. Ja gumhpraw shabrai lu na matu sha galaw ai hku n rai, kaja wa daw jau mayu ai shawang myit hte daw jau mu.

³Nanhte bau maka na matu nanhte a lata hta ap da sai dai hpung hpe up Madu mayu ai myit hte n re ai sha dai sagu hpung a matu kasi ningli kaja ni tai nga mu.

⁴Dai Sagu Rem Agyi Kaba Wa dan pru ai shaloi nanhte gaw htoi kabrim ai nsam galoi mung n mat chye ai arawng sadang hte hpring ai janmau lu la na marin dai.

⁵Dai hte maren, Brang ram ni e, asak kaba sai myit su ni a npu e taw nga lu na rai myit dai. Nanhte shada da daw jau na matu, nanhte yawng mayawng shagrit shanem ngu ai lawngsap bu hpun dagraw da nga mu; hpa majaw nga yang, Chyum Laika hta, “Karai Kasang gaw gumrawng gumtawng ai ni hpe mung hkap shadang nga ai rai ti mung, myit shagrit shanem ai ni hpe chyeju jaw nna myi man pa shangun da mu ai,” ngu nna tsun nga ai.

⁶Dai re ai majaw Karai Kasang gaw shi a ram ging hkrak dum ai aten du jang nanhte hpe shagrau shatsaw dat myit ga, Karai Kasang a n-gun atsam rawng ai lata a npu e nanhte a hkum hpe shagrit shanem nna nga mu.

⁷Nanhte a myit tsang ai nlang hte hpe shi hta kabai ap da mu; hpa majaw nga yang shi gaw nanhte hpe lanu lahku tsang ya nga ai.

⁸Nanhte htauli htaula rai nga mu! Nanhte a hpyen wa ngu ai Satan gaw, kadai hpe kawa mayu sha kau lu na i? nga nna shabam ai hkanghkyi zawn ningwan hkawm nga ai.

⁹Nanhte gaw nanhte hkam la sai makam masham hpe shangang shakang da nhtawm, dai hpyen wa hpe hkap shingdang gasat mu; hpa majaw nga yang, mungkan ting na nanhte a kam sham ai hpu nau ni mung dai hte bung ai nni nkri ni hpe hkam nga ai lam nanhte chye nga myit dai.

¹⁰Rai ti mung nanhte jahkring sha mi nni nkri hkam ngut ai hpang, chyeju yawng mayawng a Madu rai nga ai Karai Kasang gaw nanhte hpe Hkristu hta langai sha tai shangun nna htani htana hpung shingkang hta shang sha lu mu ga, nanhte hpe shaga la ai Madu shi nan nanhte hpe ra n rawng hkra jahkum shatsup ai lam shangang shakang ai lam, n-gun lagaw sharawng ai lam ni jaw nna ngang kang ai npawt hkridun hta tsap nga lu ai ahkang jaw na marin dai.

¹¹Shi kaw htani htana n-gawn tawa n-gun atsam anga nga u ga law. Amen.

¹²Ngai gaw ndai laika kadun ni hpe Sila a karum ai hte ka dat we ai; shi gaw ngai grai kam lu ai kangka ai Hkristan hpu nau wa langai mi rai nga ai ngu nna ngai sawn da ai rai nga ai. Ndai gaw Karai Kasang a teng man ai chyeju rai nga ai lam ngai nanhte hpe n-gun jaw let sakse hkam na matu ndai laika ka dat nngai, Dai hta ngang ngang tsap ngu mu.

¹³Babelon mare hta nga ai nanhte hpe zawn lata la hkrum ai hpung gaw, nanhte hpe shakram dat ai; ngai sha Marku mung nanhte hpe shakram dat nga ai.

¹⁴Nanhte shada da tsaw ra ai pup ai hte shakram hkat nga mu. Hkristu a masha ni nlang hte hta ngwi pyaw ai gaw anga nga u ga law.